കൈക്കുഞ്ഞുമായി പരീക്ഷയ്ക്കെത്തിയ അമ്മയെ സഹായിച്ച പോലീസ് താരമായി; അമ്മയ്ക്ക് സഹായ ഹസ്തവുമായെത്തിയ പൊലീസുകാരന് സോഷ്യല് മീഡിയയുടെ കൈയടി
നന്മയുടെ അംശം വറ്റാത്തവര് പോലീസില് ഇപ്പോഴുമുണ്ടെന്ന് വെളിവാക്കുന്നതാണ് ഈ സംഭവം. നാല് മാസം പ്രായമുള്ള കൈക്കുഞ്ഞുമായി പരീക്ഷ എഴുതാനെത്തിയ അമ്മയ്ക്ക് സഹായ ഹസ്തവുമായെത്തിയ പൊലീസുകാരന് സോഷ്യല് മീഡിയയുടെ കൈയടി. അമ്മ പരീക്ഷ എഴുതുമ്പോള് എക്സാം ഹാളിന് പുറത്ത് വാവിട്ട് കരഞ്ഞ കുഞ്ഞിനെ കൈകളിലിരുത്തി താലോലിക്കുന്ന പൊലീസുകാരന്റെ ചിത്രം ഇതിനോടകം തന്നെ വൈറലായിട്ടുണ്ട്. തെലങ്കാനയിലെ ഐ.പി.എസ് ഓഫീസറായ രേമ രാജേശ്വരിയാണ് ട്വിറ്ററിലൂടെ ചിത്രം പുറത്ത് വിട്ടത്.
തെലങ്കാന പൊലീസിനെ ഹെഡ് കോണ്സ്റ്റബിളായ മുജീബുല് റഹ്മാനാണ് ചിത്രത്തില് കുഞ്ഞിനെ താലോലിക്കുന്നത്. ഹൈദരാബാദിലെ മൂസാപേട്ട് പൊലീസ് സ്റ്റേഷനിലാണ് മുജീബ് ജോലി ചെയ്യുന്നത്. കഴിഞ്ഞ ദിവസം നടന്ന തെലങ്കാന പൊലീസ് പരീക്ഷയുടെ സുരക്ഷാ ഡ്യൂട്ടിക്കായാണ് മുജീബ് മഹബൂബ്നഗറിലെ ബോയ്സ് ജൂനിയര് കോളേജിലെത്തിയത്. ഇവിടെ വച്ചാണ് അമ്മയെ കാണാതെ കരയുന്ന ഒരു കുട്ടിയെ ഇയാള് കാണുന്നതും കൈകളിലെടുത്ത് കൊഞ്ചിക്കുന്നതും. പാവപ്പെട്ട കുടുംബത്തിലെ അംഗമായ പെണ്കുട്ടി പൊലീസില് ജോലി നേടണമെന്ന ആഗ്രത്തിലാണ് കുട്ടിയുമായി ഹാളിലെത്തിയത്. കൂടെയുണ്ടായിരുന്ന 14 വയസുകാരിയെയാണ് കുഞ്ഞിനെ നോക്കാന് ഏല്പ്പിച്ചത്. എന്നാല് കുഞ്ഞ് നിറുത്താതെ കരഞ്ഞതിനാലാണ് താന് ഇടപെട്ടതെന്ന് മുജീബ് വിശദീകരിക്കുന്നു.
48കാരനായ മുജീബിന് രണ്ട് മക്കളുണ്ട്. ഒരാള് ചൈനയില് മെഡിസിന് പഠിക്കുന്നു. മകള് അടുത്ത വര്ഷം സ്കൂള് വിദ്യാഭ്യാസം പൂര്ത്തിയാക്കും. തന്റെ ജോലിയെ ആത്മാര്ത്ഥമായി സ്നേഹിക്കുന്നത് കൊണ്ടാണ് ഇത്തരം സാഹചര്യങ്ങളില് ഇടപെടാന് കഴിയുന്നതെന്ന് മുജീബ് വിശദീകരിക്കുന്നു. പൊതുജനങ്ങളെ സേവിക്കുകയാണ് തന്റെ ജോലി. അതിനേക്കാള് വലുതായി തനിക്കൊന്നുമില്ലെന്നും അദ്ദേഹം ഒരു പ്രതികരിച്ചു.
https://www.facebook.com/Malayalivartha