ഭക്ഷണശാലയിലെത്തുന്നവരെ വിസ്മയിപ്പിക്കുവാന്‍ വ്യത്യസ്തമായ പല വിദ്യകളും ഭക്ഷണശാലാ ഉടമകള്‍ പരീക്ഷിക്കാറുണ്ട്. അത്തരമൊരു വ്യത്യസ്തതയിലൂടെ ഏറെ ചര്‍ച്ചാ വിഷയമാകുകയാണ് വിയറ്റ്‌നാമിലെ ഹോ ചി മിന്നാ സിറ്റിയില്‍ പ്രവര്‍ത്തിക്കുന്ന അമിക്‌സ് കോഫി എന്ന സ്ഥാപനം.

കാരണം അതിസുന്ദരന്മാരായ അലങ്കാരമത്സ്യങ്ങളാണ് ഇവിടെ എത്തുന്ന ഉപഭോക്താക്കളെ കാത്തിരിക്കുന്നത്. രണ്ടു നിലകളിലായി പ്രവര്‍ത്തിക്കുന്ന ഈ ഭക്ഷണശാലയിലെ തറയില്‍ വെള്ളം നിറച്ച് അലങ്കാരമത്സ്യങ്ങളെ തുറന്നുവിട്ടിരിക്കുകയാണ്. ആളുകള്‍ നടന്നു പോകുമ്പോള്‍ കാല്‍പാദങ്ങളില്‍ മുട്ടിയുരുമി മത്സ്യങ്ങള്‍ കടന്നുപോകും. രണ്ടു പാളി ടാര്‍പോളിന്‍ നിലത്ത് വിരിച്ച് അതിനുമുകളിലാണ് വെള്ളം നിറച്ച് മത്സ്യങ്ങളെ നിക്ഷേപിച്ചിരിക്കുന്നത്.

ഓരോ നിലയിലും ഇരുപത് സ്‌ക്വയര്‍ മീറ്റര്‍ നീളത്തില്‍ വിരിച്ചിരിക്കുന്ന ടാര്‍പോളിനില്‍ 25 സെന്റിമീറ്റര്‍ താഴ്ച്ചയിലാണ് വെള്ളം നിറച്ചിരിക്കുന്നത്. വലുതും ചെറുതുമായ നൂറുകണക്കിന് അലങ്കാര മത്സ്യങ്ങളെയാണ് ഇതിനുള്ളില്‍ നിറച്ചിരിക്കുന്നത്. ഇവിടെയെത്തുന്നവര്‍ ചെരുപ്പുകള്‍ അഴിച്ചു വച്ചുവേണം വെള്ളത്തില്‍ ചവിട്ടുവാന്‍. വെള്ളത്തില്‍ വച്ചിരിക്കുന്ന കസേരയിലിരുന്ന് മീനുകളുടെ സൗന്ദര്യം ആസ്വദിച്ച് ഉപഭോക്താക്കള്‍ക്ക് ഭക്ഷണം കഴിക്കാം.

ഇരുപത്തി മൂന്നു വയസുകാരിയായ ഗുയെന്‍ ഡുവോക്കിന്റെ മനസില്‍ തോന്നിയ ആശയമാണ് ഈ വ്യത്യസ്തതയ്ക്ക് പിന്നില്‍. എന്നാല്‍ ഇത് പ്രാവര്‍ത്തികമാക്കുക എന്നത് ഇവരെ സംബന്ധിച്ചടുത്തോളം അത്ര എളുപ്പമുള്ള ഒരു കാര്യമായിരുന്നില്ല. ഏകദേശം 10,000 ലിറ്റര്‍ വെള്ളമാണ് രണ്ടുനിലകളിലുമായി നിറച്ചിരിക്കുന്നത്. മാത്രമല്ല ഈ വെള്ളം വൃത്തിയായി സൂക്ഷിക്കുന്നത് വളരെ വെല്ലുവിളി നിറഞ്ഞ കാര്യമാണ്. ചില മാതാപിതാക്കള്‍ അവര്‍ കൂടെ കൊണ്ടുവരുന്ന കുട്ടികളെ മീന്‍ പിടിക്കുവാന്‍ അനുവദിക്കാറുണ്ട് എന്നാല്‍ അത്തരം പ്രവര്‍ത്തികള്‍ പ്രോത്സാഹിപ്പിക്കുവാന്‍ തങ്ങള്‍ക്ക് സാധിക്കില്ലെന്ന് ഗുയെന്‍ പറഞ്ഞു. മാത്രമല്ല ഇത്തരം പ്രവര്‍ത്തി ചെയ്യുന്നവരോട് സ്ഥാപനത്തില്‍ നിന്നും പോകുവാന്‍ തങ്ങള്‍ ആവശ്യപ്പെടുമെന്നും ഇവര്‍ വ്യക്തമാക്കി.

അമിക്‌സ് കോഫിയുടെ ആദ്യ നിലയില്‍ ചെറിയ മീനുകളെയാണ് നിറച്ചിരിക്കുന്നത്. എന്നാല്‍ രണ്ടാം നിലയില്‍ നിറച്ചിരിക്കുന്നത് ഏകദേശം 300 ഗ്രാം ഭാരമുള്ള മീനുകളെയാണെന്ന് ഗുയെന്‍ വ്യക്തമാക്കി. ഈ ഭക്ഷണശാലയുടെ ചിത്രങ്ങള്‍ സോഷ്യല്‍മീഡിയയില്‍ വ്യാപകമായി പ്രചരിച്ചതിനെ തുടര്‍ന്ന് അഭിനന്ദനങ്ങള്‍ക്കു പുറമെ വിമര്‍ശന ശരങ്ങളും ഇവരെ തേടിയെത്തുന്നുണ്ട്. മീനുകളോട് കാണിക്കുന്ന ക്രൂരതയാണിതെന്നാണ് കുറേയധികം ആളുകള്‍ പറയുന്നത്. എങ്കില്‍ പോലും അമിക്‌സ് കോഫിയിലെത്തുന്നവരുടെ എണ്ണം ഇതുവരെ കുറഞ്ഞിട്ടില്ല. ദൂരെ സ്ഥലങ്ങളില്‍ നിന്നു പോലും ധാരാളമാളുകളാണ് ദിനംപ്രതി അമിക്‌സ് കോഫിയിലേക്ക് ഒഴുകിയെത്തുന്നത്.