ഇന്ത്യയിലെ 10 കേന്ദ്ര സര്‍വകലാശാലകള്‍ 2018-19 വര്‍ഷം നടത്തുന്ന വിവിധ ഇന്റഗ്രേറ്റഡ്/അണ്ടര്‍ ഗ്രാജ്വേറ്റ്/പോസ്റ്റ് ഗ്രാജ്വേറ്റ്/റിസര്‍ച് പ്രോഗ്രാമുകളിലേക്കുള്ള പൊതുപ്രവേശന പരീക്ഷ വിജ്ഞാപനമായി www.cucetexam.in ൽ...  പ്രസിദ്ധീകരിച്ചിട്ടുണ്ട്. ഇക്കൊല്ലം ബംഗളൂരുവിലെ ഡോ. ബി.ആര്‍. അംബേദ്കര്‍ സ്‌കൂള്‍ ഓഫ് ഇക്കണോമിക്‌സ് നടത്തുന്ന വിവിധ കോഴ്‌സുകളിലേക്കുള്ള പ്രവേശനവും ഈ പൊതുപരീക്ഷയുടെ റാങ്ക് പരിഗണിച്ചാണ്. ഏകജാലക സംവിധാനമായതിനാല്‍ പൊതുപ്രവേശന പരീക്ഷക്ക് ഒറ്റ അപേക്ഷ ഓണ്‍ലൈനായി സമര്‍പ്പിച്ചാല്‍മതി. ഫെബ്രുവരി 19ന് തുടങ്ങിയ അപേക്ഷ സമര്‍പ്പണം മാര്‍ച്ച് 26ന് അവസാനിക്കും

പ്രവേശന പരീക്ഷഫീസ് ജനറല്‍/ഒ.ബി.സി വിഭാഗക്കാര്‍ക്ക് 800 രൂപ. പട്ടികജാതി/പട്ടികവര്‍ഗക്കാര്‍ക്ക് 350 രൂപ മതി. ഭിന്നശേഷിക്കാരെ പരീക്ഷ ഫീസില്‍നിന്നും ഒഴിവാക്കിയിട്ടുണ്ട്. നെറ്റ് ബാങ്കിങ്/ക്രെഡിറ്റ്/ഡബിറ്റ് കാര്‍ഡ് മുഖേനയോ ബാങ്ക് ചലാനിലൂടെയോ പ്രവേശന പരീക്ഷഫീസ് അടക്കാം. 

www.cucetexam.in ല്‍ നിര്‍ദേശങ്ങള്‍ പാലിച്ചുവേണം ഓണ്‍ലൈന്‍ വഴി അപേക്ഷിക്കേണ്ടത്. ഇതിനുള്ള നിര്‍ദേശങ്ങള്‍ വെബ്‌സൈറ്റിലുണ്ട്. കേന്ദ്ര സര്‍വകലാശാലകള്‍ കേരളം (കാസര്‍കോട്), തമിഴ്‌നാട്, കര്‍ണാടകം, ഹരിയാന, ജമ്മു, ഝാര്‍ഖണ്ഡ്, കാശ്മീര്‍, രാജസ്ഥാന്‍, പഞ്ചാബ്, സൗത്ത് ബീഹാര്‍ എന്നിവിടങ്ങളിലാണുള്ളത്. യൂനിവേഴ്‌സിറ്റികളുടെ കോഴ്‌സുകളും സീറ്റുകളും പ്രവേശന കോഴ്‌സുകളും 

www.cucetexam.in ല്‍ ലഭ്യമാണ്. പൊതുപ്രവേശന പരീക്ഷ ദേശീയതലത്തില്‍ ഏപ്രില്‍ 28, 29 തീയതികളിലാണ് നടത്തുക. ഒബ്ജക്ടിവ് മള്‍ട്ടിപ്ള്‍ ചോയ്‌സ് മാതൃകയിലുള്ള എന്‍ട്രന്‍സ് പരീക്ഷ ചോദ്യ പേപ്പറില്‍ എ, ബി എന്നിങ്ങനെ രണ്ട് പാര്‍ട്ടുകളാണുണ്ടാവുക. പാര്‍ട്ട് എയില്‍ പരീക്ഷാര്‍ഥിയുടെ ഭാഷാശേഷി, പൊതുവിജ്ഞാനം, ഗണിതശാസ്ത്രാഭിരുചി, അപഗ്രഥന നൈപുണ്യം മുതലായവ പരിശോധിക്കുന്ന 25 ചോദ്യങ്ങളുണ്ടാവും.

പാര്‍ട്ട് ബിയില്‍ 75 മള്‍ട്ടിപ്ള്‍ ചോയ്‌സ് ചോദ്യങ്ങളുണ്ടാവും. മൂന്ന് സെക്ഷനുകളിലായി 25 ചോദ്യങ്ങള്‍വീതം ഇതിലും ഉള്‍പ്പെടുത്തിയിട്ടുണ്ട്. എന്നാല്‍, ഇന്റഗ്രേറ്റഡ്/എം.ബി.എ/എല്‍എല്‍.ബി അല്ലെങ്കില്‍ മറ്റു ചില പ്രോഗ്രാമുകള്‍ക്ക് 100 മള്‍ട്ടിപ്ള്‍ ചോയ്‌സ് ചോദ്യങ്ങള്‍ അടങ്ങിയ പേപ്പറാണുണ്ടാവുക. ഇംഗ്ലീഷ് ലാംഗ്വേജ്, റീസണിങ് ഡാറ്റ, ഇന്റര്‍പ്രെട്ടേന്‍സ്/ന്യൂമറിക്കല്‍ എബിലിറ്റി, പൊതുവിജ്ഞാനം, അനലിറ്റിക്കല്‍ സ്‌കില്‍സ് തുടങ്ങിയ വിഷയങ്ങളിലാവും ചോദ്യങ്ങള്‍.
ഒ.എം.ആര്‍ ഷീറ്റില്‍ ശരിയുത്തരം കണ്ടെത്തി മാര്‍ക്ക് ചെയ്യണം. രണ്ട് മണിക്കൂറാണ് സമയം. മൂല്യനിര്‍ണയത്തിന് നെഗറ്റിവ് മാര്‍ക്കുണ്ട്. ഉത്തരം തെറ്റിയാല്‍ .25 മാര്‍ക്കുവീതം കുറയും. പരീക്ഷഫലം മേയ് 25ന് പ്രസിദ്ധീകരിക്കും.
ആകെ 78 പ്രവേശന പരീക്ഷ കേന്ദ്രങ്ങളുണ്ടാവും. കേരളത്തില്‍ തിരുവനന്തപുരം, കോട്ടയം, കൊച്ചി, തൃശൂര്‍, കോഴിക്കോട്, കണ്ണൂര്‍ (തലശ്ശേരി), കല്‍പറ്റ (വയനാട്), കാസര്‍കോട് എന്നിവിടങ്ങളിലാണ് പരീക്ഷ കേന്ദ്രങ്ങള്‍. മുഴുവന്‍ പരീക്ഷ കേന്ദ്രങ്ങളും വെബ്‌സൈറ്റിലുണ്ട്.