വിമര്‍ശനത്തിന് അതേ നാണയത്തില്‍ തിരിച്ചടിച്ച് കാഞ്ചനമാല. തന്നെ വിമര്‍ശിക്കുന്നവര്‍ക്ക് പുല്ലുവില മാത്രമേ കല്‍പ്പിക്കുന്നുള്ളുവെന്ന് കാഞ്ചനമാല. അവരുടെ വിമര്‍ശനത്തെ വിവരക്കേടായി മാത്രമേ കാണുന്നുള്ളൂ. ഒരു അഭിമുഖത്തില്‍ നടന്‍ സിദ്ദിഖ് തനിക്കെതിരെ ഉന്നയിച്ച വിമര്‍ശനത്തിന് മറുപടി പറയുകയായിരുന്നു കാഞ്ചനമാല. വിമര്‍ശകര്‍ വിമര്‍ശിക്കട്ടെ അവര്‍ക്ക് താന്‍ പുല്ലുവില മാത്രമേ കല്‍പ്പിക്കുന്നുള്ളൂ. പറയുന്നവര്‍ക്കും യോഗ്യത വേണ്ടേ.
മൊയ്തീനും കാഞ്ചനമാലയും തമ്മിലുള്ള പ്രണയം എങ്ങനെയായിരുന്നെന്നും എന്തായിരുന്നെന്നും മുക്കത്തെ എല്ലാവര്‍ക്കും അറിയാം. സിദ്ദിഖിന് എന്നെ അറിയില്ല. എനിക്ക് സിദ്ദിഖിനെയും. പരസ്പരം കണ്ടിട്ടു പോലുമില്ല. എനിക്ക് അറിയാവുന്നത് ദിലീപിനെയാണ്. അദ്ദേഹം എന്റെ ട്രസ്റ്റിന് സഹായവുമായി എത്തി. മറ്റ് കാര്യങ്ങളൊന്നും നോക്കാനോ ശ്രദ്ധിക്കാനോ ഉള്ള സമയവുമില്ല. കാഞ്ചനമാല പറഞ്ഞു.
എനിക്ക് ഒരു ശത്രുപക്ഷമുണ്ട്. സിദ്ദിഖും ശത്രുപക്ഷത്ത് പെട്ടുപോയതാകാം. ഇത്തരം കാര്യങ്ങള്‍ക്കൊന്നും കാഞ്ചനമാലയെ തളര്‍ത്താനാകില്ലെന്നും അവര്‍ പറഞ്ഞു. ഒരാളെ സ്‌നേഹിച്ചാല്‍ ജീവിതകാലം മുഴുവന്‍ അയാള്‍ക്കുള്ളതാണെന്നാണ് താന്‍ വിശ്വസിക്കുന്നത്. സിദ്ദിഖ് അടക്കം എല്ലാ നടന്‍മാരെയും ഇഷ്ടമാണെന്നും കാഞ്ചനമാല കൂട്ടിച്ചേര്‍ത്തു.
എന്ന് നിന്റെ മൊയ്തീന്‍ എന്ന സിനിമയെ വിമര്‍ശിച്ച് കാഞ്ചനമാല നടത്തിയ അഭിപ്രായ പ്രകടനങ്ങള്‍ക്കെതിരെയാണ് സിദ്ദിഖ് വിമര്‍ശനം ഉന്നയിച്ചത്. എല്ലാവരും സിനിമയെ പുകഴ്ത്തുമ്പോള്‍ കാഞ്ചനമാല കടന്നാക്രമിക്കാനാണ് ശ്രമിച്ചത്. അങ്ങനെയൊരു സ്ത്രീ എങ്ങനെയാണ് മഹത്വമര്‍ഹിക്കുന്നത്. കാഞ്ചനമാലയെപ്പോലെ നിരവധി പേര്‍ സംസ്ഥാനത്തിന്റെ പല ഭാഗത്തുമുണ്ട് അവരുടെ പ്രണയത്തിന് മാത്രം കൊട്ടിഘോഷിക്കപ്പെടുന്ന മഹത്വം ഇല്ലെന്നുമായിരുന്നു സിദ്ദിഖിന്റെ വിമര്‍ശനം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha