റോബട്ടിക് സ്പെക്ട്രം വഴി പോലീസിനോട് പറയാം, കണ്ടോ സാറേ, ഒരാളിവിടെ കുറ്റകൃത്യം ചെയ്യുന്നുണ്ടേ!
ദേശീയപാതയില് ചേര്ത്തല എക്സ്റേ കവലയിലും ചേര്ത്തല ദേവീക്ഷേത്രത്തിനു മുന്നില് കെഎസ്ആര്ടിസി ബസ് സ്റ്റാന്ഡിനു സമീപവും രണ്ടു കേന്ദ്രങ്ങളില് റെഡ് ബട്ടണ് അലാം റോബട്ടിക് സ്പെക്ട്രം സ്ഥാപിക്കുന്നു. കുറ്റകൃത്യങ്ങളെ സംബന്ധിച്ച വിവരങ്ങള് പൊലീസിനെ തല്സമയം അറിയിക്കാനാവുന്ന സംവിധാനമാണിത്.
പൊലീസിന്റെ പൈലറ്റ് പദ്ധതി പ്രകാരമാണിത്. കുറ്റകൃത്യങ്ങള് തടയാനും കണ്ടെത്താനും ഇതിലൂടെ കഴിയുമെന്നാണു പ്രതീക്ഷ. രാത്രിയിലും ചിത്രങ്ങളും വിഡിയോകളും പകര്ത്തും. ക്യാമറയിലെ വിവരങ്ങള് ഒരാഴ്ചയോളം സൂക്ഷിക്കും. യന്ത്രസാമഗ്രികള് എത്തിച്ചു ചേര്ത്തല നഗരസഭ ഓഫിസ് പരിസരത്തു സൂക്ഷിച്ചിട്ടുണ്ട്. രണ്ടാഴ്ചയ്ക്കുള്ളില് പ്രവര്ത്തനസജ്ജമാക്കും എന്നാണു വിവരം.
ഈ യന്ത്രത്തിന് പത്ത് അടിയോളം ഉയരമുണ്ട്. ഏറ്റവും മുകളിലായി 360 ഡിഗ്രിയില് തിരിയുന്ന അഞ്ചു ക്യാമറകള് മുഴുവന് സമയവും നിരീക്ഷണം നടത്തും. മധ്യഭാഗത്തായി ചുവപ്പ്, പച്ച ബട്ടണുകളുണ്ടാവും. പച്ച, യന്ത്രം പ്രവര്ത്തനക്ഷമമാണെന്നതിന്റെ സൂചനയാണ്.
യന്ത്രത്തിന്റെ മധ്യഭാഗത്തുള്ള ചുവന്ന ബട്ടണ് അമര്ത്തിയാല് ഉടന് ചുവപ്പു വിളക്കുകള് തെളിയും. വിവരം നല്കുന്ന ആളിനെ കാണാവുന്ന തരത്തില് ക്യാമറ പ്രവര്ത്തിച്ചുതുടങ്ങും. പൊലീസ് കണ്ട്രോള് റൂമുമായി നേരിട്ടു സംസാരിക്കാനാകും. ഈ സമയത്തെ ഫോട്ടോകളും ദൃശ്യങ്ങളും പൊലീസ് കണ്ട്രോള് റൂമിലും സമീപത്തെ പൊലീസ് പട്രോളിങ് വാഹനത്തിലുമെത്തും.
https://www.facebook.com/Malayalivartha
