എം.എസ് ധോണിയുടെ ചിത്രം ട്വിറ്ററില്‍ എമിറേറ്റ്‌സ് തെറ്റിച്ചു നല്‍കി; എമിറേറ്റ്‌സിനെ ട്രോളിയ വീരുവിന് പിഴച്ചു!
ക്രിക്കറ്റില്‍ നിന്നും വിരമിച്ച വീരേന്ദര്‍ സേവാഗ് എന്ന വീരു ഇപ്പോള്‍ ട്വിറ്ററിലൂടെയാണ് തലങ്ങും വിലങ്ങും ബൗണ്ടറി പായിക്കുന്നത്. അതിന്റെ ചൂടറിഞ്ഞിട്ടുള്ളവരാണ് ഇംഗ്ലണ്ടിന്റെ പിയേഴ്‌സ് മോര്‍ഗന്‍ ഉള്‍പ്പെടെ അനവധിപേര്‍.
ഇപ്പോഴിതാ ധോണി ക്യാപ്റ്റന്‍ സ്ഥാനം ഒഴിഞ്ഞതോടെ വാര്‍ത്ത നല്‍കിയ എമിറേറ്റ്‌സിന്റെ ഓണ്‍ലൈന്‍ വെബ് പോര്‍ട്ടലിന് ഫോട്ടോ മാറി നല്‍കി അബദ്ധം പിണഞ്ഞതിനെ ട്രോളിയിരിക്കുകയാണ് സേവാഗ്.
എന്നാല്‍ ട്രോളിയ വീരുവിനാണ് തിരിച്ച് പണി കിട്ടിയത്. ധോണിയുടെ ചിത്രത്തിന് പകരം എമിറേറ്റ്‌സ് നല്‍കിയത് ബോളിവുഡ് സിനിമയില്‍ ധോണിയായി അഭിനയിച്ച സുഷാന്ത് സിംഗ് രജ്പുതിന്റെ ഫോട്ടോ ആയിരുന്നു.
ഇതിനെ ട്രോളാന്‍ ശ്രമിച്ച വീരുവിന് പക്ഷെ ആദ്യ പന്തിലേ പിഴച്ചു. തന്റെ രൂപസാദൃശ്യമുള്ള ഒരാളുടെ ഫോട്ടോയൊക്കെ ഇട്ടു ഗംഭീര അടിക്കുറിപ്പും എഴുതി വീരു ട്വീറ്റ് ചെയ്‌തെങ്കിലും ടാഗിംഗില്‍ പിഴച്ചുപോയി.
എമിറേറ്റ്‌സ് ന്യൂസ് പോര്‍ട്ടലിന് പകരം എമിറേറ്റ്‌സ് എയര്‍ലൈന്‍സിനെയാണ് വീരു ട്രോളിയത്.
വീരുവിന് മറുപടിയുമായി എമിറേറ്റ്‌സ് എയര്‍ലൈന്‍സ് രംഗത്തുവരിക കൂടി ചെയ്തതോടെ സംഗതി കൊഴുത്തു.
എന്നാല്‍ അബദ്ധം മനസിലായതുകൊണ്ടാകാം, എമിറേറ്റ്‌സ് എയര്‍ലൈന്‍സിന്റെ ട്വീറ്റിന് വീരു ഇതുവരെ മറുപടി നല്‍കിയിട്ടില്ല.
https://www.facebook.com/Malayalivartha
