സംസ്ഥാന പുരസ്‌കാര പ്രഖ്യാപനത്തിൽ പിഴവ്. ഇതോടെ തെറ്റ് തിരുത്തി അവാർഡ് വീണ്ടും പ്രഖ്യാപിക്കാൻ സാധ്യതയുണ്ട്. മികച്ച നൃത്ത സംവിധായകനുള്ള പുരസ്കാരത്തിലാണ് തെറ്റ് സംഭവിച്ചത്. ഇതോടെ തെറ്റുതിരുത്തി അവാർഡ് പുനപ്രഖ്യാപിച്ചേക്കും. നിലവിൽ മികച്ച നൃത്ത സംവിധായകനുള്ള പുരസ്കാരം പ്രശസ്ത കൊറിയോഗ്രാഫർ പ്രസന്ന സുജിത്തിനാണ്. അരവിന്ദന്റെ അതിഥികളാണ് ചിത്രം. എന്നാൽ പ്രസന്ന മാസ്റ്ററെ കൂടാതെ ഒരു നൃത്ത സംവിധായകൻ കൂടി ചിത്രത്തിൽ പ്രവർത്തിച്ചിരുന്നു. ബിജു ധ്വനി തരംഗ്. ചിത്രത്തിൽ ടൈറ്റിൽ കാർഡിൽ സംഭവിച്ച പിഴവു കൊണ്ടുമാത്രം ബിജുവിനു നഷ്ടമായിരിക്കുകയാണ് സംസ്ഥാന ചലച്ചിത്ര പുരസ്കാരം. ഇത്തരത്തിൽ പുരസ്കാരം നഷ്ടമായതില്‍ വലിയ സങ്കടമുണ്ടെന്നും ബിജു പറഞ്ഞു.

ബിജുവിന്റെ വാക്കുകൾ ഇങ്ങനെ: ‘അരവിന്ദന്റെ അതിഥികൾ ഇറങ്ങിയപ്പോൾ തന്നെ അതിന്റെ ടൈറ്റിൽ കാർഡിൽ എന്റെ പേരു വെക്കാൻ മറന്നിരുന്നു. അസോസിയേറ്റ്സിനു പറ്റിയ തെറ്റാണ്. അത് ഞാൻ അറിഞ്ഞത് പിന്നീടാണ്. അതെന്തുകൊണ്ടാണ് അങ്ങനെ സംഭവിച്ചതെന്നു ഞാൻ ചോദിച്ചപ്പോൾ അണിയറ പ്രവർത്തകരുടെ മറുപടി ഇങ്ങനെയായിരുന്നു. സിനിമ അപ്‌ലോഡ് ചെയ്തതിനു ശേഷമാണ് ഇക്കാര്യം ശ്രദ്ധയിൽപെട്ടത്. ഞാൻ പിന്നെ ആ സിനിമയുടെ ഭാഗമാണ്. അതുകൊണ്ടു തന്നെ മോഹൻ സാറിനോടോ പ്രൊഡ്യൂസറായ പ്രദീപ് സാറോ ഇതേപറ്റി കൂടുതലൊന്നും സംസാരിച്ചില്ല. കാരണം വളരെ നല്ല ആളുകളാണ് അവർ. അവാർഡ് വന്നപ്പോഴും പ്രദീപ് സർ പറഞ്ഞു നിന്റെ പേരു വയ്ക്കാത്തതു വലിയ കഷ്ടമായി പോയല്ലോ. ഒരു തവണ അപ്‌ലോഡ് ചെയ്ത സിനിമ രണ്ടാമതു അപ്‌ലോഡ് ചെയ്യുന്നതൊക്കെ വലിയ എക്സ്പെൻസീവ് ആണെന്നു തോന്നുന്നു. ചിത്രത്തിന്റെ പ്രൊഡ്യൂസർ തന്നെ ഇതു തിരുത്തണമെന്ന് ആവശ്യപ്പെട്ട് ചലച്ചിത്ര അക്കാദമിക്ക് ലെറ്റര്‍ അയച്ചിട്ടുണ്ട്. നമ്മൾ ചെയ്ത വർക്കിനു അംഗീകാരം ലഭിക്കാത്തതിനാൽ നമുക്ക് സങ്കടം തോന്നുന്നതു സ്വാഭാവികമാണല്ലോ. അവാർഡ് പ്രഖ്യാപിച്ചപ്പോൾ നവ്യ നായർ അടക്കമുള്ളവ‍ർ എന്നെ വിളിച്ച് ഇങ്ങനെ ഒരു വാർത്തയുണ്ടല്ലോ? അതു കഷ്ടമായി പോയല്ലോ എന്നു പറഞ്ഞിരുന്നു. ഇങ്ങനെയൊരു സംഭവമുള്ളതു കൊണ്ടാണ് ഒഴിവായതെന്ന് ഞാൻ നവ്യയോടു പറഞ്ഞു.’

ടൈറ്റിൽ കാർഡിൽ ബിജുവിന്റെ പേരു വെക്കാൻ മറന്നു പോയത് അന്നു പറ്റിയ ഒരു അബദ്ധമാണെന്നു ചിത്രത്തിന്റെ പ്രൊഡ്യൂസർ പ്രദീപ് കുമാർ പുതിയറയും സമ്മതിക്കുന്നുണ്ട്. ഈ ഒരു കാരണം കൊണ്ടു ബിജുവിന്റെ കഴിവ് അംഗീകരിക്കപ്പെടാതെ പോകരുതെന്നു കരുതുന്നതിനാൽ ചലച്ചിത്ര അക്കാദമിയെ സമീപിച്ചിരിക്കുകയാണ് ചിത്രത്തിന്റെ നിർമാതാവും സംവിധായകനും. നിരവധി സ്റ്റേജ് ഷോകളും, താരനിശകളും ചെയ്തിട്ടുള്ള നൃത്ത സംവിധായകനാണ് കൊച്ചി സ്വദേശിയായ ബിജു ധ്വനി തരംഗ്. അരവിന്ദന്റെ അതിഥികളിൽ വേഷം ചെയ്തതിനാൽ അഭിനേതാക്കളുടെ കൂട്ടത്തിൽ ബിജുവിന്റെ പേരു വന്നിരുന്നു. എന്നാൽ ഏറ്റവും പ്രധാനപ്പെട്ട കൊറിയോഗ്രാഫിയിൽ പേരുവെക്കാതിരുന്നതാണ് ബിജുവിന് വിനയായത്.