ഇന്ത്യയുടെ എക്കാലത്തെയും മികച്ച ക്യാപ്‌റ്റനാണ് മഹേന്ദ്ര സിങ് ധോണി. ക്യാപ്‌റ്റന്‍ സ്ഥാനത്തു നിന്ന് ഒഴിഞ്ഞ ശേഷവും ഇന്ത്യന്‍ ടീമില്‍ അവിഭാജ്യ ഘടകമായിരുന്നു ധോണി. ഇപ്പോഴത്തെ നായകന്‍ വിരാട് കോഹ്‌ലിക്ക് അത്രയേറെ പിന്തുണ ധോണി നല്‍കിയിട്ടുണ്ട്. പല വേദികളിലും കോഹ്‌ലി അത് തുറന്നുപറഞ്ഞിട്ടുമുണ്ട്. ധോണിയുടെ അനുഭവസമ്ബത്ത് കോഹ്‌ലിക്കും ഗുണം ചെയ്‌തിട്ടുണ്ട്.

ഓസ്‌ട്രേലിയക്കെതിരായ രണ്ടാം ടി 20 മത്സരത്തിനിടെ താന്‍ എത്രത്തോളം ധോണിയെ മിസ് ചെയ്യുന്നുണ്ടെന്ന് കോഹ്‌ലി പരസ്യമാക്കി. ഈ വീഡിയോയാണ് കഴിഞ്ഞ രണ്ട് ദിവസമാണ് സോഷ്യല്‍ മീഡിയയില്‍ ശ്രദ്ധയാകര്‍ഷിച്ചിരിക്കുന്നത്. മത്സരം കാണാനെത്തിയ ഇന്ത്യന്‍ ആരാധകര്‍ 'വി മിസ് യൂ ധോണി' എന്നെഴുതിയ പോസ്റ്ററുകള്‍ ഉയര്‍ത്തിയിരുന്നു

ഫീല്‍ഡ് ചെയ്യുകയായിരുന്ന കോഹ്‌ലി കാണുംവിധം ആരാധകര്‍ ഈ പോസ്റ്റര്‍ പല തവണ ഉയര്‍ത്തി. ഇതു ശ്രദ്ധയില്‍പ്പെട്ട കോഹ്‌ലിയുടെ പ്രതികരണം ഏറെ സ്‌നേഹനിര്‍ഭരമായിരുന്നു. 'വി മിസ് യൂ ധോണി' എന്ന പോസ്റ്റര്‍ ഉയര്‍ത്തിപ്പിടിച്ചുനില്‍ക്കുന്ന ആരാധകരെ നോക്കി കോഹ്‌ലി പറഞ്ഞു, 'ഞാനും അദ്ദേഹത്തെ മിസ് ചെയ്യുന്നു,' ആംഗ്യഭാഷയിലായിരുന്നു കോഹ്‌ലിയുടെ പ്രതികരണം.

ധോണിക്ക് ശേഷം ഇന്ത്യന്‍ നായക സ്ഥാനം ഏറ്റെടുത്ത താരമാണ് കോഹ്‌ലി. 2019 ക്രിക്കറ്റ് ലോകകപ്പില്‍ കോഹ്‌ലിയാണ് ഇന്ത്യയെ നയിച്ചത്. അന്ന് ധോണിയും ഇന്ത്യന്‍ ടീമില്‍ ഉണ്ടായിരുന്നു. ഇരുവരുടെയും ആത്മബന്ധം ഏറെ സുദൃഢമാണ്. ധോണിയുമായി തനിക്കുള്ള സുഹൃദ്‌ബന്ധത്തെ കുറിച്ച്‌ കോഹ്‌ലി പലപ്പോഴും പങ്കുവച്ചിട്ടുണ്ട്.