ബ്രസീലിലെ സാവോ പോളോയില്‍ നിന്നും 144 കിലോമീറ്റര്‍ മാറി സ്ഥിതി ചെയ്യുന്ന അതിമനോഹരമായ ഒരു സ്ഥലമുണ്ട്. ഒരു ദ്വീപാണിത്. ഭൂമിയില്‍ പോകാന്‍ പേടിക്കേണ്ട ഒരേയൊരു സ്ഥലമാണിത് എന്നു പറഞ്ഞാല്‍ അതിശയോക്തിയേ അല്ല. പാമ്പുകളുടെ മാത്രം ദ്വീപെന്നറിയപ്പെടുന്ന ഈ ദ്വീപിന്റെ യഥാര്‍ത്ഥ പേര് ഇലാ ക്വിമാഡെ ഗ്രാന്‍ഡ് എന്നാണ്.

പാമ്പുകളുടെ ദ്വീപ് ഇവിടുത്തുകാര്‍ക്കെന്നും ഒരു പേടിസ്വപ്നമാണ്. ലോകത്തിലെ ഏറ്റവും ഭയക്കേണ്ട വിഷപ്പാമ്പുകളിലൊന്നായ സ്വര്‍ണത്തലയന്‍ അണലികളുടെ വാസസ്ഥലമാണിത്. ഏകദേശം രണ്ടായിരത്തിനും നാലായിരത്തിനുമിടയില്‍ അണലികള്‍ ഇവിടെയുണ്ടെന്നാണു നിഗമനം. ഇവയുടെ കടിയേറ്റാല്‍ ഒരു മണിക്കൂറിനകം മരണം സംഭവിക്കും. ഈ ഗണത്തില്‍ പെട്ട പാമ്പുകള്‍ മറ്റെവിടെയുമില്ലെന്നതാണ് രസകരമായ മറ്റൊരു വസ്തുത.

ഈ ദ്വീപിനെ ചുറ്റിപ്പറ്റി നിരവധി കഥകളാണു ബ്രസീല്‍ നിവാസികള്‍ക്കിടയിലുള്ളത്. ഈ ദ്വീപില്‍ ആദ്യമായി ലൈറ്റ് ഹൗസ് സ്ഥാപിച്ചത് 1909-ലാണ്. ഒപ്പം മേല്‍നോട്ടത്തിനായി ജീവനക്കാരെയും നിയോഗിച്ചു. പക്ഷേ അവരാരും പിന്നീട് തിരിച്ചു വന്നില്ല. അവസാനമായി നിയോഗിച്ച ലൈറ്റ് ഹൈസ് ജീവനക്കാരനും ഭാര്യയും അഞ്ചു വയസുള്ള കുട്ടിയുമടങ്ങുന്ന കുടുംബവും പാമ്പുകടിയേറ്റ് മരിച്ച നിലയില്‍ വീടിനുള്ളില്‍ കാണപ്പെടുകയായിരുന്നു. പിന്നീട് ഇവിടേക്ക് ജീവനക്കാരെ നിയോഗിക്കാതെയായി. മനുഷ്യവാസമില്ലാതെ കിടക്കുന്ന 43 ഹെക്ടര്‍ സ്ഥലമുണ്ട് ഇവിടെ. ഇതിന്റെ ആധിപത്യം ഇപ്പോള്‍ ഇവിടുത്തെ പാമ്പുകള്‍ക്കാണ്. കടല്‍ക്കൊള്ളക്കാര്‍ തങ്ങളുടെ കൊള്ള മുതല്‍ ഒളിപ്പിച്ചിരുന്നതിവിടെയാണെന്നും അതു സൂക്ഷിക്കാനായി പാമ്പുകളെ ദ്വീപിലെത്തിച്ചതാണെന്ന വാദവും നിലനില്‍ക്കുന്നുണ്ട്.

മനുഷ്യരാരും തന്നെ ഇവിടെയെത്താറില്ല. അഥവാ പഠനങ്ങള്‍ക്കും ലൈറ്റ് ഹൗസിന്റെ അറ്റകുറ്റപ്പണികള്‍ക്കുമെത്തുന്നവര്‍ നാവികസേനയുടെ പ്രത്യേക സംഘത്തോടൊപ്പമാണ് ഇവിടെയെത്താറുള്ളത്. വരുമ്പോള്‍ പാമ്പുകടിയേറ്റാല്‍ പ്രയോഗിക്കാനുള്ള പ്രതിവിഷവും ഒപ്പം കരുതും. ആയിരക്കണക്കിനു പാമ്പുകളാണ് ഇവിടെയുള്ള മരങ്ങളിലും പൊന്തക്കാടുകളിലും പതിയിരിക്കുന്നത്. ദ്വീപിലിറങ്ങി രണ്ടുചുവടു വയ്ക്കുമ്പോള്‍ തന്നെ മരങ്ങളിലും മറ്റും പതുങ്ങിയിരിക്കുന്ന പാമ്പുകളെ കാണാനാകും. ഇവയുടെ ഇരകള്‍ പ്രധാനമായും ദേശാടന പക്ഷികളാണ്. അതിനാല്‍ തന്നെ കൂടുതല്‍ സമയവും മരത്തിനു മുകളിലാണ് പാമ്പുകളുടെ വാസം.

പ്രതിവിഷം നിര്‍മ്മിക്കാനായി പാമ്പുകളുടെ വിഷം ഗവേഷകര്‍ ഗവണ്‍മെന്റിന്റെ അനുമതിയോടെ എടുക്കാറുണ്ട്. അതുപോലെ തന്നെ കരിഞ്ചന്തയിലും പാമ്പുവിഷം വന്‍തോതിലെത്താറുണ്ട്. ഇതാണ് ഇവിടുത്തെ പാമ്പുകള്‍ നേരിടുന്ന ഏക ഭീഷണി. മരുന്നു കച്ചവടക്കാര്‍ വന്‍തോതില്‍ പാമ്പുവിഷത്തിനായി പാമ്പുകളെ കൊന്നൊടുക്കുന്നുണ്ടെന്നാണു വിലയിരുത്തുന്നത്. ഇതിനെതിരെ നടപടികള്‍ സ്വീകരിക്കാനൊരുങ്ങുകയാണു ഭരണകൂടം. അതുകൊണ്ടു തന്നെ വംശനാശം സംഭവിക്കുന്ന ജീവികളുടെ പട്ടികയില്‍ സ്വര്‍ണത്തലയന്‍ അണലികളെയും ഉള്‍പ്പെടുത്തിയിട്ടുണ്ട്.