താജ്മഹലിനേക്കാള്‍ മനോഹരം എന്ത്. ഇതാ ഭാര്യയുടെ ഓര്‍മ്മയ്ക്ക് ഒരു റോഡ്. അതെങ്ങനെ താജിനെ കടത്തിവെട്ടും, എന്നാല്‍ അറിഞ്ഞോളൂ ഒരു ഭര്‍ത്താവിനെ, അദ്ദേഹത്തിന്റെ സ്‌നേഹത്തിന് പകരം വെക്കാന്‍ മറ്റൊന്നില്ല. ഭര്‍ത്താവ് എന്ന വാക്കിന്റെ അര്‍ത്ഥം മനസ്സിലാക്കാന്‍ ഒരു പാട് പഠിപ്പോ കഴിവോ ഒന്നും വേണ്ടെന്ന് തെളിയിക്കുകയാണ് ഈ സാധുമനുഷ്യന്‍ എന്നാല്‍ ഇദ്ദേഹത്തിന് ഒരു കാര്യം അറിയാം ഭാര്യ എന്നാല്‍ എന്താണെന്നും എന്താണ് അവള്‍ക്ക് തന്റെ ഹൃദയത്തില്‍ ഉണ്ടായിരുന്ന സ്ഥാനമെന്നും. അവളുടെ വിയോഗത്തിന് കാരണക്കാരനായ മലയെ അദ്ദേഹം തുരക്കുമ്പോള്‍ ഭ്രാന്തനെന്ന് എല്ലാവരും വിളിക്കുമ്പോഴും ഭാര്യയോടുള്ള സ്‌നേഹം പ്രവൃത്തിയിലൂടെ തെളിയിക്കുകയായിരുന്നു ഇദ്ദേഹം. ഒടുവില്‍ അദ്ദേഹം വിജയകിരീടം ചൂടി.
ഇതാണ് ദശരഥ് 1959ലാണ് ദശരഥിന്റെ ഭാര്യ ഫാല്‍ഗുനി മരിച്ചത്. അപകടത്തില്‍ പരിക്കേറ്റ ഫാല്‍ഗുനി രക്തം വാര്‍ന്ന് മരിക്കുകയായിരുന്നു. ദശരഥിന്റെ ഗ്രാമത്തില്‍നിന്ന് അടുത്തുള്ള ആശുപത്രിയിലെത്തണമെങ്കില്‍ 55 കിലോമീറ്റര്‍ സഞ്ചരിക്കേണ്ടിയിരുന്നു. അതാകട്ടെ, വലിയൊരു മലകടന്നുവേണം പോകുവാനും. ആശുപത്രിയിലെത്തിക്കാന്‍ കഴിയാതെ ഭാര്യയുടെ മരണം കണ്ടുനില്‍ക്കേണ്ടിവന്ന ദശരഥ് അന്നൊരു തീരുമാനമെടുത്തു. ഇനിയാര്‍ക്കും ഇങ്ങനെയൊരു ദുര്‍ഗതി വരരുത്.
ഭാര്യ മുംതാസിന്റെ സ്മരണയിലാണ് ആഗ്രയില്‍ ഷാജഹാന്‍ ചക്രവര്‍ത്തി താജ്മഹല്‍ തീര്‍ത്തത്. എന്നാല്‍, ദശരഥ് മാഞ്ചിയെന്ന ദളിതന്‍ തന്റെ ഭാര്യയുടെ സ്മാരകമായി തീര്‍ത്തത് ഒരു വഴിയാണ്. ഭാര്യയുടെ ജീവനും മരണത്തിനുമിടെ വിലങ്ങുതടിയായി നിന്ന മലയെ കൈക്കോട്ടും പിക്കാസുംകൊണ്ട് കീഴടക്കാന്‍ ദശരഥിന് വേണ്ടിവന്നത് 22 വര്‍ഷം. മലയെ കീഴടക്കിയ ദശരഥിന്റെ ജീവിതം ഇപ്പോള്‍ ബോളിവുഡ് സിനിമയ്ക്ക് പ്രമേയമാവുകയാണ്.
ഭാര്യയുടെ മരണത്തില്‍ വിലപിച്ചിരിക്കാതെ, ദശരഥ് കൈക്കോട്ടും പിക്കാസുമെടുത്ത് ഇറങ്ങി. മല തുരന്ന് നേരിട്ടൊരു വഴിയുണ്ടാക്കുകയെന്നതായിരുന്നു ലക്ഷ്യം. കണ്ടുനിന്നവര്‍ ദശരഥിന് ഭ്രാന്താണെന്നുവരെ പറഞ്ഞു. എന്നാല്‍, 22 വര്‍ഷത്തെ കഠിനാധ്വാത്തിലൂടെ ആ ലക്ഷ്യം ദശരഥ് സാധിച്ചു. മലയെ രണ്ടായി പിളര്‍ത്തിയ ദശരഥ് മാഞ്ചി അവിടെയൊരു വഴിയുണ്ടാക്കി. 110 മീറ്റര്‍ നീളമുള്ള വഴിക്ക് പലയിടത്തും ഒമ്പത് മീറ്ററോളം വീതിയുണ്ടായിരുന്നു.
ദശരഥ് തീര്‍ത്ത വഴികണ്ട് ബിഹാര്‍ സര്‍ക്കാര്‍ പോലും അമ്പരന്നു. കിഴക്കന്‍ ബിഹാറിലെ മലയോര ഗ്രാമത്തിലെ ഈ അധ്വാനത്തെ ആദരിക്കാന്‍ സര്‍ക്കാര്‍ തീരുമാനിച്ചു. ദശരഥ് തീര്‍ത്ത കല്ലുവെട്ടുവഴി ഒരു ടാര്‍ റോഡാക്കി മാറ്റി. അതിന് മൂന്ന് പതിറ്റാണ്ടോളം വേണ്ടിവന്നുവെന്ന് മാത്രം. 2007ലാണ് ദശരഥ് മരിക്കുന്നത്.
ദശരഥിന്റെ കഥയാണ് മാഞ്ചിദ മൗണ്ടന്‍ മാന്‍ എന്ന സിനിമയ്ക്ക് ആധാരം. നസറുദീന്‍ സിദ്ദിഖിയാണ് ദശരഥിന്റെ വേഷത്തിലെത്തുന്നത്. കേതന്‍ മേത്തയാണ് സിനിമ സംവിധാനം ചെയ്തിരിക്കുന്നത്.
താജ്മഹല്‍ ഷാജഹാന്‍ തൊഴിലാളികളെക്കൊണ്ട് പണിയിക്കുകയായിരുന്നു. എന്നാല്‍ ഇദ്ദേഹം സ്വന്തം കൈകൊണ്ടാണ് അദ്ധ്വാനിച്ചത്. ഇത്രത്തോളം ഇല്ലെങ്കിലും സ്വന്തം ഭാര്യയുടെ വിലയറിഞ്ഞ് ഒരു നല്ലവാക്ക് പറഞ്ഞാല്‍ കുറെ കേസ് കുടുംബകോടതിയിലെ തീരും. പക്ഷേ ആരും തോക്കില്ലല്ലോ അറിയാതെ തോറ്റുകൊണ്ടിരിക്കുകയാണെങ്കിലും...

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha