എന്നന്നേക്കുമായി നഷ്ടപ്പെട്ടുവെന്നു കരുതിയ നായയെ മൂന്നുവര്‍ഷങ്ങള്‍ക്കു ശേഷം ഉടമയ്ക്കു തിരികെ ലഭിച്ചപ്പോള്‍ ഇരുവരും തമ്മില്‍ നടന്ന സ്‌നേഹപ്രകടനം കണ്ടുനിന്നവരുടെയും കണ്ണു നിറച്ചു. ജോര്‍ജിയയിലാണ് സംഭവം.

അറുപത്തിരണ്ടുകാരനായ ജിയോര്‍ജിക്ക് മൂന്നു വര്‍ഷങ്ങള്‍ക്കു മുമ്പ് 2015-ലാണ് തന്റെ ഓമനയായ വളര്‍ത്തുനായയെ നഷ്ടമായത്. പിന്നീട് തന്റെ നായയ്ക്കു വേണ്ടിയുള്ള തെരച്ചില്‍ അദ്ദേഹം ആരംഭിച്ചുവെങ്കിലും നിരാശയായിരുന്നു ഫലം. നായയെ അന്വേഷിച്ച് നോട്ടീസുകള്‍  പല സ്ഥലങ്ങളിലും ഒട്ടിച്ചുവെങ്കിലും എല്ലാ ശ്രമവും വിഫലമായി.

ഇനിയൊരു കണ്ടുമുട്ടല്‍ ഉണ്ടാകില്ലെന്ന ചിന്തയില്‍  വിഷമിച്ചു കഴിഞ്ഞിരുന്ന ഉടമയ്ക്ക് ജോര്‍ജിയെ പറ്റിയുള്ള ആശ്വാസ വാര്‍ത്ത എത്തിയത് മൂന്നു വര്‍ഷങ്ങള്‍ക്ക് ശേഷമായിരുന്നു. നായയെ പറ്റിയുള്ള ഉടമയുടെ വിവരണത്തോട് സാമ്യമുള്ള ഒരു നായയെ ജോര്‍ജിയയിലെ ടിബിലിസിയിലെ ഒപ്പെറാ ആന്‍ഡ് ബാലെ തീയറ്ററിനു സമീപം കണ്ടുവെന്നാണ് ഉടമയെ തേടിയെത്തിയ ഫോണ്‍ കോളില്‍ പറഞ്ഞത്.

സ്ഥലത്തേക്ക് പാഞ്ഞെത്തിയ ഉടമ കണ്ടത് ഇനിയൊരിക്കലും കാണില്ലെന്നു കരുതിയ തന്റെ പൊന്നോമന നായയെ ആയിരുന്നു. ഉടമയെ കണ്ടമാത്രയില്‍ ഓടിയെത്തിയ നായ തന്റെ മുന്‍കാലുകള്‍ തന്റെ യജമാനന്റെ ശരീരത്തിലേക്ക് കയറ്റിവച്ച് സ്‌നേഹം പ്രകടിപ്പിക്കുന്നതും വീഡിയോയില്‍ കാണാം.

ഒട്ടും സമയം കളയാതെ തന്നെ ഉടമ തന്റെ വളര്‍ത്തുനായയെയും കൂട്ടി വീട്ടിലേക്കു പുറപ്പെട്ടു. കഴിഞ്ഞ മൂന്നു വര്ഷക്കാലം ഈ നായ ആര്‍ക്കൊപ്പമായിരുന്നുവെന്ന് വ്യക്തമല്ല.