സാംസങിന്റെ ഏറ്റവും പുതിയ സ്മാര്‍ട്‌ഫോണായ ഗ്യാലക്‌സി നോട്ട് 8 ഇന്ന് ഇന്ത്യയില്‍ അവതരിപ്പിക്കും. കഴിഞ്ഞ മാസം ന്യൂയോര്‍ക്കിലാണ് ഗ്യാലക്‌സി നോട്ട് 8 സ്മാര്‍ട്ട് ഫോണ്‍ ഔദ്യോഗികമായി സാംസങ് അവതരിപ്പിക്കുന്നത്. ഇന്ത്യയില്‍ ഫോണിന്റെ വിലയെത്രയായിരിക്കുമെന്നും വില്‍പനതീയതിയും ഇന്നറിയാം.

വലിയ ഡിസ്‌പ്ലേയും, ഡ്യുവല്‍ റിയര്‍ ക്യാമറയും ഒപ്പം സാംസങിന്റെ ബിക്‌സ്ബി വോയ്‌സ് അസിസ്റ്റന്റും ആണ് ഗാലക്‌സി നോട്ട് 8 ന്റെ പ്രധാന സവിശേഷതകള്‍. കൂടാതെ എസ്‌പെന്‍ സ്‌റ്റൈലസും ഫോണിനൊപ്പമുണ്ട്.

രൂപകല്‍പനയുടെ കാര്യത്തില്‍ സാംസങിന്റെ ഗ്യാലക്‌സി എസ് 8 നോട് സമാനമാണ് ഗ്യാലക്‌സി നോട്ട് 8. 6.3 ഇഞ്ചിന്റെ സൂപ്പര്‍ അമോലെഡ് 1440*2960 പിക്‌സല്‍ കര്‍വ്ഡ് ഗ്ലാസ് ടച്ച് സ്‌ക്രീന്‍ ഡിസ്‌പ്ലേയാണ് ഗ്യാലക്‌സി നോട്ട് 8ന്. ഡിസ്‌പ്ലേയുടെ സംരക്ഷണത്തിന് കോണിങ് ഗൊറില്ല ഗ്ലാസ് 5 ഉം പുതിയ ഫോണില്‍ സാംസങ് ഉപയോഗിച്ചിട്ടുണ്ട്.

പ്രവര്‍ത്തന ക്ഷമതയെ കുറിച്ച് പറയുമ്പോള്‍, ഒക്ടാകോര്‍ സ്‌നാപ്ഡ്രാഗണ്‍ 835 പ്രൊസസറാണ് ഇതില്‍ ഉപയോഗിച്ചിരിക്കുന്നത്. എന്നാല്‍ അമേരിക്കയ്ക്ക് പുറത്ത് ഇന്ത്യയടക്കമുള്ള രാജ്യങ്ങളില്‍ സാംസങ്ങിന്റെ തന്നെ എക്‌സിനോക്‌സ് 8895 ചിപ്‌സെറ്റാണ് ഗ്യാലക്‌സി നോട്ട് 8ല്‍ ഉണ്ടാവുക.

6ജിബി റാം ശേഷിയില്‍ പുറത്തിറങ്ങുന്ന ഫോണിന് 64ജിബി, 128 ജിബി, 256 ജിബി സ്റ്റോറേജുള്ള മൂന്ന് വ്യത്യസ്ത പതിപ്പുകളുമുണ്ടാവും. ഒപ്പം മൈക്രോ എസ്ഡി കാര്‍ഡ് സൗകര്യവും ഉണ്ടാവും.

സാംസങ് ആദ്യമായി ഇരട്ട പിന്‍ക്യാമറ സിസ്റ്റം കൊണ്ടുവരുന്ന ഫോണാണെന്ന സവിശേഷതയും നോട്ട് 8നുണ്ട്. 26mm ലെന്‍സിന് F/1.7 അപേര്‍ച്ചര്‍ ഉണ്ട്. സെന്‍സറിന്റെ വലിപ്പം 1/2.55” ആണ്. രണ്ടാമത്തെ ക്യാമറ ഐഫോണ്‍ 7 പ്ലസിലേതു പോലെ ടെലി ലെന്‍സാണ് ഉപയോഗിച്ചിരിക്കുന്നത്. 52mm റീച്ചുള്ള ലെന്‍സിന് F/2.4 അപേര്‍ച്ചറാണുള്ളത്. സെന്‍സറിനാകട്ടെ 1/3.6” വലിപ്പവും. ഐഫോണിനെ പോലെ പശ്ചാത്തലം ഫോക്കസല്ലാതാക്കാനുള്ള കഴിവും ഇതിനുണ്ട്. രണ്ടു ക്യാമറകള്‍ക്കും ഒപ്ടിക്കല്‍ ഇമേജ് സ്റ്റബിലൈസേഷനുണ്ട് എന്നത് ഇവയെ ഫൊട്ടോഗ്രഫി പ്രേമികള്‍ക്ക് ഇഷ്ടപ്പെടാന്‍ ഒരു കാരണമാകാം. മുന്‍ ക്യാമറ 8MP റെസലൂഷനുള്ളതാണ്.

4K വിഡിയോ റെക്കോഡു ചെയ്യുമെന്നതാണ് നോട്ട് 8ന്റെ സുപ്രധാന ഫീച്ചറുകളില്‍ ഒന്ന്. 720p യില്‍ 240fps സ്ലോമോഷന്‍ റെക്കോഡു ചെയ്യാമെന്നതും വിഡിയോ ഷൂട്ടര്‍മാര്‍ക്ക് താത്പര്യമുണ്ടാക്കുന്ന കാര്യമാണ്. ഫോണ്‍ വാട്ടര്‍ റെസിസ്റ്റന്റുമാണ്. വലിയ ഫോണുകള്‍ നിര്‍മിക്കാനുള്ള സാംസങിന്റെ കഴിവിനുള്ള അംഗീകാരണാണ് പുതിയ ഫോണ്‍.

അതേസമയം ഇന്ത്യയില്‍ ഗ്യാലക്‌സി നോട്ട് 8 ന്റെ ബുക്കിങ് 2.5 ലക്ഷം കവിഞ്ഞെന്നാണ് റിപ്പോര്‍ട്ട്. ആമസോണ്‍ ഇന്ത്യ വഴി തന്നെ 1.5 ലക്ഷം പേരാണ് രജിസ്റ്റര്‍ ചെയ്തത്. ഇതില്‍ 72,000 പേര്‍ ആദ്യദിനം തന്നെ ബുക്ക് ചെയ്തവരാണ്.