വിദേശ യൂണിവേഴ്‌സിറ്റികളില്‍ ഉപരി പഠനം നടത്താന്‍ ആഗ്രഹിയ്ക്കുന്ന വിദ്യാര്‍ത്ഥികള്‍ക്കായി ഇന്ത്യ ഗവണ്മെന്റ് നല്‍കുന്ന ഗ്രാന്റുകള്‍ ഇവയാണ്.

1. Overseas Doctoral Fellowship Programme (ഓവര്‍സീസ് ഡോക്ടറല്‍ ഫെല്ലോഷിപ്പ് പ്രോഗ്രാം ):

ഡിപ്പാര്‍ട്‌മെന്റ് ഓഫ് സയന്‍സ് ആന്‍ഡ് ടെക്നോളജിയുടെ സ്റ്റാറ്റിയുട്ടറി ബോഡിയായ SERB എന്ന സയന്‍സ് ആന്‍ഡ് എന്‍ജിനിയറിങ് റിസര്‍ച്ച് ബോര്‍ഡ്, Cambridge, Stanford, Carnegie Mellon University, University of Southern California, University of California, Irvine, USA, Rice University, USA, The State University of New York, University at Buffalo, USA , University of British Columbia, Canada എന്നീ സര്‍വകലാശാലകളുമായി സഹകരിയ്ക്കുവാന്‍ സ്ഥാപിച്ച ഓവര്‍സീസ് ഡോക്ടറല്‍ ഫെല്ലോഷിപ്പ് പ്രോഗ്രാം ലക്ഷ്യമിട്ടത് നാഷണല്‍ കപ്പാസിറ്റി ബില്‍ഡിംഗാണ്.

(വ്യക്തികളോ സ്ഥാപനങ്ങളോ, തങ്ങളുടെ ജോലി പൂര്‍ത്തിയാക്കാനോ അല്ലെങ്കില്‍ മികച്ച രീതിയിലോ അധികരിച്ച തോതിലോ, കൂടുതല്‍ സ്വാധീനം ഉളവാക്കുന്ന രീതിയിലോ തങ്ങളുടെ പ്രവര്‍ത്തന ഫലം കൈവരിയ്ക്കുന്നതിനായി, തങ്ങളുടെ സ്‌കില്ലുകള്‍ മെച്ചപ്പെടുത്തുന്നതിനുള്ള വിജ്ഞാനമോ, ഉപകരണങ്ങളോ മറ്റു വിഭവങ്ങളോ ആര്‍ജിയ്ക്കുന്ന പ്രക്രിയകളെയാണ് കപ്പാസിറ്റി ബില്‍ഡിംഗ് എന്നത് കൊണ്ട് ഉദ്ദേശിയ്ക്കുന്നത്). ഗവേഷണ പഠനം നടത്തുന്ന വിദ്യാര്‍ത്ഥികള്‍ക്ക് വാര്‍ഷിക ഫെല്ലോഷിപ്പ് ആയി, 4 വര്‍ഷത്തേയ്ക്ക് 24000 ഡോളറാണ് ഈ സ്‌കോളര്‍ഷിപ്പിലൂടെ ലഭിയ്ക്കുന്നത്.

2. ഹംഗേറിയന്‍ ഗവണ്മെന്റ് സ്‌കോളര്‍ഷിപ് : ഇന്ത്യയും ഹംഗറിയും തമ്മിലുള്ള വിദ്യാഭ്യാസ വിനിമയ പരിപാടിയുടെ ഭാഗമായി, ഹംഗറിയിലെ ഉന്നത വിദ്യാഭ്യാസ കേന്ദ്രങ്ങളില്‍ ഉപരിപഠനം നടത്താന്‍ ആഗ്രഹിയ്ക്കുന്ന 200 ഇന്ത്യന്‍ വിദ്യാര്‍ത്ഥികള്‍ക്ക് അനുവദിച്ചിട്ടുള്ള സ്‌കോളര്‍ഷിപ്പ് ആണിത്.

3. MHRD scholarships:

വിദ്യാഭ്യാസ -സാംസ്‌കാരിക വിനിമയ പരിപാടിയുടെ ഭാഗമായി ഇറ്റലി, മെക്‌സിക്കോ, ഇസ്രായേല്‍ , ചൈന ,സൗത്ത് കൊറിയ എന്നിവയും , ന്യൂസിലാന്‍ഡ് , യു കെ എന്നിവ കോമണ്‍വെല്‍ത്ത് സ്‌കോളര്‍ഷിപ്പ് എന്ന പേരിലും പ്രസ്തുത രാജ്യങ്ങളില്‍ ഉപരിപഠനം നടത്താന്‍ ആഗ്രഹിയ്ക്കുന്ന ഇന്ത്യന്‍ വിദ്യാര്‍ത്ഥികള്‍ക്കായി സ്‌കോളര്‍ഷിപ്പുകള്‍ നല്‍കുന്നുണ്ട്. മാനവ വിഭവശേഷി വികസനമന്ത്രാലയം ആണ് ഈ സ്‌കോളര്ഷിപ്പിനായി വിദ്യാര്‍ത്ഥികളെ നാമനിര്‍ദേശം ചെയ്യുന്നത്.

4. National Overseas Scholarship for Scheduled Caste Students:

Social Justice and Empowerment ഡിപ്പാര്‍ട്ട്‌മെന്റ് സ്ഥാപിച്ചിട്ടുള്ള സ്‌കോളര്‍ഷിപ്പ് ആണിത്. പട്ടിക ജാതി വിഭാഗത്തില്‍പെടുന്ന മിടുക്കരായ വിദ്യാര്‍ത്ഥികള്‍ക്ക് വിദേശ സര്‍വ്വകലാശാലകളില്‍ ബിരുദാനന്തര ബിരുദ പഠനത്തിനും, ഗവേഷണ പഠനത്തിനുമായി സാമ്പത്തിക സഹായം നല്‍കാന്‍ ലക്ഷ്യമിട്ടുള്ളതാണ് ഇത്.

5. National Overseas Scholarship for Scheduled Tribe Students:

എന്‍ജിനിയറിങ് , ടെക്നോളജി , സയന്‍സ് , എന്നീ വിഷയങ്ങളുമായി ബന്ധപ്പെട്ട് പട്ടിക വിഭാഗത്തിലെ മിടുക്കരായ വിദ്യാര്‍ത്ഥികള്‍ക്ക് വിദേശ സര്വകലാശാലകളില്‍ ബിരുദാനന്തര ബിരുദ പഠനമോ , ഗവേഷണ ബിരുദ പഠനമോ, പോസ്റ്റ് ഡോക്ടറല്‍ പഠനമോ നടത്തുന്നതിന് സാമ്പത്തിക സഹായം ലഭ്യമാക്കുന്നതിനായി മിനിസ്ട്രി ഓഫ് ട്രൈബല്‍ അഫയേഴ്സ് സ്ഥാപിച്ചിട്ടുള്ള ഒരു സ്‌കോളര്‍ഷിപ്പ് ആണിത്.

6. Research Internships:

All India Council for Technical Education-ന്റെ അംഗീകാരമുള്ള വിദ്യാഭ്യാസ സ്ഥാപനങ്ങളില്‍ നിന്നുള്ള വിദ്യാര്‍ത്ഥികള്‍ക്ക്, കനേഡിയന്‍ സര്‍വകലാശാലകളില്‍, ഇന്റേണ്‍ഷിപ്പിന് അവസരം ഒരുക്കുന്നതിനായി , All India Council for Technical Education-നും Mathematics of Information Technology and Computer Systems (MITACS)' - സും സംയുക്തമായി 2018 -ല്‍ ആരംഭിച്ച  'Sending Students Abroad for Research Internships' (സെന്റിങ് സ്റ്റുഡന്‍സ് എബ്രോഡ് ഫോര്‍ റിസേര്‍ച് ഇന്റേണ്‍ഷിപ്) പരിപാടിയുടെ ഭാഗമായി നല്‍കുന്ന സ്‌കോളര്‍ഷിപ്പ് ആണിത്.