ശൈത്യകാലത്തിന്റെ വരവ് അറിയിച്ചുകൊണ്ടാണ് സുഹൈല്‍ നക്ഷത്രം പ്രത്യക്ഷപ്പെട്ടിട്ടും രക്ഷയില്ല. യുഎഇയിൽ ഇന്ന് താപനില ഉയരുമെന്നാണ് മുന്നറിയിപ്പ്. താപനില 50 ഡിഗ്രി സെൽഷ്യസിൽ എത്തുമെന്നാണ് പ്രവചനം. കഴിഞ്ഞ ദിവസങ്ങളിൽ അൽപ്പം താഴ്ന്ന നിലയിലായിരുന്ന താപനില
വീണ്ടും ഉയർന്നിട്ടുണ്ട്. വെള്ളിയാഴ്ച ഉച്ചയോടെ ഷാർജയിലെ താപനില 50 ഡിഗ്രി സെൽഷ്യസ് കടന്നിരുന്നു.

നാഷണൽ സെന്റർ ഓഫ് മെറ്റീയോ‌റോളജിയുടെ റിപ്പോർട്ട് അനുസരിച്ച് യുഎഇയിൽ കഴിഞ്ഞ ദിവസം രേഖപ്പെടുത്തിയ ഏറ്റവും ഉയർന്ന താപനില 50.3 ഡിഗ്രി സെൽഷ്യസാണ്. ഷാർജയിലെ അൽ ദൈദിൽ ഉച്ചയ്ക്ക് 12.30 ന് ആണ് 50.3 ഡിഗ്രി സെൽഷ്യസ് റിപ്പോർട്ട് ചെയ്തത്. എന്നാൽ അൽ ഐനിൽ കഴിഞ്ഞ ദിവസം വൈകുന്നേരത്തോടെ കനത്ത മഴ റിപ്പോർട്ട് ചെയ്തതായി കാലാവസ്ഥാ കേന്ദ്രം അറിയിച്ചു.

ദുബായ്-അൽ ഐൻ റോഡിലെ മഴയുടെ വീഡിയോകളും കാലാവസ്ഥാ നിരീക്ഷണ കേന്ദ്രം പങ്കുവെച്ചിട്ടുണ്ട്. കൊടും വേനലില്‍ ചുട്ട് പൊള്ളുന്ന രാജ്യത്തെ ജനങ്ങള്‍ക്ക് ആശ്വാസമായി ശൈത്യകാലത്തിന്റെ വരവ് അറിയിച്ചുകൊണ്ടാണ് സുഹൈല്‍ നക്ഷത്രം പ്രത്യക്ഷപ്പെട്ടത് വാർത്തയിൽ യുഎഇയിലെ ജനങ്ങൾ വളരെയധികം ആശ്വാസത്തിലായിരുന്നു.

എന്നാൽ താപനില കൂടുന്നത് പ്രവാസികളെ ഉൾപ്പെടെ ആശങ്കയിലാക്കിയിരിക്കുകയാണ്. എന്നാൽ അതിൽ ആശങ്കപെടേണ്ട കാര്യമില്ല സുഹൈല്‍ എത്തിയാലും തുടര്‍ന്നുള്ള ആഴ്ച്ചകളില്‍ ഘട്ടം ഘട്ടമായിട്ടായിരിക്കും രാജ്യത്തെ താപനിലയില്‍ മാറ്റം ഉണ്ടാവുക. 40 ദിവസങ്ങള്‍ക്ക് ശേഷമായിരിക്കും രാജ്യത്ത് ശൈത്യകാലം ആരംഭിക്കുക.

വരും ദിവസങ്ങളില്‍ പകല്‍ സമയത്തിന്റെ ദൈര്‍ഘ്യം പതിമൂന്ന് മണിക്കൂറില്‍ താഴെയായി കുറയുമെന്ന് യുഎഇ അസ്‌ട്രോണമി സെന്റര്‍ അറിയിച്ചു. ഒക്ടോബറോടെ രാവും പകലും തുല്യ ദൈര്‍ഘ്യത്തിലെത്തും. ഈ സമയങ്ങളില്‍ രാജ്യത്തെ താപനിലയിലും കുറവ് രേഖപ്പെടുത്തും.

രാജ്യാന്തര വാന നിരീക്ഷണ കേന്ദ്രത്തിന്‍റെ കണക്കിൽ സിറിയസിന് ശേഷം ആകാശത്ത് ഏറ്റവും തിളക്കമുള്ള രണ്ടാമത്തെ നക്ഷത്രമാണ് സുഹൈൽ. ഭൂമിയിൽ നിന്ന് 313 പ്രകാശ വർഷം അകലെയാണ് ഇത്. അറബ് വിശ്വാസവുമായി ഏറെ ബന്ധപ്പെട്ട് കിടക്കുന്ന നക്ഷത്രമാണ് ഇത്. സുഹൈല്‍ നക്ഷത്രം തെളിയുന്നത് ചൂട് കുറയുന്നതിന്റെ സൂചനയായാണ് പരമ്പരാഗതമായി അറബ് ജനത കാണുന്നത്.

പുരാതന കാലം മുതൽ അറബികൾ സുഹൈൽ നക്ഷത്രം നോക്കിയാണ് വേനൽക്കാലം കഴിയുന്നത് കണക്കാക്കിയിരുന്നത്. അറബ് രാജ്യങ്ങളിൽ മൽസ്യ ബന്ധനത്തിനും കൃഷിക്കും അനുയോജ്യമായ സമയം നിശ്ചയിക്കുന്നതും ഈ നക്ഷത്രത്തെ ആശ്രയിച്ചാണ്.സുഹൈല്‍ നക്ഷത്രത്തിന് നാല് ഘട്ടങ്ങളാണ് ഉള്ളത്. അല്‍ തരഫയിലാണ് തുടക്കം.

അല്‍ ജബ, അല്‍ സെബ്ര, അല്‍ സരഫ എന്നിങ്ങനെയാണിതെന്ന് കാലാവസ്ഥാ വകുപ്പ് അറിയിച്ചു. അല്‍ തരഫ ഘട്ടത്തില്‍ കാലാവസ്ഥ അത്യന്തം ചൂടേറിയതായിരിക്കും. എന്നാല്‍ അല്‍ സര്‍ഫ ഘട്ടം വരുന്നതോടെ വലിയ മാറ്റം ചൂടില്‍ വരും. പതിയെ ചൂട് കുറയാന്‍ തുടങ്ങും. പിന്നീട് മഴയുടെ കാലമായിരിക്കുമെന്നാണ് പൊതുവേയുള്ള വിശ്വാസം.