പാരഷൂട്ടില്‍ പറക്കാനിറങ്ങി യുവാവ് അപകടത്തില്‍പ്പെട്ടു. പറന്നുപറന്നു നാട്ടുകാരെ പരിഭ്രാന്തരാക്കിയത് കുമരംചിറ സ്വദേശിയായ യുവാവാണ്.

ഇക്കഴിഞ്ഞ ദിവസം വൈകിട്ട് പോരുവഴി മലനട ക്ഷേത്രത്തിനു സമീപത്തായിരുന്നു സംഭവം. വൈകിട്ടോടെ ബൈക്കില്‍ എത്തിയ ഇയാള്‍ ഒപ്പം കൊണ്ടുവന്ന പാരഷൂട്ട് തയാറാക്കി ക്ഷേത്രത്തിനരികിലെ കുന്നില്‍നിന്നു പറക്കാന്‍ തുടങ്ങി.

ആദ്യം ആളുകളുടെ ശ്രദ്ധയില്‍പ്പെട്ടില്ല. കൂടുതല്‍ ദൂരത്തേക്കു പറക്കാന്‍ തുടങ്ങിയതോടെ ആളും കൂടി. എന്നാല്‍ ശക്തമായ കാറ്റില്‍ നിയന്ത്രണം നഷ്ടപ്പെട്ട പാരഷൂട്ട് മരത്തിലേക്കു പൊട്ടിവീണു.

ഇതുമായി യുവാവ് ഒരു മണിക്കൂറോളം മരത്തില്‍ കുടുങ്ങിക്കിടന്നു. ഒരു ഹെല്‍മറ്റ് മാത്രമായിരുന്നു 'സുരക്ഷാകവചം'. തുടര്‍ന്ന് നാട്ടുകാരുടെ സഹായത്തോടെ താഴെയിറങ്ങിയ ഇയാള്‍ ബൈക്കില്‍ സ്ഥലംവിട്ടു.