ലോസാന്‍ ഡയമണ്ട് ലീഗ് അത്‌ലറ്റിക്‌സ് ജാവലിന്‍ ത്രോയില്‍ രണ്ടാം സ്ഥാനവുമായി നീരജ് ചോപ്ര. സീസണിലെ മികച്ച ദൂരം(89.49 മീറ്റര്‍) കരസ്ഥമാക്കിയതോടെ രണ്ടാം സ്ഥാനത്തെത്തി. ഗ്രനഡയുടെ ആന്‍ഡേഴ്‌സണ്‍ പീറ്റേഴ്‌സ് മീറ്റ് റെക്കോഡോടെ ( 90.61 മീറ്റര്‍) ഒന്നാം സ്ഥാനം നേടി.


ജര്‍മനിയുടെ ജൂലിയന്‍ വെബര്‍ (87.08) മൂന്നാമതായി. തുടക്കത്തില്‍ തന്നെ ഫോം കണ്ടെത്താനായി വിഷമിച്ച നീരജ് ആറാമത്തെ ഏറിലാണ് പാരീസ് ഒളിമ്പിക്‌സില്‍ വെള്ളിനേടിയ ദൂരം (89.45) മെച്ചപ്പെടുത്തി രണ്ടാമതെത്തിയത്. സീസണിലെ താരത്തിന്റെ മികച്ച പ്രകടനം.

എങ്കിലും ഇപ്പോഴും 90 മീറ്റര്‍ എന്നത് നീരജിന് മുന്നില്‍ പിടികൊടുക്കാതെ നില്‍ക്കുകയാണ്. ആദ്യ അഞ്ച് ശ്രമങ്ങളില്‍ 82.10, 83.21, 83.13, 82.34, 85.58 എന്നിങ്ങനെയായിരുന്നു ഇന്ത്യന്‍ താരത്തിന്റെ പ്രകടമായിരുന്നത്. ദോഹ ഡയമണ്ട് ലീഗിലും (88.36) നീരജ് ഇത്തവണ രണ്ടാമതെത്തിയിട്ടുണ്ടായിരുന്നു.