ഐഫോൺ X ലോഞ്ചിനിടെ ഫെയ്സ് ഐഡി പരാജയപെട്ടതിന്റെ വിശദീകരണവുമായ് ആപ്പിൾ
ആപ്പിളിന്റെ ഏറ്റവും പുതിയ ഫോണായ ഐഫോൺ X എത്തിയത്‌ വളരെ ആഘോഷത്തോടുകൂടിയാണ്. ഈ ഫോണിന്റെ പ്രത്യേകതകൾ തന്നെയാണ് ഇതിനു കാരണം. അതിൽ ഏറ്റവും ആകർഷണീയമായത് മുഖത്തിന്റെ ബയോമെട്രിക്‌ ഫീചറുകള്‍ സ്‌കാന്‍ ചെയ്‌ത്‌ ഉടമയെ തിരിച്ചറിയുന്ന രീതിയായ ഫെയ്‌സ്‌ഐഡിയാണ്. ടച്ച് ഐഡിയെക്കാള്‍ മെച്ചമാണ്‌ ഇതെന്നായിരുന്നു ആപ്പിളിന്റെ അവകാശവാദം.
പക്ഷെ, കമ്പനിയുടെ ക്രെയ്ഗ് ഫെഡറർഹി ഈ ഫീച്ചര്‍ ആദ്യമായി ഓഡിയന്‍സിനു മുന്നില്‍ അവതരിപ്പിച്ചപ്പോള്‍ അതു പരാജയപ്പെട്ടു എന്നത്‌ ആപ്പിളിന്‌ ഒരു ക്ഷീണമായി. ആപ്പിളിന്റെ ഫെയ്സ് ഐഡി പരാജയത്തിന്റെ വിഡിയോ ഇപ്പോൾ സോഷ്യൽമീഡിയകളിൽ ഹിറ്റാണ്.
ഫോണ്‍ അണ്‍ലോക്‌ ചെയ്യാന്‍ അതിന്റെ നേരെ നോക്കിയാല്‍ മതി. എന്നിട്ട്‌ മുകളിലേക്കു സ്വൈപ്പ് ചെയ്യുക എന്നു പറഞ്ഞ്‌ ക്രെയ്ഗ് ഫെഡറർഹി ഫോണ്‍ തന്റെ നേരേ തിരിച്ച്‌ സ്വൈപ് ചെയ്‌തെങ്കിലും ഒന്നും സംഭവിച്ചില്ല. ഒന്നു കൂടെ ശ്രമിക്കാമെന്നു പറഞ്ഞ്‌ അദ്ദേഹം താന്‍ ചെയ്‌തത്‌ ആവര്‍ത്തിച്ചെങ്കിലും ഫോണ്‍ പാസ്‌കോഡ്‌ എന്റര്‍ ചെയ്യാനുള്ള ഫീല്‍ഡ്‌ ആണ്‌ കൊണ്ടുവന്നത്‌.
ഇപ്പോളിതാ അന്ന് സംഭവിച്ചത് എന്താണെന്ന് ആപ്പിൾ തന്നെ വിശദീകരിച്ച് രംഗത്തെത്തി. ലോഞ്ചിന് കൊണ്ടുവന്ന ഹാൻഡ്സെറ്റ് നിരവധി പേർ ഫെയ്സ് ഐഡി പരീക്ഷിച്ചിരുന്നു. ഇതാണ് പ്രശ്നമായത് എന്നാണ് അവരുടെ വിശദീകരണം.
ക്രെയ്ഗ് ഫെഡറർഹിയുടെ ഫെയ്സ് ഐഡിയാണ് ഇതിൽ നൽകിയിരുന്നത്. എന്നാൽ ലോഞ്ചിന് നിരവധി ഫെയ്സ് ഐഡികൾ പരിശോധിച്ചു. ആർക്കും ഐഫോൺ X തുറക്കാനായില്ല. ഇതിനു ശേഷമാണ് ക്രെയ്ഗ് ഫെഡറർഹി ഫെയ്സ് ഐഡി അവതരിപ്പിക്കുന്നത്. ഇതോടെ അദ്ദേഹത്തിന്റെ ഫെയ്സ് ഐഡിയും എടുത്തില്ല. നിരവധി തവണ തെറ്റായി ഫെയ്സ് ഐഡി നൽകിയാൽ പിന്നീട് പാസ്‌വേർഡ് ഉപയോഗിച്ച് മാത്രമേ ഓപ്പൺ ചെയ്യാൻ സാധിക്കൂ.
https://www.facebook.com/Malayalivartha
