സോഷ്യൽമീഡിയയിൽ മുഴുവൻ ഇപ്പോൾ ഒരു ഡയലോഗാണ്. '' ഹായ് എന്താ പരിപാടി ? സുഖല്ലേ… പെര്‍ഫക്‌ട്..ഓക്കെ… ആന്‍ഡിറ്റീസ് റ്റൂ ആന്‍ഡ്ദ റ്റാന്‍ ആന്‍ഡ്ദ കൂന്‍ ആന്‍ഡ്ദ പാക്ക്..ഒക്കേ? ''. പയ്യാനക്കല്‍ സ്വദേശി കെ.പി. നൈസല്‍ ബാബുവാണ് ഈ 'പെര്‍ഫക്‌ട് ഒക്കേ..' ഡയലോഗുകാരന്‍ ! സമൂഹമാധ്യമങ്ങളില്‍ വൈറലായ നൈസല്‍ ബാബുവിനെ ഇന്നലെ വൈകിട്ടോടെ കേരളം പോലീസും ഏറ്റെടുത്തിരിക്കുകയാണ്.

നൈസല്‍ ബാബുവിന്റെ വാട്സാപ്പ് സന്ദേശം റീമിക്സ് ചെയ്ത് പുറത്തിറങ്ങിയ പാട്ടാണ് കേരള പൊലീസിന്റെ മീഡിയ സെല്ലില്‍ ഇന്നലെ പോസ്റ്റ് ചെയ്തത്. രണ്ടുദിവസമായി കേരളത്തില്‍ തുടരുന്ന കര്‍ശനനിയന്ത്രണങ്ങളില്‍ പൊലീസ് നടത്തിയ പരിശോധനകളുടെ വിഡിയോയ്ക്കാണ് നൈസല്‍ ബാബുവിന്റെ ഡയലോഗുകള്‍ കോര്‍ത്തിണക്കിയ പാട്ട് പിന്നണിയിലെത്തിയത്. ഇന്നലെ വൈകിട്ടാണ് പൊലീസിന്റെ ഫെയ്സ്ബുക് പേജില്‍ ഈ വിഡിയോ ഇടംപിടിച്ചത്.

കൂട്ടുകാരന് കോവിഡ് ബാധിച്ചപ്പോഴാണ് നൈസലും ക്വാറന്റീനില്‍ ഇരിക്കേണ്ടിവന്നത്. 'ആകെ പേടിയാവുന്നു, എന്തെങ്കിലുമൊക്കെ വിഡിയോ അയയ്ക്കണേ' എന്ന് കൂട്ടുകാരന്‍ പറഞ്ഞപ്പോഴാണ് നൈസല്‍ വിഡിയോ ഷൂട്ട് ചെയ്ത് വാട്സാപ്പ് യ്തത്. ''നാലുമണിക്ക് ഒരു ചായ ഒരുവട… ഒരു പഴം പൊരി ഒരു വട..ഒരട ഒരു വട.. ഞായറാഴ്ചയാണെങ്കില്‍ ബിരിയാണി….മച്ചാനേ, അത് പോരേ അളിയാ..? '' പക്ഷേ വാട്സാപ്പില്‍ വിഡിയോ അയച്ചപ്പോള്‍ ചെറിയൊരു അബദ്ധം പറ്റിയിരുന്നു.

കൂട്ടുകാരന് അയച്ചതിനൊപ്പം ഏതോ വാട്സാപ്പ് ഗ്രൂപ്പിലേക്കും വിഡിയോ അയച്ചുപോയി. സംഭവം കണ്ടവരെല്ലാം ചിരിച്ചുമറിഞ്ഞു. വിഡിയോ പലയിടത്തുംകറങ്ങിക്കറങ്ങി വൈറലായി മാറുകയും ചെയ്തു.

ഒരു വര്‍ഷത്തിനുശേഷം ഗായകന്‍ അശ്വിന്‍ ഭാസ്കര്‍ ആ വിഡിയോ റീമിക്സ് ചെയ്ത് പാട്ടിറങ്ങിയതോടെയാണ് മലയാളികളുള്ള രാജ്യങ്ങളിലെല്ലാം സമൂഹമാധ്യമങ്ങളില്‍ നൈസല്‍ താരമായി മാറിയത്. നൈസലിന്റെ ചിത്രം ട്രോളുകളായും വാട്സാപ്പ് സ്റ്റിക്കറുകളുമായും ഇപ്പോൾ പ്രചരിക്കുകയാണ്.