ആഗോള എണ്ണവിപണിയില്‍ വലിയ പ്രത്യാഘാതമുണ്ടാക്കുന്ന സംഘര്‍ഷം തുടര്‍ന്നാല്‍ അസംസ്‌കൃത എണ്ണവില വീപ്പയ്ക്ക് 100 ഡോളറും കടന്നുപോകുമെന്നാണ് കണക്കാക്കുന്നത്.


ഉപയോഗിക്കുന്ന എണ്ണയുടെ 85 ശതമാനംവരെ ഇറക്കുമതി ചെയ്യുന്ന ഇന്ത്യയില്‍ ഇത് വലിയ പ്രതിസന്ധി സൃഷ്ടിക്കാനിടയുണ്ട്. 2021 നവംബര്‍ നാലുമുതല്‍ രാജ്യത്ത് പെട്രോള്‍-ഡീസല്‍ വിലവര്‍ധനയുണ്ടായിട്ടില്ല.

അന്താരാഷ്ട്രവിപണിയില്‍ അസംസ്‌കൃത എണ്ണവില വീപ്പയ്ക്ക് 82-85 ഡോളര്‍വരെ ഉണ്ടായിരുന്ന സമയത്തുള്ള വിലയാണ് ഇപ്പോഴുള്ളത്. ഇന്ത്യന്‍ ബാസ്‌കറ്റില്‍ വീപ്പയ്ക്ക് 93.6 ഡോളറാണ് ഇപ്പോഴത്തെ നിരക്ക്. ഇതനുസരിച്ച് അന്നത്തേതിലും പത്തുഡോളര്‍വരെ വില ഉയര്‍ന്നിട്ടുണ്ട്.

അസംസ്‌കൃത എണ്ണവില ഒരുഡോളര്‍ കൂടുമ്പോള്‍ പെട്രോള്‍-ഡീസല്‍ വില ലിറ്ററിന് 70 മുതല്‍ 80 പൈസവരെ വര്‍ധനയുണ്ടാകാറുണ്ട്. ഇതനുസരിച്ച് ഏഴുമുതല്‍ എട്ടുരൂപവരെയാണ് വര്‍ധിപ്പിക്കേണ്ടത്.

അസംസ്‌കൃത എണ്ണവില 100 ഡോളറിലേക്കെത്തിയാല്‍ പെട്രോള്‍-ഡീസല്‍ വിലയില്‍ 12 മുതല്‍ 14 രൂപവരെ വര്‍ധന വേണ്ടിവരും. ബ്രെന്റ് ക്രൂഡ് ബാരലിന് ബുധനാഴ്ച 96.6 ഡോളര്‍ നിലവാരത്തിലാണുള്ളത്. മാര്‍ച്ച് ഏഴിന് തിരഞ്ഞെടുപ്പ് പൂര്‍ത്തിയാകും. ഇതിനുശേഷം എണ്ണക്കമ്പനികള്‍ തുടര്‍ച്ചയായി വിലവര്‍ധിപ്പിച്ചേക്കും.