അമേരിക്കയില്‍ ജനിച്ച മോളി ഗിബ്‌സണ്‍ എന്ന കുഞ്ഞ് മറ്റൊരു പേരിലാകും ഇനി അറിയപ്പെടുന്നത്. ലോകത്തില്‍ ഏറ്റവും കൂടുതല്‍കാലം സൂക്ഷിച്ചുവച്ച ഭ്രൂണത്തില്‍ നിന്ന് ജനിച്ച കുട്ടിയെന്ന പേരിലാകും മോളി ഇനി അറിയപ്പെടുക. 27 വര്‍ഷങ്ങള്‍ക്കു മുന്‍പേ ജനിക്കേണ്ടവളായിരുന്നു മോളി. കാരണം 1992 മുതല്‍ സൂക്ഷിച്ചു വച്ചതാണ് ഈ ഭ്രൂണം.

കാത്തിരിപ്പിനൊടുവില്‍ ടീനയ്ക്കും ബെന്‍ ഗിബ്‌സണിനുമാണ് ഈ കുഞ്ഞിനെ ലഭിച്ചത്. ഇവരുടെ ആദ്യത്തെ കുഞ്ഞും ഇത്തരത്തില്‍ ജനിച്ചതാണ്. 2017-ല്‍ മോളിയുടെ ഭ്രൂണത്തിനൊപ്പം സൂക്ഷിച്ച മറ്റൊരു ഭ്രൂണത്തില്‍ നിന്നുമാണ് ആദ്യ കുഞ്ഞ് എമ്മയുടെ ജനനം.

എംബ്രിയോ അഡോപ്ഷന്‍ എന്ന മാര്‍ഗത്തിലൂടെയാണ് മോളിയെ ഈ ദമ്പതികള്‍ക്ക് ലഭിച്ചത്. രണ്ടരകിലോ ഭാരമുണ്ട് മോളിക്ക്. മറ്റ് ആരോഗ്യ പ്രശ്നങ്ങളൊന്നുമില്ല.

നാഷണല്‍ എംബ്രിയോ ഡോണേഷന്‍ സെന്റര്‍ എന്ന എന്‍ജിഒ ആണ് ഇതിന് പിന്നില്‍. ഭ്രൂണം, ദാനം ചെയ്യാനാഗ്രഹിക്കുന്നവരില്‍ നിന്ന് ശേഖരിച്ച് ശീതികരിച്ച് സൂക്ഷിക്കുകയും കുഞ്ഞിന് വേണ്ടി ആഗ്രഹിക്കുന്ന മാതാപിതാക്കള്‍ക്ക് അത് നല്‍കുകയും ചെയ്യുകയാണ് ഈ സംഘടനയുടെ സ്വഭാവം.