പല ചലച്ചിത്ര താരങ്ങളും ചെയ്യുന്ന തരത്തിലുളള യാതൊരു കൊള്ളരുതായ്മകളും സ്മിത ചെയ്തിട്ടില്ലെന്നാണ് വിദ്യാബാലന്‍ വെളിപ്പെടുത്തുന്നത്. സ്മിത ക്യാമറയ്ക്ക് മുന്നില്‍ മാത്രമേ അഭിനയിച്ചിട്ടുള്ളൂ. വളരെ ശോചനീയമായിരുന്നു ആ ജീവിതം. ഒട്ടേറെ നല്ല കഥാപാത്രങ്ങള്‍ ചെയ്ത സ്മിതയെ പക്ഷേ പലരും മുതലെടുക്കുകയായിരുന്നു. ചതിയും വഞ്ചനയും നിറഞ്ഞ ലോകത്തിലാണ് സ്മിത ജീവിച്ചത്.
സില്‍ക്ക് സ്മിതയുടെ എല്ലാ ചിത്രങ്ങളും താന്‍ കാണാറുണ്ടായിരുന്നുവെന്നും വിദ്യ വെളിപ്പെടുത്തുന്നു. പല പടങ്ങളും വിജയിപ്പിച്ചത് സ്മിതയുടെ അഭിനയം തന്നെ ആയിരുന്നു. എന്നാല്‍ അവര്‍ ഏകാകിനിയായിരുന്നു. അവരെ സംരക്ഷിക്കാന്‍ ആരും ഉണ്ടായിരുന്നില്ല. അവര്‍ക്ക് ചുറ്റുമുണ്ടായിരുന്ന നയവഞ്ചകരായ ഒരു പറ്റം ആള്‍ക്കാരാണ് അവരെ ആത്മഹത്യയിലേക്ക് കൊണ്ടെത്തിച്ചത്. ആത്മഹത്യ ചെയ്യാന്‍ തക്ക ഒരു തെറ്റും സ്മിത ചെയ്തിട്ടില്ലെന്നും വിദ്യ ഉറപ്പിച്ച് പറയുന്നു.
ഡര്‍ട്ടി പിക്ചര്‍ എന്ന സിനിമയില്‍ അഭിനയിക്കുമ്പോള്‍ താന്‍ അവരായി മാറുകയായിരുന്നുവിദ്യ പറയുന്നു. ആത്മഹത്യ ചെയ്യുന്ന രംഗത്ത് താന്‍ തളര്‍ന്നുപോയി. പൊട്ടിക്കരയാന്‍ തോന്നി. ആ രംഗം താന്‍ അഭിനയിക്കുകയായിരുന്നില്ല, ജീവിക്കുകയായിരുന്നു.
ആ നിമിഷങ്ങളിലെ അവരുടെ മാനസിക നില തനിക്ക് മനസിലാക്കാനാകുന്നുണ്ട്. താന്‍ ആ നിമിഷം അവരെക്കുറിച്ച് ഒരുപാട് ചിന്തിച്ച് പോയെന്നും വിദ്യ പറഞ്ഞു. കഹാനി2വിന്റെ വിജയാഘോഷത്തിനിടെ ആയിരുന്നു വിദ്യയുടെ വെളിപ്പെടുത്തലുകള്‍.