സിനിമ താരങ്ങളുടെ വിവാഹവും വിവാഹമോചനവും എപ്പോഴും വാർത്തകളിൽ ഇടം നേടാറുണ്ട്. എന്നാൽ വിവാഹമോചനം നേടിയ താരങ്ങള്‍ വീണ്ടും ഒന്നിച്ച് ജീവിക്കുന്ന കാഴ്ച അപൂര്‍വ്വമായ സംഭവമാണ്. അത്തരത്തിലൊരു വാർത്തയാണ് സമൂഹമാധ്യമങ്ങളിൽ ഇപ്പോൾ ചർച്ചയാകുന്നത്. നടി  നടി പ്രിയ രാമനും നടന്‍ രഞ്ജിത്തും വീണ്ടും ഒന്നിച്ച് ജീവിക്കാന്‍ തീരുമാനിച്ചിരിക്കുകയാണ്.

വിവാഹ മോചിതരായി ഏഴ് വർഷം പിന്നീടുമ്പോൾ വീണ്ടും ഒന്നിക്കാൻ ഇരുവരും തീരുമാനിച്ചിരിക്കുന്നത്. ഇരുവരും ഒന്നിച്ചുവെന്നുള്ള വാർത്തകൾ തമിഴ് മാധ്യമങ്ങളാണ് റിപ്പോർട്ട് ചെയ്തത്.  സമൂഹമാധ്യമത്തിൽ രഞ്ജിത്ത് പങ്കുവച്ച കുറിപ്പും ചിത്രങ്ങളുമാണ് ഈ വാർത്തകള്‍ക്ക് ആധാരം.

ഇരുവരുടെയും 22-ാം വിവാഹ വാർഷിക ദിനത്തിലാണ് പ്രിയയുമൊത്തുള്ള ചിത്രങ്ങൾ രഞ്ജിത്ത് പങ്കുവച്ചിരിക്കുന്നത്. ‘ആരാധകരുടെ സ്നേഹാശംസകളാൽ ഞങ്ങളുടെ ഇപ്പോഴത്തെ ജീവിതം വളരെ മനോഹരമായിരിക്കുന്നു’, എന്നാണ് ചിത്രത്തോടൊപ്പം രഞ്ജിത്ത് കുറിക്കുന്നത്.

1999ൽ റിലീസ് ചെയ്ത 'നേസം പുതുസ്' എന്ന ചിത്രത്തിന്റെ ഷൂട്ടിങ്ങിനിടെയാണ് രഞ്ജിത്തും പ്രിയയും പ്രണയത്തിലാവുന്നതും വിവാഹിതരാകുന്നതും. എന്നാൽ 2014ൽ ഇരുവരും വിവാഹമോചിതരായി. ശേഷം രഞ്ജിത്ത് നടി രാഗസുധയെ വിവാഹം ചെയ്തുവെങ്കിലും ഒരു വർഷത്തിനുള്ളിൽ  ഇവർ വേർപിരിയുകയും ചെയ്തു. തുടർന്ന് ടെലിവിഷൻ സീരിയലുകളിൽ സജീവമാവുകയായിരുന്നു.