ന്യൂസിലാന്‍ഡിനെതിരായ ട്വന്റി20 പരമ്പരയിലെ അവസാന മത്സരത്തില്‍ ഇന്ത്യയ്ക്ക് ടോസ്. ടോസ് നേടിയ ഇന്ത്യന്‍ നായകന്‍ സൂര്യകുമാര്‍ യാദവ് ബാറ്റിംഗ് തിരഞ്ഞെടുക്കുകയായിരുന്നു. മലയാളി ക്രിക്കറ്റ് ആരാധകരെ സംബന്ധിച്ചിടത്തോളം വാനോളമാണ് ആവേശം. സ്വന്തം തട്ടകമായ കാര്യവട്ടത്ത് ആദ്യമായി ഒരു രാജ്യാന്തര മത്സരം കളിക്കാന്‍ സഞ്ജു സാംസണ്‍ ഇറങ്ങുന്നു എന്നതുതന്നെയാണ് ഇന്നത്തെ പ്രധാന സവിശേഷത. മത്സരം സഞ്ജുവിനെ സംബന്ധിച്ച് അതിനിര്‍ണായകമാണ്.

പരമ്പരയില്‍ ഇതുവരെ ഫോം കണ്ടെത്താന്‍ പ്രയാസപ്പെട്ട സഞ്ജുവിന് വരാനിരിക്കുന്ന ലോകകപ്പ് ടീമില്‍ ഇടം പിടിക്കണമെങ്കില്‍ ഇന്ന് വെടിക്കെട്ട് പ്രകടനം അനിവാര്യമാണ്. ഹോം ഗ്രൗണ്ടിലെ കാണികളുടെ പിന്തുണയോടെ താരം ഫോമിലേക്ക് തിരിച്ചെത്തുമെന്ന പ്രതീക്ഷയിലാണ് ക്രിക്കറ്റ് ലോകം. ആദ്യ മൂന്ന് മത്സരങ്ങളും ആധികാരികമായി ജയിച്ച് ഇന്ത്യ പരമ്പര ഉറപ്പിച്ചിരുന്നു. എന്നാല്‍ വിശാഖപട്ടണത്ത് നടന്ന നാലാം ടി20യില്‍ ശക്തമായി തിരിച്ചടിച്ച ന്യൂസിലാന്‍ഡ് വിജയം സ്വന്തമാക്കി. അവസാന മത്സരത്തിലും വിജയം ആവര്‍ത്തിച്ച് തലയുയര്‍ത്തി മടങ്ങാനാണ് കിവീസിന്റെ ശ്രമം.

പരമ്പര സ്വന്തമാക്കിയെങ്കിലും ലോകകപ്പിന് മുന്നോടിയായുള്ള അവസാന ഘട്ട പരീക്ഷണങ്ങള്‍ എന്ന നിലയില്‍ ഇരു ടീമുകള്‍ക്കും ഇന്നത്തെ പ്രകടനം നിര്‍ണായകമാണ്. കേരളത്തിന്റെ സ്വന്തം മണ്ണില്‍ സഞ്ജു സാംസണ്‍ സിക്‌സര്‍ മഴ തീര്‍ക്കുമോ എന്നാണ് ആരാധകര്‍ ഉറ്റുനോക്കുന്നത്.