നൂറ് ദിനമെന്ന ലക്ഷ്യവുമായി പ്രേക്ഷകര്‍ക്ക് മുന്നിലെത്തിയ ബിഗ് ബോസ് മലയാളം ഗ്രാന്റ് ഫിനാലെ അവസാനിച്ചിരിക്കുകയാണ്. സാബുവായിരിക്കും വിജയിക്കുകയെന്ന തരത്തിലുള്ള പ്രവചനങ്ങള്‍ നേരത്തെ തന്നെ നടന്നിരുന്നു. പ്രേക്ഷകരുടെ പ്രതീക്ഷ തെറ്റിയില്ല. ബിഗ് ബോസ് മലയാളം ഷോയിലെ വിജയി തരികിട സാബു തന്നെ. 

കോണ്‍ഫിഡന്റ്ഗ്രൂപ്പ് നല്‍കിയ ഒരു കോടി രൂപയാണ് സമ്മാനമായി നേടിയത്. 18 താരങ്ങളാണ് ബിഗ് ബോസ് കുടുംബത്തിലേക്ക് എത്തിയത്. 60 ക്യാമറകള്‍ക്ക് മുന്നില്‍ പുറം ലോകവുമായി ബന്ധമില്ലാതെ 100 ദിവസങ്ങളാണ് മല്‍സരാര്‍ത്ഥികള്‍ ജീവിച്ചത്.

ടാസ്‌ക്കുകളിലെ പ്രകടനം മാത്രമല്ല പ്രേക്ഷകരുടെ വോട്ടിങ്ങും ഏറെ നിര്‍ണ്ണായകമായിരുന്നു ബിഗ് ബോസിന്. സാബു, സുരേഷ്, ശ്രിനിഷ്, ഷിയാസ്, പേളി മാണി എന്നിവരായിരുന്നു ഫിനാലെയിലേക്കെത്തിയതെങ്കിലും അവസാന നിമിഷത്തെ ട്വിസ്റ്റിലൂടെ സുരേഷും ശ്രീനിയും പുറത്തേക്ക് പോവുകയായിരുന്നു.

സാബുവും ഷിയാസും പേളിയുമായിരുന്നു മത്സരത്തില്‍ അവശേഷിച്ചിരുന്നത്. മത്സരാര്‍ത്ഥികളും പ്രേക്ഷകരുമെല്ലാം ഒരുപോലെ കാത്തിരിക്കുകയായിരുന്നു ആരാണ് അന്തിമ വിജയിയെന്നറിയാനായി. മൂന്ന് പേരുടെയും ബിഗ് ബോസ് യാത്രയെക്കുറിച്ചുള്ള വീഡിയോ ക്ലിപ്പിങ്ങുകളും ബിഗ് ബോസ് കാണിച്ചിരുന്നു.

മൂന്ന് പേരില്‍ നിന്നും ആദ്യം പുറത്തേക്കെത്തിയത് ഷിയാസായിരുന്നു. ടാസ്‌ക്ക് പെര്‍ഫോം ചെയ്യുന്ന സഥലത്ത് നിന്നും മോഹന്‍ലാല്‍ അദ്ദേഹത്തെ വേദിയിലേക്ക് വിളിക്കുകയായിരുന്നു. മത്സരത്തില്‍ ഇപ്പോഴുള്ളവരെല്ലാം തന്നെക്കാളും കഴിവുള്ളവരാണെന്നായിരുന്നു ഷിയാസ് പറഞ്ഞത്.

സാബുവിനെ മുതിര്‍ന്ന ചേട്ടനായും പേളിയെ ചേച്ചിയായും അനിയത്തിയായുമൊക്കെയാണ് കാണുന്നതെന്നാണ് താരം പറഞ്ഞത്. നാളുകള്‍ക്ക് ശേഷം എല്ലാവരെയും കണ്ടപ്പോള്‍ വിറയ്ക്കുകയാണെന്നും താരം പറഞ്ഞിരുന്നു. ജയിക്കണമെന്നാഗ്രഹിച്ച് മത്സരത്തില്‍ തുടര്‍ന്നയാളായിരുന്നു താരം. അദ്ദേഹം കൂടി പുറത്തെത്തിയതോടെയാണ് കാഴ്ചക്കാരുടെ ആകാംക്ഷ വര്‍ധിച്ചത്.

ഷിയാസ് തനിക്കൊപ്പമുണ്ടെന്നും സുരക്ഷിതനായി ഇവിടയെത്തിയിട്ടുണ്ടെന്നും മോഹന്‍ലാല്‍ പറഞ്ഞിരുന്നു. പേളി മാണിയും സാബുവുമായിരുന്നു ബിഗ് ഹൗസില്‍ അവശേഷിച്ചിരുന്നത്. ബിഗ് ബോസ് മലയാള പതിപ്പിലെ ശക്തരായ രണ്ട് മത്സരാര്‍ത്ഥികള്‍, ഇവരിലാരായിരിക്കും വിജയിക്കുന്നതെന്ന ആകാംക്ഷയോടെയാണ് മത്സരാര്‍ത്ഥികളും സദസ്സും പരിപാടി വീക്ഷിച്ചത്. മികച്ച സ്വീകാര്യതയും പ്രേക്ഷക പിന്തുണയുമാണ് ഇരുവര്‍ക്കും ലഭിച്ചത്.