ഈ വര്‍ഷം ആരാധകര്‍ ഏറ്റവും ആകാംഷയോടെ കാത്തിരിക്കുന്ന ചിത്രമാണ് മോഹന്‍ലാലിനെ നായകനാക്കി പൃഥ്വിരാജ് ഒരുക്കുന്ന 'ലൂസിഫര്‍'. മോഹന്‍ലാല്‍ നായകനാകുന്നു എന്നതിനേക്കാള്‍ പൃഥ്വിരാജ് സംവിധായകനാകുന്നു എന്നതു തന്നെയാണ് ലൂസിഫറിന്റെ ഏറ്റവും വലിയ ഹൈലൈറ്റ്. നടനായി നേടിയ വിജയം സംവിധായകനായും പൃഥ്വിരാജ് തുടരുമോയെന്ന കാത്തിരിപ്പിലാണ് ആരാധകര്‍. ഇതിനിടെ ചിത്രത്തെക്കുറിച്ച് രസകരമായ നിരീക്ഷണങ്ങളും സോഷ്യല്‍ മീഡിയയില്‍ നിറയുന്നുണ്ട്. 'മുരളീ ഗോപീടെ സ്‌ക്രിപ്റ്റ്, രാജുവിന്റെ ഇംഗ്ലീഷ് ഡയറക്ഷന്‍, മഞ്ജു വാര്യറുടെ മലയാള അഭിനയം. പടം മൊത്തത്തില്‍ ക്രോസിനാദിവടകം ആകുന്ന ലക്ഷണമാണല്ല.' എന്നാണ് ആരാധകന്‍ കുറിച്ചിരിക്കുന്നത്.

പൃഥ്വിരാജ് തന്നെ തന്നെ ട്രോളാനുള്ള ഒരുവസരവും ഈ ചിത്രത്തിന്റെ സെറ്റില്‍ നടന്നു. പൃഥ്വി ഒരു മാസികയ്ക്ക് നല്‍കിയ അഭിമുഖത്തിലാണ് ഇക്കാര്യം വ്യക്തമാക്കിയത്. പൃഥ്വിയുടെ വാക്കുകള്‍ ഇങ്ങനെ.

സെറ്റില്‍ വച്ച് ഒരു അബദ്ധം പറ്റി. വിവേക് ഒബ്രോയിയും മഞ്ജുവും ഒന്നിച്ചുള്ള സീന്‍. വിവേക് ഡയലോഗ് പറയുമ്പോള്‍ മഞ്ജുവിന്റെ മുഖത്ത് ഞാന്‍ ഉദ്ദേശിച്ച റിയാക്ഷനല്ല വന്നത്. ഞാന്‍ പറഞ്ഞു. കുറച്ചുകൂടി incredulounssse(പെട്ടന്ന് വിശ്വാസം വരാത്ത) ആണ് പ്രകടിപ്പിക്കേണ്ടത്. മഞ്ജു തലയാട്ടി. ഞാന്‍ മോനിറ്ററിന് മുന്നിലെത്തി റീടേക്ക് പറഞ്ഞു. പക്ഷെ മഞ്ജു വീണ്ടും ഇട്ടത് പഴയ റിയാക്ഷന്‍ തന്നെ. കട്ട് പറഞ്ഞയുടന്‍ മഞ്ജു അടുക്കലെത്തി ചോദിച്ചു. 'രാജു നേരത്തെ പറഞ്ഞില്ലേ.. അതെന്താ..' സെറ്റില്‍ കൂട്ടച്ചിരി. ചമ്മിയത് ഞാനാണ്. ഷൂട്ടിംഗ് തീരും വരെ 'ഇന്‍ക്രഡുലെസ്നെസ്' അവിടത്തെ ചിരി വിഷയമായിരുന്നു.