ഈ മനോഹര ചിത്രത്തിന് ഒരു ക്യാപ്ഷൻ പറയാമോ’ എന്ന ചോദ്യവുമായി ഓസ്ട്രേലിയൻ ക്രിക്കറ്റ് താരം ഡേവിഡ് വാർണർ തന്റെ ഇൻസ്റ്റഗ്രാമിൽ പങ്കുവച്ച ചിത്രം ഏറെ പ്രേക്ഷകശ്രദ്ധ പിടിച്ചുപറ്റുകയുണ്ടായി. ഒപ്പം അതിനായി ക്യാപ്ഷൻ നൽകുന്ന തിരക്കിലായിരുന്നു ഇന്നലെ ആരാധകർ.

പിരിച്ചുവച്ച കൊമ്പൻ മീശയും നെറ്റിയിൽ നീട്ടിവരച്ച ഭസ്മക്കുറിയും ചുവന്ന പൊട്ടും കഴുത്തിൽ കോർത്തിട്ട ഏലസ്സും ഒപ്പം സലാം പറയുന്ന കൈയും– ‘പക്കാ ദക്ഷിണേന്ത്യൻ യുവാവിന്റെ’ രൂപത്തിൽ ഡേവിഡ് വാർണറെ വരച്ച് തരംഗം സൃഷ്ടിച്ച് ഒരു മലയാളി യുവാവ്– പാലക്കാട് സ്വദേശിയായ ആർട്ടിസ്റ്റ് ലിജേഷ് വണ്ടാഴി.

ഫ്രീലാൻസ് ആർട്ടിസ്റ്റായ ലിജേഷ് തന്റെ ഇൻസ്റ്റഗ്രാം അക്കൗണ്ടിൽ വാർണറെയും സൺറൈസേഴ്സ് ഹൈദരാബാദിനെയും ടാഗ് ചെയ്തുകൊണ്ടു പങ്കുവച്ച ചിത്രമാണ് വാർണർ ഏറ്റെടുത്തത്. ‘വണക്കം ഡാ മാപ്പിളേ’ എന്ന ഹിറ്റ് ഡയലോഗിനുടമയായ തമിഴ്നാട്ടിലെ തേനിയിൽ നിന്നുള്ള ടിക്ടോക് താരം അരുൺ കുമാറിനെ മാതൃകയാക്കിയാണ് വാർണറെ ലിജേഷ് പകർത്തിയത്.