നിര്‍മാതാക്കളുടെ സംഘടന ഫെഫ്ക, സംവിധായകന്‍ അനില്‍ രാധാകൃഷ്ണമേനോനും ബിനീഷ് ബാസ്റ്റിനും തമ്മിലുള്ള തര്‍ക്കത്തില്‍ ഇടപെട്ട് ഇരുവരും തമ്മിലുണ്ടായ തര്‍ക്കം പരിഹരിച്ചെന്ന് ഫെഫ്കയുടെ പ്രസിഡന്റ് ബി. ഉണ്ണികൃഷ്ണന്‍ അറിയിച്ചു. ബിനീഷ് ബാസ്റ്റിനെയും അനില്‍ രാധാകൃഷ്ണ മേനോനെയും ഒരുമിച്ചിരുത്തിയായിരുന്നു ഫെഫ്കയുടെ വാര്‍ത്താ സമ്മേളനം.

രണ്ട് വ്യക്തികള്‍ തമ്മിലുള്ള പ്രശ്‌നം ഫെഫ്ക ഇടപെട്ട് തീര്‍ത്തിരിക്കുന്നു എന്നും ബി. ഉണ്ണികൃഷ്ണന്‍ വ്യക്തമാക്കി. ബിനീഷിന് എല്ലാ പിന്തുണയും നല്‍കും. വിഷയത്തില്‍ അനില്‍ ഖേദപ്രകടനം നടത്തിയിട്ടുമുണ്ട്. അതേസമയം, അനില്‍ രാധാകൃഷ്ണ മേനോന്റെ സിനിമകളില്‍ അഭിനയിക്കില്ലെന്ന തന്റെ മുന്‍നിലപാടില്‍ ഉറച്ചു നില്‍ക്കുന്നതായി ബിനീഷ് പറഞ്ഞു. മാനസികമായി ഏറെ വേദനിപ്പിച്ച സംഭവമായതിനാലാണ് തീരുമാനമെന്നും ബിനീഷ് ആവര്‍ത്തിച്ചു. വ്യക്തിപരമായ കാരണങ്ങള്‍ പറഞ്ഞ് വാര്‍ത്താ സമ്മേളനം പൂര്‍ത്തിയാകുന്നതിനു മുന്‍പ് ബിനീഷ് അവിടെ നിന്നും പോവുകയും ചെയ്തു. പോകും മുമ്പ് അനില്‍ രാധാകൃഷ്ണ മേനോന്‍ ബിനീഷിനെ ആലിംഗനം ചെയ്തു.

കോളജിലെ സംഭവം ഏറെ ദുഃഖിപ്പിച്ചെന്നും വിഷയം പോസ്റ്റ് മോര്‍ട്ടം നടത്താനില്ലെന്നും ഫെഫ്ക പ്രസിഡന്റ് പറഞ്ഞു. വിഷയത്തില്‍ പരസ്യ പ്രതികരണം നടത്തിയ എക്‌സിക്യൂട്ടീവ് അംഗങ്ങളെ താക്കീത് ചെയ്തിട്ടുണ്ട്. കമ്മറ്റിയുടെ പരിഗണനയിലിരുന്ന വിഷയം അംഗങ്ങള്‍ സ്വയം കൈകാര്യം ചെയ്തതു ശരിയായില്ലെന്നും ഫെഫ്ക നിരീക്ഷിച്ചു.