ഇന്ത്യയിലെ ടെലികോം ഭീമന്മാരായ റിലയൻസ് ജിയോ 2020 പകുതിയോടെ 5 ജി സേവനങ്ങള്‍ ആരംഭിക്കുമെന്ന് റിപ്പോർട്ടുകൾ. അതേസമയം 2019 അവസാനത്തോടെ 4ജി യെക്കാൾ 50 മുതല്‍ 60 മടങ്ങ് വരെ അധിക ഡൗണ്‍ലോഡ് സ്പീഡ് ലഭിക്കുന്ന കമ്മ്യൂണിക്കേഷൻ ശൃംഖല (എയർ വേവ്സ്) അനുവദിക്കാൻ സർക്കാർ മുൻപ് തീരുമാനിച്ചിരുന്നു.

സ്‌പെക്‌ട്രം വിതരണം പൂര്‍ത്തിയായാല്‍ ഉടന്‍തന്നെ 5 ജി സേവനങ്ങള്‍ ലഭ്യമാക്കുന്നതിന് ആവശ്യമായ എല്‍ടിഇ ശൃംഖല ജിയോയ്ക്ക് ഉണ്ടെന്ന് കമ്പനി അധികൃതര്‍ വ്യക്തമാക്കി.

സ്‌പെക്‌ട്രം ബാന്‍ഡുകളുടെ വിതരണം സുഗമമാക്കുന്ന ഉപകരണങ്ങളുടെ ലഭ്യത, 5 ജി സാങ്കേതികവിദ്യക്കാവശ്യമായ പരിതഃസ്ഥിതിയുടെ അപര്യാപ്തത തുടങ്ങിയവയാണ് ഈ രംഗത്തെ പ്രധാന വെല്ലുവിളികളെന്ന് റിലയന്‍സ് അധികൃതര്‍ പറയുന്നു.

അതേസമയം 3 ജിയില്‍ നിന്ന് 4 ജിയിലേക്കെത്തിയതിനെക്കാള്‍ വേഗത്തില്‍ 4ജിയില്‍ നിന്ന് 5 ജിയിലേക്ക് മാറാനാകുമെന്ന് കരുതുന്നതായി കേന്ദ്ര ടെലികോം മന്ത്രാലയം വ്യക്തമാക്കി. പ്രമുഖ ചിപ്‌സെറ്റ് നിര്‍മാതാക്കളായ യുഎസിലെ ക്വാല്‍കോം, തായ്‌വാനിലെ മീഡിയ ടെക് എന്നിവയാണ് 5 ജിക്ക് ആവശ്യമായ മോഡം വികസിപ്പിക്കുന്നത്.