ബിജു മേനോൻ പ്രധാന കഥാപാത്രത്തിൽ എത്തുന്ന ആർക്കറിയാം എന്ന ചിത്രം ഒടിടി റിലീസിന് ഒരുങ്ങുകയാണ്. തീയേറ്റർ റിലീസിന് ശേഷം ആണ് ആര്‍ക്കറിയാം ഒടിടിയിലേക്ക് എത്തുന്നത്..

72 വയസ്സുകാരനായ ഇട്ടിയവിര എന്ന കഥാപാത്രമായി ആണ് ബിജുമേനോൻ ഈ ചിത്രത്തിൽ അഭിനയിച്ചിരിക്കുന്നത്. ബിജു മേനോനും പുറമേ പാർവതിയും, ഷറഫുദ്ദീനും, സൈജു കുറുപ്പും പ്രധാന കഥാപാത്രത്തിൽ എത്തുന്നു. ഈ ചിത്രം ഇതിനോടകം പ്രേക്ഷകപ്രീതി നേടിയിരുന്നു. ഐഎംഡിബിയിൽ 8.3 റേറ്റിംഗ് ചിത്രം നേടി.

ലോക് ഡൗണിന് ശേഷം തിയേറ്ററുകൾ തുറന്ന ഏപ്രിൽ മാസം തന്നെ ആർക്കറിയാം ചിത്രം തിയറ്ററിൽ എത്തിയിരുന്നു. കോവിഡിന്റെ രണ്ടാം തരംഗത്തിൽ തിയേറ്ററുകൾ അടയ്ക്കേണ്ടി വന്നതിനാൽ ചിത്രത്തിന്റെ പ്രദർശനം നിർത്തി വയ്ക്കേണ്ടി വന്നു. തുടർന്നാണ് ഓടിടിയിൽ ആർക്കറിയാം പ്രദർശിപ്പിക്കാൻ സംവിധായകൻ സാനു ജോൺ വർഗീസ് തയ്യാറായത്.

മൂൺഷോട്ട് എന്‍റര്‍ടെയ്‍ന്‍മെന്‍റ്സിന്‍റെയും ഒപിഎം ഡ്രീംമിൽ സിനിമാസിന്‍റെയും ബാനറുകളില്‍ സന്തോഷ് ടി കുരുവിളയും ആഷിഖ് അബുവും ചേർന്നാണ് സിനിമ നിര്‍മ്മിച്ചിരിക്കുന്നത്. മഹേഷ് നാരായണൻ എഡിറ്റിംഗ് ഒരുക്കിയിട്ടുള്ള ചിത്രത്തിന് തിരക്കഥ എഴുതിയിരിക്കുന്നത് സാനു ജോൺ വർഗീസിനൊപ്പം രാജേഷ് രവി, അരുൺ ജനാർദ്ദനന്‍ എന്നിവരൊരുമിച്ചാണ്. ജി ശ്രീനിവാസ് റെഡ്ഢി ഛായാഗ്രഹണം. നേഹ നായരുടെയും യെക്‌സാൻ ഗാരി പെരേരയും ചേർന്നാണ് ഗാനങ്ങൾ ഒരുക്കിയിട്ടുള്ളത്