ഐ പി എല്‍ 13-ാം സീസണില്‍ പങ്കെടുക്കാന്‍ ടീമുകള്‍ യു.എ.ഇയിലെത്തി
ഡല്‍ഹി ക്യാപിറ്റല്‍സ്, സണ്‍റൈസേഴ്സ് ഹൈദരാബാദ് ടീമുകള്‍ ഇന്ത്യന്‍ പ്രീമിയര്‍ ലീഗ് ട്വന്റി20 ക്രിക്കറ്റിന്റെ 13-ാം സീസണില്‍ പങ്കെടുക്കാന്‍ യു.എ.ഇയിലെത്തി. ചാര്‍ട്ടേഡ് വിമാനത്തില്‍ മുംബൈയില്‍ നിന്നാണ് ടീമുകള്‍ യു.എ.ഇയിലേക്ക് പുറപ്പെട്ടത്.
ഡല്‍ഹി ക്യാപിറ്റല്‍സ് ഇന്നലെ വൈകിട്ടായിരുന്നു ദുബായില്‍ വിമാനമിറങ്ങിയത്. ഇരു ടീമുകള്‍ക്കും കോവിഡ് -19 വൈറസ് പരിശോധനയ്ക്ക് ശേഷം ആറു ദിവസത്തെ ക്വാറന്റൈന്‍ ഉണ്ടാകും. ശേഷം മാത്രമേ പരിശീലനം അടക്കമുള്ള കാര്യങ്ങള്‍ ആരംഭിക്കു. മുംബൈ ഇന്ത്യന്‍സ്, ചെന്നൈ സൂപ്പര്‍ കിങ്സ്, ബാംഗ്ലൂര്‍ റോയല്‍ ചലഞ്ചേഴ്സ്, രാജസ്ഥാന്‍ റോയല്‍സ്, പഞ്ചാബ് കിങ്സ് ഇലവന്‍, കൊല്‍ക്കത്ത നൈറ്റ് റൈഡേഴ്സ് ടീമുകള്‍ നേരത്തെയെത്തിയിരുന്നു.
രാജസ്ഥാന്‍ റോയല്‍സ്, കിങ്സ് ഇലവന്‍ പഞ്ചാബ് ടീമുകളാണ് ആദ്യം യു.എ.ഇയിലെത്തിയത്. ബി.സി.സി.ഐയുടെ നിര്‍ദേശ പ്രകാരം 20 നു ശേഷമാണ് ടീമുകള്‍ക്കു യാത്ര തിരിക്കാന്‍ അനുമതി ലഭിച്ചത്. കോവിഡ് പരിശോധന നടത്തി രോഗ ലക്ഷണം ഇല്ലെന്നുറപ്പുള്ളവരെ മാത്രമാണ് കൊണ്ടുപോയത്. ക്വാറന്റൈന്‍ ആദ്യം പൂര്‍ത്തിയാക്കി ആദ്യം പരിശീലനത്തിനൊരുങ്ങാന്‍ രാജസ്ഥാന്‍, പഞ്ചാബ് ടീമുകള്‍ക്കാവും. ഒരു ദിവസം മാത്രം വ്യത്യാസത്തിലാണ് മറ്റ് ടീമുകള്‍ യു.എ.ഇയിലെത്തിയത്്. അവസാനക്കാരായാണ് ഡല്‍ഹി ക്യാപിറ്റല്‍സും സണ്‍റൈസേഴ്സ് ഹൈദരാബാദും എത്തിയത്.
ഇന്ത്യ വിടുന്നതിന് മുമ്പ് എം.എസ്. ധോണി നായകനായ ചെന്നൈ സൂപ്പര്‍ കിങ്സ് എം.എ. ചിദംബരം സ്റ്റേഡിയത്തില്‍ അഞ്ച് ദിവസത്തെ മിനി ക്യാമ്പ് സംഘടിപ്പിച്ചിരുന്നു. നിലവില്‍ ഇന്ത്യന്‍ താരങ്ങളും പരിശീലകരും മാത്രമാണ് എത്തിയത്. പ്രമുഖ വിദേശ താരങ്ങളെല്ലാം ടൂര്‍ണമെന്റിന്റെ ആരംഭത്തിനോടടുത്ത് മാത്രമെയെത്തു.
ഓസ്ട്രേലിയന്‍ ടീം ഇന്നലെ ഇംഗ്ലണ്ടിലേക്കു യാത്ര തുടങ്ങി. ഓസ്ട്രേലിയയും ഇംഗ്ലണ്ടും തമ്മില്‍ സെപ്റ്റംബര്‍ നാല് മുതല്‍ 10 വരെ പരമ്പര കളിക്കുന്നുണ്ട്. ഇതിനു ശേഷമാണ് ഇരു ടീമിലേയും താരങ്ങള്‍ ഐ.പി.എല്ലില്‍ കളിക്കാനെത്തുക ദക്ഷിണാഫ്രിക്കന്‍ ക്രിക്കറ്റ് താരങ്ങളായ എ.ബി. ഡിവിലിയേഴ്സ്, ഡെയ്ല്‍ സ്റ്റെയിന്‍, ക്രിസ് മോറിസ് എന്നിവര്‍ യു.എ.ഇയിലെത്തി. ബാംഗ്ലൂര്‍ റോയല്‍ ചലഞ്ചേഴ്സിന്റെ താരങ്ങളാണു മൂവരും.
സെപ്റ്റംബര്‍ 19-ന്് തുടങ്ങുന്ന ഐ.പി.എല്‍. 13-ാം സീസണിനു മുന്നോടിയായി റോയല്‍ ചലഞ്ചേഴ്സ് താരങ്ങള്‍ മൂന്നാഴ്ചത്തെ പരിശീലന ക്യാമ്പ് നടത്തും. റോയല്‍ ചലഞ്ചേഴ്സിന്റെ 40 അംഗ സംഘമാണു യു.എ.ഇയിലെത്തിയത്. 21 താരങ്ങളും 14 സപ്പോര്‍ട്ട് സ്റ്റാഫും സംഘത്തിലുണ്ട്. നെറ്റ് ബൗളര്‍മാരായ അമാന്‍ കുമാര്‍, ചേതന്‍ സകാരിയ, പ്രവീണ്‍ ദുബെ, ആദിത്യ താക്കറെ, സുശാന്ത് മിശ്ര എന്നിവരും റോയല്‍ ചലഞ്ചേഴ്സ് സംഘത്തിലുണ്ട്. ആറു ദിവസത്തെ ഏകാന്ത വാസത്തിനു ശേഷമായിരിക്കും പരിശീലനം തുടങ്ങുക.
സെപ്റ്റംബര്‍ 19 നാണ് ഐ.പി.എല്‍. ആരംഭിക്കുക. 60 മത്സരങ്ങള്‍ നീണ്ടുനില്‍ക്കുന്ന ടൂര്‍ണമെന്റ് നവംബര്‍ 10 ന് അവസാനിക്കും. മുംബൈ ഇന്ത്യന്‍സാണ് നിലവിലെ ചാമ്പ്യന്മാര്‍. വൈറസ് ബാധയുടെ പശ്ചാത്തലത്തില്‍ താരങ്ങളെ ബയോ ബബിള്‍ സുരക്ഷാ മേഖലയിലാണ് താമസിപ്പിക്കുന്നത്.
https://www.facebook.com/Malayalivartha
