വന്ദിച്ചില്ലെങ്കിലും നിന്ദിക്കരുത് ആ മരണത്തെ. കോഴിക്കോട് മാന്‍ഹോളില്‍ കുടുങ്ങിയവരെ രക്ഷിക്കുന്നതിനിടയില്‍ മരണമടഞ്ഞ നൗഷാദിന്റെ ത്യാഗത്തെ സ്മരിച്ച് നടന്‍ അനൂപ് മേനോനും. നൗഷാദിന്റെ ജാതിയുടെ പേരില്‍ കേരളത്തില്‍ ആരോപണ, പ്രത്യാരോപണങ്ങള്‍ കൊഴുക്കവെ ആ ത്യാഗത്തിന്റെ മഹത്വമറിയാതെ പോയ കേരള ജനതയെ പരോക്ഷമായി പരിഹസിച്ചും, ഒപ്പം നൗഷാദ് കാണിച്ചുതന്ന മനുഷ്യത്വത്തിന്റെ വിവരണവുമാണ് അനൂപ് മേനോന്‍ തന്റെ ഫേസ്ബുക്ക് പേജിലൂടെ പങ്കുവച്ചത്. അനൂപ് മേനോന്റെ ഫേസ്ബുക്ക് പോസ്റ്റില്‍നിന്ന്:
\'നൗഷാദ്... മരിക്കുന്നതിന് തൊട്ടുമുമ്പുവരെ നീ സ്‌നേഹമുള്ള ഒരു മനുഷ്യന്‍ മാത്രമായിരുന്നു... ഇന്ന് നിനക്കൊരു ജാതിയുണ്ട്.. അത് മാത്രമാണ് നീ എന്ന് പറയിപ്പിക്കാന്‍ നീ മരിക്കണ്ടായിരുന്നു.. രക്ഷപ്പെടുത്താന്‍ ശ്രമിച്ചു എന്ന കുറ്റബോധമില്ലാത്ത ആശ്വാസം കീശയിലിട്ട് നിരക്ക് കാത്തിരിക്കുന്ന ഭാര്യയിലേക്ക് തിരിച്ചുപോകാമായിരുന്നു... ഞാനുള്‍പ്പെടുന്ന ഭൂരിപക്ഷം ആളുകളും ചെയ്തുപോരാറുള്ളത് അതുതന്നെയാണല്ലോ.. നിനക്കുമൊരു കാഴ്ചക്കാരനായി നില്‍ക്കാമായിരുന്നു...
ആ മാന്‍ഹോളില്‍നിന്ന് മൃതദേഹങ്ങള്‍ പുറത്തെടുക്കുമ്പോള്‍ ഒരു സെല്‍ഫിയെടുത്ത് ഞാനും അവിടെയുണ്ടായിരുന്നുവെന്ന് പ്രസിദ്ധപ്പെടുത്താമായിരുന്നു... ഇന്ന് നിന്റെ ഓട്ടോയില്‍ സവാരി പോകുന്ന യാത്രക്കാരനോട് \'രണ്ട് വരുത്തന്മാര്‍ മയ്യത്തായതിന്റെ ഒരു ദൃക്‌സാക്ഷി വിവരണം നടത്താമായിരുന്നു... നിനക്ക് ഈ വൈകുന്നേരവും നിന്റെ പ്രീയപ്പെട്ട മിഠായി തെരുവിലൂടെ ഭാര്യയുടെ കയ്യും പിടിച്ച് ചുറ്റാമായിരുന്നു. നീ അത് ചെയ്തില്ല.. പകരം മറ്റ് രണ്ട് ജീവനും വേണ്ടി നീ മരിച്ചു...
കാണാമറയത്ത് ഇവിടെ നടക്കുന്ന കോമഡികള്‍ നീ കാണുന്നുവെങ്കില്‍..ചിരിക്കുക.. കാരണം, ആ മാന്‍ഹോളില്‍ അവസാനം ഉണ്ടായിരുന്നത് ഒരു മുസല്‍മാനും രണ്ട് ഹിന്ദുക്കളുമായിരുന്നില്ല എന്ന് നിനക്ക് മാത്രമല്ലേ അറിയൂ.. കൂട്ടുകാരാ, നീ ഞങ്ങള്‍ക്ക് പകര്‍ന്നുതന്നത് ഈ ലോകത്തിനെ സര്‍വ്വനാശത്തില്‍നിന്നും രക്ഷപ്പെടുത്താന്‍ കഴിയുന്ന ഒരേ ഒരു മരുന്നാണ്... അതിന് ഒരു നാമമില്ല, ജാതിയും..\'

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha