സുഹൃത്തുക്കള്ക്കൊപ്പം ട്രെക്കിങ്ങിന് എത്തിയ യുവാവിനെ കാണാതായി
ലോകപ്രശസ്തമായ വാലി ഓഫ് ഫ്ലവേഴ്സ് ദേശീയോദ്യാനത്തില് ട്രെക്കിങ്ങിനായി എത്തിയ ഹരിയാന സ്വദേശിയായ വിനോദസഞ്ചാരിയെ കാണാതായി. ജൂണ് 8ന് കാണാതായ ഇയാള്ക്കായി സംസ്ഥാന ദുരന്ത നിവാരണ സേനയും പൊലീസും ചേര്ന്ന് ഡ്രോണുകള് ഉള്പ്പെടെ ഉപയോഗിച്ച് തിരച്ചില് ആരംഭിച്ചു. ഹരിയാനയിലെ ഫരീദാബാദ് സ്വദേശിയായ അഭിനവ് സിങ് (28) എന്ന യുവാവിനെയാണ് കാണാതായത്.
സുഹൃത്തുക്കളായ മറ്റ് നാല് പേര്ക്കൊപ്പമാണ് ഇയാള് ഉത്തരാഖണ്ഡിലെ ചമോലി ജില്ലയിലുള്ള വാലി ഓഫ് ഫ്ലവേഴ്സ് സന്ദര്ശിക്കാന് എത്തിയത്. ജൂണ് 8ന് ഘംഗാരിയയില് നിന്ന് വാലി ഓഫ് ഫ്ലവേഴ്സിലേക്ക് ട്രെക്കിങ് നടത്തുന്നതിനിടയിലാണ് അഭിനവ് സിങ്ങിനെ ഗ്രൂപ്പിലെ മറ്റുള്ളവര്ക്ക് നഷ്ടപ്പെടുന്നത്. കൂടെയുണ്ടായിരുന്ന സുഹൃത്തുക്കള് പലയിടത്തും തിരഞ്ഞെങ്കിലും കണ്ടെത്താന് കഴിഞ്ഞില്ല. തുടര്ന്ന് സുഹൃത്തുക്കള് ഗോവിന്ദ്ഘട്ട് പൊലീസ് സ്റ്റേഷനില് വിവരമറിയിക്കുകയായിരുന്നു.
പരാതി ലഭിച്ച ഉടന് തന്നെ ചമോലി പൊലീസ് സൂപ്രണ്ട് സര്വേശ് പന്വാറിന്റെ നിര്ദ്ദേശപ്രകാരം എസ്.ഡി.ആര്.എഫ്, പ്രാദേശിക പൊലീസ്, ഫോറസ്റ്റ് വകുപ്പ് ഉദ്യോഗസ്ഥര് എന്നിവരടങ്ങിയ സംയുക്ത സംഘം തിരച്ചിലിനായി രൂപീകരിച്ചു. വാലി ഓഫ് ഫ്ലവേഴ്സിലെ ദുര്ഘടമായ മലനിരകളിലും കൊക്കകളിലും മനുഷ്യര്ക്ക് നേരിട്ടെത്താന് ബുദ്ധിമുട്ടുള്ള ഇടങ്ങളിലും പരിശോധന നടത്തുന്നതിനായി അത്യാധുനിക ഡ്രോണുകള് വിന്യസിച്ചിട്ടുണ്ട്. വാലി ഓഫ് ഫ്ലവേഴ്സിലേക്കുള്ള പ്രവേശന കവാടം മുതല് ട്രെക്കിങ് പാതകളിലും സമീപത്തെ കാടുകളിലും സുരക്ഷാ ഉദ്യോഗസ്ഥര് വ്യാപകമായ തിരച്ചില് തുടരുകയാണ്.
യുവാവിനെക്കുറിച്ച് എന്തെങ്കിലും വിവരം ലഭിക്കുന്നവര് ഉടന് തന്നെ കണ്ട്രോള് റൂമിലോ അടുത്തുള്ള പൊലീസ് സ്റ്റേഷനിലോ വിവരമറിയിക്കണമെന്ന് അധികൃതര് അഭ്യര്ത്ഥിച്ചു. പരിഭ്രാന്തരാകേണ്ട സാഹചര്യമില്ലെന്നും എത്രയും വേഗം യുവാവിനെ കണ്ടെത്താന് കഴിയുമെന്നാണ് പ്രതീക്ഷയെന്നും പോലീസ് മേധാവി വ്യക്തമാക്കി.
https://www.facebook.com/Malayalivartha
