ഉറ്റസുഹൃത്തിന്‍റെ വേര്‍പാടിന് ഒരു വര്‍ഷം തികഞ്ഞ കാര്യം പങ്കുവച്ച് ബിഗ് ബോസ് മലയാളം സീസണ്‍ മൂന്നില്‍ ഏറ്റവും പ്രേക്ഷകപ്രീതി നേടിയ മത്സരാര്‍ഥികളില്‍ ഒരാളായ നടൻ മണിക്കുട്ടന്‍. ഇൻസ്റ്റാഗ്രാമിലൂടെയാണ് സുഹൃത്ത് റിനോജിനൊപ്പമുള്ള ചിത്രം പങ്കുവച്ചത്. "നീ ഞങ്ങളെ വിട്ട് വിട വാങ്ങിയിട്ട് ഇന്നേക്ക് ഒരു വർഷം.. നിന്‍റെ ഓർമകളിലൂടെ ഇന്നും കടന്നു പോകുന്നു.. ഒരിക്കലും മറക്കാനാവില്ലെടാ നിന്നെ " എന്നായിരുന്നു മണിക്കുട്ടൻ കുറിച്ചത്. ബിഗ് ബോസില്‍ മണിക്കുട്ടന്‍റെ സഹമത്സരാര്‍ഥിയും സുഹൃത്തുമായിരുന്ന ഡിംപല്‍ ഭാലും ഡിംപലിന്‍റെ ചേച്ചി തിങ്കള്‍ ഭാലും ഈ പോസ്റ്റിന് കമന്‍റുമായി എത്തിയിട്ടുണ്ട്. ലക്ഷക്കണക്കിന് ഹൃദയങ്ങളുടെ സ്നേഹം ഏറ്റുവാങ്ങുന്ന മണിക്കുട്ടനെ കണ്ട് റിനോജ് ഇന്ന് ഏറെ സന്തോഷിക്കുന്നുണ്ടാവുമെന്നും നിങ്ങളുടെ സൗഹൃദം എക്കാലവും ഓര്‍മ്മിക്കപ്പെടുമെന്നുമാണ് ഡിംപലിന്‍റെ കമന്‍റ്.

വ്യക്തിപരമായ പല കാര്യങ്ങളും മണിക്കുട്ടൻ ബിഗ് ബോസ് ഹൗസിൽ വെളിപ്പെടുത്തിയിരുന്നു. അതിലൊന്നായിരുന്നു അടുത്ത സുഹൃത്തായ റിനോജിന്‍റെ അപ്രതീക്ഷിത വിയോഗം. ബിഗ് ബോസ് ഗ്രാന്‍ഡ് ഓപ്പണിംഗ് വേദിയില്‍ ഇക്കാര്യം ചോദിച്ചപ്പോള്‍ മോഹന്‍ലാലിന് മുന്നില്‍ വിതുമ്പിയ മണിക്കുട്ടന്‍ ആത്മസുഹൃത്തിനെക്കുറിച്ച് പറയാനുള്ള ടാസ്‍കിനിടെ റിനോജുമായി തനിക്കുണ്ടായിരുന്ന അടുപ്പത്തെക്കുറിച്ച് പറഞ്ഞിരുന്നു.