ലോക്ക് ഡൗണ്‍ കാലത്ത് തന്നെ തേടിയെത്തിയ ഒരു അപ്രതീക്ഷിത ഫോണ്‍കോളിന്‍റെ ആഹ്ലാദം പങ്കുവച്ച് സംവിധായകന്‍ ഒമര്‍ ലുലു. അടുത്തിടെ പുറത്തിറങ്ങിയ ഒമറിന്‍റെ പുതിയ മ്യൂസിക്കല്‍ ആല്‍ബം കണ്ട അഭിപ്രായം പങ്കുവെക്കാന്‍ വിളിച്ചത് സാക്ഷാല്‍ മോഹന്‍ലാല്‍ തന്നെ ആയിരുന്നു. ഈ ലോക്ക് ഡൗണ്‍ കാലത്ത് കിട്ടിയ ഒരു വലിയ സന്തോഷമായിരുന്നു അതെന്ന് ഒമര്‍ പറയുന്നു.

'സമീർ ഭായി വിളിച്ചിട്ട് എന്താ വിശേഷം എന്നൊക്കെ ചോദിച്ച് പെട്ടെന്ന് ഞാന്‍ ലാലേട്ടന് ഫോൺ കൊടുക്കാം എന്ന് പറഞ്ഞു. ഞാന്‍ ആകെ സ്ട്രക്കായി പോയി. അപ്പോഴേക്കും ലാലേട്ടന്റെ ശബ്ദം, ഒമർ ഞാന്‍ മഹിയിൽ മഹാ എന്ന ഒമറിന്റെ പുതിയ ആൽബം കണ്ടിരുന്നു. പണ്ട് മുതലേ ഇഷ്ടപ്പെട്ട മാപ്പിളപ്പാട്ടാണ്. മഹിയിൽ മഹയും മാണിക്യ മലരും ഒക്കെ പുതിയ ട്യൂണിൽ കേട്ടപ്പോഴും നല്ല ഇഷ്ടമായി എന്നും ആൽബത്തിൽ വർക്ക് ചെയത എല്ലാവരോടും അഭിനന്ദനം പറയാനും പറഞ്ഞൂ. പുതിയ സിനിമാ വിശേഷങ്ങളും ഒക്കെ ചോദിച്ച് അംശസകൾ പറഞ്ഞ് ഫോൺ കട്ട് ചെയ്തു. ഈ കോവിഡ് കാലത്ത് കിട്ടിയ ഒരു വലിയ സന്തോഷമെന്നുമായിരുന്നു ഒമർ ലുലു കുറിച്ചത്.

പിടിഅബ്ദുള്‍ റഹ്‌മാന്റെ വരികള്‍ക്ക് പീര്‍ മുഹമ്മദ് സംഗീതം പകര്‍ന്ന ഗാനമാണ് മഹിയില്‍ മഹാ. ഈ ഗാനമായിരുന്നു ഒമര്‍ ലുലു ആല്‍ബത്തിനായി തിരഞ്ഞെടുത്തത്. വിനീത് ശ്രീനിവാസന്‍ ആലപിച്ച ഗാനത്തിന് സംഗീതമൊരുക്കിയത് ജുബൈര്‍ മുഹമ്മദാണ്. ഒമര്‍ ലുലുവിന്റെ ഫേസ്ബുക്ക് പോസ്റ്റ് ക്ഷണനേരം കൊണ്ടാണ് വൈറലായി മാറിയത്