ആസ്‌ട്രേലിയയുടെ എക്കാലത്തേയും മികച്ച ക്യാപ്‌റ്റന്മാരില്‍ ഒരാളായ റിക്കി പോണ്ടിംഗിന്റെ വിടവാങ്ങല്‍ മത്സരം ഏറെ പ്രതീക്ഷയോടെയാണ്‌ ആരാധകര്‍ കണ്ടത്‌. എന്നാല്‍ എല്ലാവരേയും നിരാശരാക്കിയ പ്രകടനമായിരുന്നു പോണ്ടിംഗിന്റെ അവസാന മത്സരം. മൂന്നാം മത്സരത്തിന്റെ ആദ്യ ഇന്നിംഗ്‌സില്‍ നാല്‌ റണ്‍സാണ്‌ പോണ്ടിംഗ്‌ എടുത്തത്‌. രണ്ടാം ഇന്നിംഗ്‌സിലാവട്ടെ എട്ടു റണ്‍സിനും പുറത്തായി. പെര്‍ത്തിലെ ദക്ഷിണാഫ്രിക്കക്കെതിരായ മൂന്നാം മത്സരത്തിനു ശേഷം വിടവാങ്ങുമെന്ന്‌ പോണ്ടിംഗ്‌ നേരത്തെ പ്രഖ്യാപിച്ചിരുന്നു.
ഏതൊരു സാഹചര്യത്തിലും ടീമിനെ ജയിപ്പിക്കാന്‍ കഴിവുള്ള അപൂര്‍വ്വം ക്യാപ്‌റ്റന്‍മാരില്‍ ഒരാളാണ്‌ റിക്കി പോണ്ടിംഗ്‌. ടെസ്റ്റ്‌ ക്രിക്കറ്റല്‍ ആസ്‌ട്രേലിയക്ക്‌ വേണ്ടി ഏറ്റവും കൂടുതല്‍ റണ്‍സെടുത്ത താരവും പോണ്ടിംഗ്‌ തന്നെ. ആസ്‌ട്രലിയക്ക്‌ വേണ്ടി ഏറ്റവും കൂടുതല്‍ തവണ ജേഴ്സിയണിഞ്ഞ താരമെന്ന റെക്കോഡിനൊപ്പവും പോണ്ടിംഗ്‌ എത്തി. രണ്ട്‌ തവണ ലോകകപ്പും രാജ്യത്തിന്‌ നേടിക്കൊടുത്തു. മോശം ഫോം റിക്കിയെ കുറേനാളായി വേട്ടയാടുന്നുണ്ടായിരുന്നു. ഒരു തിരിച്ചു വരവ്‌ പ്രതീക്ഷിച്ചിരിക്കുകയായിരുന്നു ആരാധകര്‍. എന്നാല്‍ റിക്കി വിടവാങ്ങുകയാണ്‌ മനസ്സില്‍ അല്‌പം വേദനയോടെ...