തിളങ്ങും ബനാറസ് മാലകള്‍
പൊന്നുംകുടത്തിന് പൊട്ടു വേണോയെന്ന് ചോദിക്കുമെങ്കിലും പൊന്നിന്‍കുടത്തിനെ സുന്ദരമാക്കാനായി നമ്മളൊരു പൊട്ടും കൂടി തൊട്ടുവെക്കും. ബനാറസ് സ്‌റ്റോണ്‍ മാലകള്‍ ഇങ്ങനെ ചാര്‍ത്തപ്പെടുന്ന പൊട്ടുകളാണിപ്പോള്‍.
ബനാറസ് മാലകള്‍ സ്ത്രീകളുടെ \'സിഗ്‌നേച്ചര്‍ മാല\'കളായി മാറിക്കഴിഞ്ഞു. നിറമോവെട്ടിത്തിളക്കമോ പോകാത്ത ഈ സ്‌റ്റോണ്‍ മാലകള്‍ പല നിറത്തിലും രൂപത്തിലും നീളത്തിലും പുതിയ വേഷഭൂഷാദികളോടും സാരിയോടും ചേര്‍ന്ന് ഒഴുകിക്കൊണ്ടിരിക്കുന്നു. ടീനേജുകാരികള്‍മുതല്‍ അറുപതുകളിലെത്തി നില്‍ക്കുന്ന പ്രൗഢകള്‍വരെ ഇത്തരം മാലകളുടെ ആരാധകരാണ്.
ഡല്‍ഹിയില്‍ നിന്നാണ് ഈ ബനാറസ് മാലകള്‍ എത്തുന്നത്. ഈ വെട്ടിത്തിളക്കം ബനാറസിന്റെ സ്വന്തമാണ്. നല്ലൊരു പട്ടുസാരിയുടുത്ത് ഗമയിലെത്തുമ്പോള്‍ കഴുത്തില്‍ പഴയപോലെ പാലയ്ക്കയോ കാശടുക്കോ ഒന്നുമല്ല. നിരനിരയായി അടുക്കിയ നൂലിഴമുത്തുകളുടെ ഇടയ്ക്ക് വന്‍ലോക്കറ്റുകളുമായി ഈ ബനാറസ് മാലകളാണ് ഇപ്പോള്‍ കാഴ്ച. ജീന്‍സ്, മിഡി ടോപ്പ്, ചുരിദാര്‍ എന്നിവയ്ക്കും എല്ലാത്തരം സാരികള്‍ക്കും ഇണങ്ങുന്ന വിവിധതരം ഗ്ലാസ് സ്‌റ്റോണ്‍ മാലകളും വിപണിയില്‍ കിട്ടും. കഴുത്തില്‍ കുടുങ്ങിക്കിടക്കുന്ന നെക്‌ലെസ് സെറ്റിന് ഇയര്‍ റിങ്ങും ഒപ്പം കിട്ടും. നീളം കുറഞ്ഞതും കൂടിയതുമുണ്ട്. കുറഞ്ഞ വില 39 രൂപ, കൂടിയത് 499. ഒരുവശത്തു മാത്രം കല്ലുകള്‍ പതിച്ച വലിയ ലോക്കറ്റുകളുള്ള മാലകള്‍. പ്രത്യേക ഭംഗിയാണവയ്ക്ക്.
https://www.facebook.com/Malayalivartha
