2022 ഖത്തര്‍ ലോകകപ്പിനുള്ള ആവേശകരമായ യോഗ്യത പോരാട്ടത്തില്‍ എക്വഡോറിനെ എതിരില്ലാത്ത രണ്ടു ഗോളിന് വീഴ്ത്തി ബ്രസീല്‍. റിച്ചാര്‍ലിസണ്‍ തുടക്കമിട്ട ഗോള്‍വേട്ട പി.എസ്.ജി താരം നെയ്മര്‍ പെനാല്‍റ്റിയിലൂടെ പൂര്‍ത്തിയാക്കി.

അഞ്ചു യോഗ്യത മത്സരങ്ങളില്‍ അഞ്ചും ജയിച്ച ബ്രസീലിന് ഇതോടെ ഒന്നാം സ്ഥാനത്ത് 15 പോയിന്‍േറാടെ അജയ്യ ലീഡായി. 10 ടീമുകളുള്ള ഗ്രൂപില്‍ രണ്ടാമതുള്ള അര്‍ജന്റീനക്ക് സമ്ബാദ്യം 11 പോയിന്റാണ്.

വ്യാഴാഴ്ച നീലക്കുപ്പായക്കാര്‍ ചിലിയോട് 1-1ന് സമനിലയില്‍ കുരുങ്ങിയിരുന്നു. ബ്രസീലിന് മുന്നില്‍ തലകുനിച്ച എക്വഡോറാണ് മൂന്നാമത്- ഒമ്ബതു പോയിന്റ്. ഗോളൊഴിഞ്ഞ ആദ്യ പകുതിക്കു ശേഷം 65ാം മിനിറ്റില്‍ ഗോളിയെ കാഴ്ചക്കാരനാക്കി റിച്ചാര്‍ലിസണ്‍ ഗോളിലേക്ക് നിറയൊഴിക്കുകയായിരുന്നു.

അവസാന വിസിലിന് മിനിറ്റുകള്‍ ശേഷിക്കെ പെനാല്‍റ്റി ബോക്‌സില്‍ ഗബ്രിയേല്‍ ജീസസിനെ വീഴ്ത്തിയതിന് ലഭിച്ച പെനാല്‍റ്റി നെയ്മര്‍ ഗോളാക്കി ജയം ഉറപ്പിച്ചു. ജൂണ്‍ എട്ടിന് പാരഗ്വായ്‌ക്കെതിരെയാണ് ബ്രസീലിന്റെ അടുത്ത മത്സരം. എക്വഡോര്‍ പെറുവിനെയും നേരിടും.