അലൈന ക്ലസ്റ്റര്‍, പഠിക്കുന്നതിനിടെ നോര്‍ത്ത് കരോലിനയിലെ ഒരു റസ്റ്ററന്റില്‍ വെയിട്രസ്സ് ആയി ജോലിയും ചെയ്യുന്നുണ്ട്. ഇക്കഴിഞ്ഞ ശനിയാഴ്ച ഒരു കസ്റ്റമറെത്തി രണ്ട് കുപ്പി വെള്ളം ആവശ്യപ്പെട്ടു.

അത് നല്‍കി, അല്‍പസമയത്തിന് ശേഷം ബില്‍ എടുക്കാന്‍ അദ്ദേഹത്തിന്റെ അടുത്ത് എത്തിയപ്പോള്‍ അലൈന ഞെട്ടിപ്പോയി! ഒരു ഭീമന്‍ തുക, ടിപ്പ് ആയി ട്രേയില്‍ വെച്ചിരിക്കുന്നതാണ് കണ്ടത്. തന്നെ കബളിപ്പിക്കാനായിരിക്കും ഇതെന്നാണ് അവള്‍ കരുതിയത്, അതുകൊണ്ടുതന്നെ എന്താണിത്? എന്നായിരുന്നു പ്രതികരണം.

രണ്ടു കുപ്പി വെള്ളം നല്‍കിയതിന് കിട്ടിയ ടിപ്പ് 7,37,850 രൂപ. അതായത് 10,000 യുഎസ് ഡോളര്‍. ടിപ്പ് കിട്ടിയ ഹോട്ടല്‍ അലൈന ക്ലസ്റ്റര്‍ക്ക് കണ്ണുകളെ വിശ്വസിക്കാനായില്ല.

ഇത്ര വലിയ ടിപ്പ് നല്‍കിയ വ്യക്തിയെ ഒരിക്കല്‍ക്കൂടി നോക്കിയപ്പോഴാണ് ആള്‍ ആരാണെന്ന് മനസിലാകുന്നത്. 8.9 മില്ല്യണ്‍ സബ്‌സ്ക്രൈബേഴ്‌സുള്ള യൂട്യുബ് ചാനലിന്റെ ഉടമയായ ബീസ്റ്റായിരുന്നു ആ പണക്കാരനായ ഉപഭോക്താവ്. ജീവനക്കാരി പറയുന്നു.

പ്രസ്തുത ജീവനക്കാരിയുടെ പ്രതികരണം റെക്കോര്‍ഡ് ചെയ്യാന്‍ അദ്ദേഹം രണ്ടുപേരെ ഏര്‍പ്പാട് ചെയ്തിരുന്നുവെന്നും അല്‍പ സമയത്തിനു ശേഷം അദ്ദേഹം തിരികെ റസ്റ്ററന്റിലെത്തി എല്ലാവരേയും ആലിംഗനം ചെയ്തുവെന്നും അലൈന ക്ലസ്റ്റര്‍ പിന്നീട് പറഞ്ഞു.

തനിക്ക് കൈവന്ന അപ്രതീക്ഷിത ഭാഗ്യത്തില്‍ സന്തോഷമുണ്ടെന്നും അവിടെ തന്നോടൊപ്പം ജോലി ചെയ്യുന്നതെല്ലാം കോളജ് പഠനത്തിന് പണം കണ്ടെത്താന്‍ ശ്രമിക്കുന്നവരാണെന്നും അതിനാല്‍ ആ തുക എല്ലാവരും ചേര്‍ന്ന് പങ്കിട്ട് എടുക്കാനാണ് തീരുമാനമെന്നും ഇവര്‍ അറിയിച്ചു.