ശ്രീനാഥുമായുള്ള വിവാഹശേഷം സിനിമ ഉപേക്ഷിച്ച ശാന്തികൃഷ്ണ പിന്നീട് മമ്മൂട്ടിയുടെ നായികയായി മടങ്ങിെയത്തിയത് സാമ്പത്തിക പ്രതിസന്ധിമൂലമെന്ന് നടി ശാന്തികൃഷ്ണ.ബാലചന്ദ്ര മേനോന്‍ സംവിധാനം ചെയത 'നയം വ്യക്തമാക്കുന്നു' എന്ന ചിത്രത്തിലൂടെയായിരുന്നു ശാന്തിയുടെ തിരിച്ചു വരവ്. വിവാഹശേഷം സിനിമ ഉപേക്ഷിച്ചു ഭാര്യയെന്ന പദവിയിലേക്ക് ഒതുങ്ങിയ ശാന്തികൃഷ്ണ തിരിച്ചെത്തിയപ്പോള്‍ മലയാളികള്‍ ഇരുകൈയും നീട്ടി സ്വീകരിച്ചിരുന്നു.
പ്രസവശേഷം കുഞ്ഞിന്റെ മരണവും തുടര്‍ന്നുണ്ടായ സാമ്പത്തിക പ്രതിസന്ധിയുമാണ് ശാന്തിയെ സിനിമയിലേക്ക് വീണ്ടും എത്തിച്ചത്. ഒരു വാരികയ്ക്ക് നല്‍കിയ അഭിമുഖത്തിലാണ് ശ്രീനാഥുമൊത്തുള്ള ജീവിതത്തെക്കുറിച്ചു വെളിപ്പെടുത്തുന്നത്. 
വിവാഹശേഷം കുറച്ചു വര്‍ഷങ്ങള്‍ക്കു ശേഷമാണ് ഞാന്‍ ഗര്‍ഭിണിയായത്. എന്നാല്‍ പ്രവസത്തോടെ കുഞ്ഞ് മരിച്ചത് വലിയ ആഘാതമായി. സമയം കഴിഞ്ഞിട്ടും ചെന്നൈയിലെ ആശുപത്രിയിലെ ഡോക്ടര്‍മാര്‍ സിസേറിയന്‍ നടത്താതിരുന്നതാണ് കുഞ്ഞിനെ നഷ്ടപ്പെടാന്‍ കാരണമെന്ന് പിന്നീട് പലരും പറഞ്ഞ് അറിഞ്ഞു. നോര്‍മല്‍ ഡെലിവറിക്കായി അവര്‍ കാത്തിരിക്കുകയായിരുന്നു. എന്റെ ആദ്യത്തെ കണ്‍മണി പെണ്‍കുഞ്ഞായിരുന്നു. 18 മണിക്കൂറോളം മാത്രമായിരുന്നു മോള്‍ക്ക് ആയുസ്. ഇതോടെ ഞാന്‍ ഡിപ്രഷനിലായി.
ശ്രീനാഥിനും അതു വലിയ ആഘാതമായി. കുടുംബജീവിതം ആകെ ഉലയുന്ന അവസ്ഥ. ഒപ്പം ശ്രീനാഥിന് സിനിമയില്‍ അവസരം കുറഞ്ഞു. ചില സാമ്പത്തിക പ്രതിസന്ധികളും ഞങ്ങള്‍ക്കുണ്ടായി. അപ്പോഴാണ് 'നയം വ്യക്തമാക്കുന്നു' എന്ന സിനിമയില്‍ നായികയായി മേനോന്‍ വിളിക്കുന്നത്. താല്‍പ്പര്യമില്ല എന്നായിരുന്നു എന്റെ ആദ്യ മറുപടി. പിന്നീട് മമ്മൂട്ടി വിളിച്ചു നിര്‍ബന്ധിച്ചു. കരുത്തുറ്റ കഥാപാത്രമാണ്. ചെയ്തൂടേ എന്ന്. അങ്ങനെയാണ് തിരിച്ചുവരവ് സംഭവിച്ചത്. പിന്നീട് തുടര്‍ച്ചയായി മികച്ച കഥാപാത്രങ്ങള്‍ ലഭിച്ചു. വിഷ്ണുലോകവും കൗരവറും പിന്‍ഗാമിയും ചകോരവും അടക്കം ഓര്‍മയില്‍ തങ്ങിനില്‍ക്കുന്ന ഒരുപിടി കഥാപാത്രങ്ങള്‍. അങ്ങനെ എല്ലാം മറന്ന് ഞാന്‍ വീണ്ടും സിനിമയുടെ ഭാഗമായി.