ബാഴ്‌സയുമായുള്ള മെസ്സിയുടെ കരാര്‍ ഇന്ന് അവസാനിക്കും... മെസ്സി തുടരുമോ ആകാംക്ഷയോടെ ആരാധകര്‍; ബാഴ്‌സമായി പുതിയ കരാറില്‍ മെസ്സി ഒപ്പു വച്ചതായി സൂചന, പ്രഖ്യാപനം ഉടന്‍ ഉണ്ടായേക്കും; പുതിയ ക്ലബ് പ്രസിഡന്റില്‍ മെസ്സി തൃപ്തന്‍
കുറച്ച് നാളുകളായിയുള്ള ചോദ്യമാണ്. പക്ഷേ വീണ്ടും ചോദ്യത്തിന്റെ ആരവം ഉയര്‍ന്നു കേള്‍ക്കുകയാണ്. ലയണല്‍ മെസ്സി തുടരുമോ? സ്പാനിഷ് ക്ലബ്ബ് ബാഴ്‌സലോണയുമായിയുള്ള മെസ്സിയുടെ കരാര്‍ ഇന്ന് അവസാനിക്കുകയാണ്. ഈ സാഹചര്യത്തിലാണ് ആരാധകരുടെ ആകാംക്ഷ വര്‍ധിച്ചിരിക്കുന്നത്. കഴിഞ്ഞ സീസണില്‍ ബാഴ്‌സ വിടാനുള്ള താത്പര്യം പ്രകടിപ്പിച്ച മെസ്സി പിന്നീട് ക്ലബ്ബുമായി പുതിയര്‍ കരാറില്‍ ഒപ്പുവെച്ചിട്ടില്ല.
എന്നാല്‍ 10 വര്‍ഷത്തേക്കുള്ള പുതിയൊരു കരാര്‍ മെസ്സിക്കു ബാര്‍സ നല്‍കിയതായി സ്ഥിരീകരിക്കാത്ത റിപ്പോര്‍ട്ടുണ്ട്. ഇത് സംബന്ധിച്ച് പ്രഖ്യാപനം ഉടന്‍ ഉണ്ടാകുമെന്നും റിപ്പോര്‍ട്ടുകളുണ്ട്. മുന്‍ പ്രസിഡന്റ് ജോസഫ് മരിയ ബര്‍തോമ്യുവുമായുള്ള അഭിപ്രായ വ്യത്യാസത്തിന്റെ പേരില്‍ ബാഴ്‌സ വിടാനൊരുങ്ങിയ മെസ്സി പുതിയ പ്രസിഡന്റ് ജോന്‍ ലാപോര്‍ട്ടയില്‍ തൃപ്തനാണെന്നും അതിനാല്‍ ബാഴ്‌സയില്‍ തുടരാനാണ് സാധ്യതയെന്നും റിപ്പോര്‍ട്ടില്‍ പറയുന്നു.
എന്നാല്‍ കോപ്പ അമേരിക്ക ചാമ്പ്യന്‍ഷിപ്പില്‍ കളിക്കാന്‍ അര്‍ജന്റീന ടീമിനൊപ്പം ഇപ്പോള്‍ ബ്രസീലിലുള്ള മെസ്സി ഇതേക്കുറിച്ച് പ്രതികരിച്ചിട്ടില്ല. മെംഫിസ് ഡീപായ്, എറിക് ഗാര്‍ഷ്യ, എമേഴ്‌സന്‍ റോയല്‍ എന്നിവര്‍ക്കു പുറമേ മെസ്സിയുടെ ചിരകാലസുഹൃത്തായ മുന്‍ മാഞ്ചസ്റ്റര്‍ സിറ്റി താരം സെര്‍ജിയോ അഗ്യൂറോ കൂടി അടുത്ത സീസണില്‍ ബാര്‍സയില്‍ കളിക്കാന്‍ കരാര്‍ ഒപ്പിട്ടിട്ടുണ്ട്. ഈ സാഹചര്യത്തില്‍ മെസ്സി ബാഴ്‌സ വിടില്ലെന്ന പ്രതീക്ഷയിലാണ് ആരാധകര്‍.
പ്രതിവാരം ഏകദേശം ആറു കോടി രൂപയാണ് മെസ്സിക്ക് ബാഴ്‌സ നല്‍കുന്ന പ്രതിഫലം. 13-ാം വയസ്സില്‍ ബാഴ്‌സയുടെ ഫുട്ബോള് നഴ്‌സറി ആയ ലാ മാസിയയില്‍ കരിയര്‍ തുടങ്ങിയ മെസ്സിയുടെ ഹൃദയം പോലെയാണ് ന്യൂകാംപ് സ്റ്റേഡിയം. കുറച്ചു വര്‍ഷം കൂടി ബാര്‍സയില്‍ കളിച്ച ശേഷം യുഎസിലെ മേജര്‍ സോക്കര്‍ ലീഗിലേക്കു മെസ്സിക്കു പോകാം. ക്ലബ് ഫുട്‌ബോളില്‍നിന്നു വിരമിച്ച ശേഷം ബാര്‍സയുടെ ഭരണസാരഥ്യത്തിലേക്കു തിരികെ വരുന്ന വിധത്തിലാണു കരാര്‍ എന്നാണു സൂചന.
https://www.facebook.com/Malayalivartha
