നിങ്ങൾ എന്നും കാണുന്ന ,അല്ലെങ്കിൽ കണ്ട് പരിചയിച്ച രണ്ടു കാര്യങ്ങളാണ് ഇവിടെ ചോദിക്കുന്നത്. ഇവയുടെ ഉത്തരം എന്തായിരിക്കുമെന്ന് ചിന്തിച്ചിട്ടുണ്ടോ?

വിറക് കത്തുമ്പോള്‍ കരി ഉണ്ടാവുന്നത് എന്തുകൊണ്ടാണ്?

കാര്‍ബണ്‍ സംയുക്തങ്ങള്‍ അടങ്ങുന്ന വസ്തുക്കള്‍ കത്തിക്കുമ്പോള്‍ , കത്തല്‍ അപൂര്‍ണമാണെങ്കില്‍ കരിയുണ്ടാവും. വേണ്ടത്ര ഓക്സിജന്‍ ലഭിച്ചാല്‍ കത്തല്‍ പൂര്‍ണമായി നടക്കും. അപ്പോള്‍ കാര്‍ബണ്‍ വിഘടിച്ചു CO2 ആയിമാറും, കരിയുണ്ടാവില്ല. വിറകില്‍ ഉള്ള പ്രധാനമായ ഘടകങ്ങള്‍ കാര്‍ബണ്‍ സംയുക്തങ്ങള്‍ ആയ സെല്ലുലോസ്, ലിഗ്നിന്‍ എന്നിവയാണ്. ഇവ പൂര്‍ണമായി കത്തിയാല്‍ കരിയുണ്ടാവില്ല. എന്നാല്‍ വേണ്ടത്ര വായുസഞ്ചാരം ഇല്ലാത്ത നമ്മുടെ നാടന്‍ അടുപ്പുകളില്‍ ഇവ പൂര്‍ണമായും കത്തില്ല. അതിനാല്‍ കുറച്ച് കരി അടുപ്പില്‍ അവശേഷിക്കും. ഇങ്ങനെ വിറക് അപൂര്‍ണമായി കത്തിച്ചാണ് മരക്കരി ഉണ്ടാക്കുന്നത്.
വിറക് അടുക്കി ചെളികൊണ്ട് പൊതിഞ്ഞ് ചൂടുവാതകങ്ങള്‍ പോവാനുള്ള ദ്വാരം ഇട്ട് സാവധാനം കത്തിച്ചാല്‍ വളരെയേറെ കരി അവശേഷിക്കും. നാട്ടിന്‍പുറങ്ങളില്‍ പണ്ട് ഇസ്തിരി ഇടാന്‍ ചിരട്ടക്കരി ഉണ്ടാക്കിയിരുന്നത് ഇതിന്‍റെ ചെറിയ ഒരു ഉദാഹരണമാണ് . ചുരുക്കത്തില്‍ കാര്‍ബണ്‍ സംയുക്തങ്ങളുടെ അപൂര്‍ണമായ കത്തലില്‍ ഉണ്ടാകുന്ന ഉല്‍പ്പന്നമാണ്‌ കരി.

 അടുക്കളയിലെന്തിനാ ചിമ്മിനി?

അടുപ്പ് കത്തുമ്പോള്‍ വരുന്ന കരിയും പുകയും പുറത്തു കളയാനുള്ള സംവിധാനമാണ് ചിമ്മിനി എന്ന് ആര്‍ക്കാണറിയാത്തത്.' എന്തൊരു മണ്ടന്‍ ചോദ്യം എന്നാണോ?
എന്നാൽ കാര്യം അത്ര നിസ്സാരമല്ല. അടുക്കളയിലെ ചിമ്മിനി വെറുതെ പുക പുറത്തുകളയാന്‍ മാത്രമുള്ള സംവിധാനമല്ല.
അടുപ്പ് കത്താനാവശ്യമായ ഓക്‌സിജന്‍ നിറഞ്ഞ വായു പ്രദാനം ചെയ്യുക എന്നതാണ് ചിമ്മിനിയുടെ പ്രധാന ജോലി. കരിയും പുകയും കളയല്‍ രണ്ടാമത്തെ ജോലി മാത്രമാണ്. ചിമ്മിനി എങ്ങനെയാണ് ഈ കടമ നിര്‍വ്വഹിക്കുന്നത് എന്ന് വിശദീകരിക്കാം:
അടുപ്പില്‍ തീ കത്തുമ്പോള്‍ പുറത്തുവരുന്നത് ചൂടുകൂടിയ വായു ആയിരിക്കുമല്ലോ. ഈ വായുവിന് ചൂടുകുറഞ്ഞ വായുവിനേക്കാള്‍ സാന്ദ്രത കുറവായിരിക്കും. സാന്ദ്രത കൂടിയ ചൂടുകുറഞ്ഞ വായു സാന്ദ്രത കുറഞ്ഞ ചൂടുകൂടിയ വായുവിനെ മുകളിലേക്കു തള്ളി അവിടെ സ്ഥാനം പിടിക്കുന്നു. എന്നു വെച്ചാല്‍ അടുക്കളയിലുള്ള ചൂടുകുറഞ്ഞ ശുദ്ധവായു അടുപ്പിലേക്ക് ഒഴുകും എന്നര്‍ത്ഥം. ചൂടുകൂടിയ വായുവാകട്ടെ മുകളിലേക്കുയര്‍ന്ന് ചിമ്മിനിയിലൂടെ പുറത്തുപോവുകയും ചെയ്യും. ഇതു തുടര്‍ച്ചയായി നടക്കുന്ന പ്രക്രിയയാണ്. ഇങ്ങനെ അടുപ്പിലേയ്ക്ക് നിരന്തരമായി വായു സഞ്ചരിക്കുന്നു. ഇതു സാധ്യമാക്കുന്നു എന്നതാണ് ചിമ്മിനിയുടെ ധര്‍മ്മം.
ചിമ്മിനിയുടെ ഉയരം കൂടുന്തോറും അടുക്കളയിലെ വായുപ്രവാഹത്തിന്റെ അളവ് കൂടും. അതുകൊണ്ട് ഉയരം കൂടിയ ചിമ്മിനിയുള്ള വീടുകളിലെ അടുപ്പ് നന്നായി കത്തുന്നതു കാണാം. എന്നുവെച്ച്, ഒരു പരിധിയിലേറെ ഉയരം ചിമ്മിനിക്ക് ഉണ്ടാവുകയും അരുത്. വായു പ്രവാഹം അധികരിച്ചാല്‍ ആവശ്യത്തിന് ചൂട് അടുപ്പില്‍ നിലനില്ക്കാതിരിക്കുകയും വിറക് മുഴുവനായി കത്താത്ത അവസ്ഥ ഉണ്ടാക്കുകയും ചെയ്യും. പരിധി വിട്ട് ചിമ്മിനിയുടെ ഉയരം കുറയാനും കൂടാനും പാടില്ല എന്നര്‍ത്ഥം.