ബോംബെ ഓഹരി സൂചിക സെന്‍സെക്‌സ് റെക്കോര്‍ഡ് ഉയരത്തില്‍. ബുധനാഴ്ചയാണ് സെന്‍സെക്‌സ് വലിയ നേട്ടം കുറിച്ചത്. റിലയന്‍സ്, ടി.സി.എസ്, എച്ച്.ഡി.എഫ്.സി തുടങ്ങിയ ഓഹരികളാണ് നേട്ടത്തിന് കരുത്ത് പകര്‍ന്നത്. 260 പോയിന്റ് നേട്ടത്തോടെ 65,588 പോയിന്റിലെത്തിയതോടെയാണ് സെന്‍സെക്‌സ് ചരിത്ര നേട്ടത്തിലേക്ക് ചുവടുവെച്ചത്.


ഇതിന് മുമ്പ് 65,583 പോയിന്റായിരുന്നു സെന്‍സെക്‌സിന്റെ റെക്കോര്‍ഡ് ഉയരം. 2022 ഡിസംബര്‍ ഒന്നിനാണ് സെന്‍സെക്‌സ് നേട്ടം കൈവരിച്ചത്.
അതേസമയം, ദേശീയ സൂചികയായ നിഫ്റ്റി 18,870 പോയിന്റിലാണ് വ്യാപാരം നടത്തുന്നത്. അള്‍ട്രാടെക് സിമന്റ്, പവര്‍ ഗ്രിഡ്, വിപ്രോ, ടെക് മഹീന്ദ്ര, എല്‍&ടി, എച്ച്.ഡി.എഫ്.സി ബാങ്ക്, ടി.സി.എസ് എന്നീ കമ്പനികളാണ് വലിയ നേട്ടമുണ്ടാക്കിയത്. എന്‍.ടി.പി.സി, ആക്‌സിസ് ബാങ്ക്, സണ്‍ഫാര്‍മ, ഇന്‍ഫോസിസ്, ബജാജ് ഫിന്‍സെര്‍വ്, ടാറ്റ സ്റ്റീല്‍ എന്നിവര്‍ നഷ്ടമുണ്ടാക്കി.