ശ്രീലങ്ക എ വനിതാ ടീമിനെ തകർത്തെറിഞ്ഞ് ഇന്ത്യ എ വനിതാ ടീം വനിതാ ഏഷ്യാ കപ്പ് റൈസിങ് സ്റ്റാർസ് ടി20 പോരാട്ടത്തിന്റെ ഫൈനലിൽ. സെമിയിൽ 5 വിക്കറ്റിന്റെ ജയം സ്വന്തമാക്കിയാണ് ഇന്ത്യൻ വനിതകൾ കലാശപ്പോരിലേക്ക് കുതിച്ചെത്തിയത്.

രണ്ടാം സെമിയിൽ ബം​ഗ്ലാദേശ്- പാകിസ്ഥാൻ പോരാട്ടം. ഇതിൽ ജയിക്കുന്ന ടീം ഫൈനലിൽ ഇന്ത്യയുടെ എതിരാളികളായിരിക്കും. ആദ്യം ബാറ്റ് ചെയ്ത ശ്രീലങ്കയെ 19.4 ഓവറിൽ 118 റൺസിനു പുറത്താക്കാനായി ഇന്ത്യക്കു കഴിഞ്ഞു. വിജയ ലക്ഷ്യമായ 119 റൺസ് ഇന്ത്യ വെറും 13.3 ഓവറിൽ 5 വിക്കറ്റ് മാത്രം നഷ്ടപ്പെടുത്തി അടിച്ചെടുത്തു.

ഇന്ത്യക്കായി ഓപ്പണർ ദിനേഷ് വൃന്ദ 42 റൺസെടുത്ത് ടോപ് സ്‌കോററായി. താരം 20 പന്തിൽ 8 ഫോറുകൾ സഹിതമാണ് അതിവേഗം റൺസടിച്ചത്. അനുഷ്‌ക ശർമ 18 പന്തിൽ 5 ഫോറുകൾ സഹിതം 27 റൺസും കണ്ടെത്തി. ശ്രീലങ്കയുടെ ബാറ്റിങ് സമയത്ത് ബൗളിങിൽ തിളങ്ങിയ ക്യാപ്റ്റൻ രാധ യാദവ് ബാറ്റിങിലും മികവ് പുലർത്തി ജയത്തിൽ നിർണായക പങ്ക് വഹിച്ചു.

ക്യാപ്റ്റൻ പുറത്താകാതെ 18 പന്തിൽ 7 ഫോറുകൾ സഹിതം 31 റൺസ് അടിച്ചെടുത്തു. മലയാളി താരം മിന്നു മണി 2 റൺസുമായി റണ്ണൗട്ടായി മടങ്ങി. നേരത്തെ 3.4 ഓവറിൽ 19 റൺസ് മാത്രം വഴങ്ങി 4 വിക്കറ്റുകൾ വീഴ്ത്തി രാധ യാദവ് ഇന്ത്യൻ ടീമിനെ മുന്നിൽ നിന്നു നയിച്ചതോടെയാണ് ലങ്കൻ വനിതകൾ 118ൽ ഒതുങ്ങിയത്. തനുജ കൻവാർ, പ്രേമ റാവത്ത് എന്നിവർ രണ്ട് വീതം വിക്കറ്റുകൾ വീഴ്ത്തി. ശേഷിച്ച രണ്ട് വിക്കറ്റുകൾ മിന്നു മണി, സയ്മ ഠാക്കൂർ എന്നിവർ പങ്കിട്ടു.ലങ്കൻ നിരയിൽ നാല് താരങ്ങൾ മാത്രമാണ് രണ്ടക്കം കടക്കാനായത്.