ചാമ്പ്യന്സ് ലീഗില് ക്വാര്ട്ടര് കാണാതെ യുവന്റസ് പുറത്ത്
ചാമ്പ്യന്സ് ലീഗില് പോര്ട്ടോ ഉയര്ത്തിയ വന് വെല്ലുവിളി മറികടക്കാന് യുവന്റസിനായില്ല. ചാമ്പ്യന്സ് ലീഗില് ക്വാര്ട്ടര് കാണാതെ യുവന്റസ് പുറത്തായി.
ആദ്യ പാദത്തിലെ 1-2ന്റെ പരാജയം മറികടക്കേണ്ടിയിരുന്ന യുവന്റസ് ഇന്ന് 3-2ന്റെ വിജയം നേടി എങ്കിലും എവേ ഗോള് ബലത്തില് പോര്ട്ടോ ക്വാര്ട്ടറില് കടക്കുകയായിരുന്നു. അഗ്രിഗേറ്റ് സ്കോര് 4-4 എന്ന രീതിയിലാണ് ടൈ അവസാനിച്ചത്. 19ാം മിനിറ്റില് ഒരു പെനാല്റ്റിയാണ് പോര്ട്ടോയ്ക്ക് ലീഡ് നല്കിയത്.
സെര്ജിയോ ഒലിവേരയാണ് പെനാള്ട്ടി ലക്ഷ്യത്തില് എത്തിച്ചത്. എങ്കിലും പതറാതെ കളിച്ച യുവന്റസ് പതിയെ കളിയിലേക്ക് തിരികെ വന്നു. രണ്ടാം പകുതിയുടെ തുടക്കത്തില് 49-ാം മിനിറ്റില് കിയേസയുടെ വക ആയിരുന്നു യുവന്റസിന്റെ ആദ്യ ഗോള്.
ക്രിസ്റ്റ്യാനോ റൊണാള്ഡോയുടെ അസിസ്റ്റില് നിന്ന് മനോഹര ഫിനിഷിലൂടെ ആയിരുന്നു കിയേസയുടെ ഗോള്. 54ാം മിനിറ്റില് പോര്ട്ടോയുടെ മെഹ്ദി തരാമി ചുവപ്പ് വാങ്ങി. രണ്ട് മിനിറ്റിനിടയില് രണ്ട് മഞ്ഞ കാര്ഡുകള് വാങ്ങിയാണ് മെഹ്ദി പുറത്ത് പോയത്. പത്തു പേരായി ചുരുങ്ങിയ ടീമിനു മേല് യുവന്റസ് കൂടുതല് ആധിപത്യം സ്ഥാപിച്ചു.
63-ാം മിനിറ്റില് കിയേസയുടെ രണ്ടാം ഗോള് വന്നു. കൊഡ്രാഡോയുടെ ക്രോസില് നിന്നായുരുന്നു കിയേസയുടെ ഹെഡര്. കിയേസയുടെ ഈ സീസണ് ചാമ്പ്യന്സ് ലീഗിലെ നാലാം ഗോളായിരുന്നു ഇത്. ഈ ഗോളോടെ അഗ്രിഗേറ്റ് സ്കോര് 3-3 ആയി.
പത്തു പേരുമായി നന്നായി ഡിഫന്ഡ് ചെയ്ത പോര്ട്ടോ കളി എക്സ്ട്രാ ടൈമില് എത്തിച്ചു. 115-ാം മിനിറ്റില് ഒലിവേര ഒരു ഫ്രീകിക്കിലൂടെ പോര്ട്ടോയുടെ രണ്ടാം ഗോള് നേടിയതോടെ യുവന്റസിന്റെ പ്രതീക്ഷകള് അവസാനിച്ചു. അവസാനം 117-ാം മിനിറ്റില് റാബിയോ ഗോള് നേടി യുവന്റസിന്റെ വിജയം ഉറപ്പിച്ചു എങ്കിലും അവര്ക്ക് ക്വാര്ട്ടര് ഉറപ്പിക്കാന് ആയില്ല.
https://www.facebook.com/Malayalivartha