മഞ്ചേരിയിൽ ഹൈപ്പര്‍ മാര്‍ക്കറ്റ് ഉദ്ഘാടനത്തിന് എത്താന്‍ വൈകിയെന്ന് ആരോപിച്ച് നടി നൂറിന്‍ ഷെരീഫിനെ കയ്യേറ്റം ചെയ്യാൻ ശ്രമം നടത്തി ജനക്കൂട്ടം. താരം എത്തിയതോടെ കാറിന് ചുറ്റം ജനക്കൂട്ടം തടിച്ചുകൂടുകയും കാറിന് മേലെ ഇടിക്കുകയും ചെയ്തു. അതിനിടെ കൂട്ടത്തിലുണ്ടായിരുന്ന ചിലരുടെ കൈ തട്ടി മൂക്കിന് പരിക്കേറ്റു. വേദന കടിച്ചമർത്തി നൂറിൻ ഉദ്ഘാടന ചടങ്ങിനെത്തിയ ജനങ്ങളോട് സംസാരിക്കുന്ന ദൃശ്യങ്ങളും പുറത്ത് വന്നിട്ടുണ്ട്. പറഞ്ഞ സമയത്ത് തന്നെ താന്‍ സ്ഥലത്ത് എത്തിയെന്നും സംഘാടകരാണ് ആളുകള്‍ കൂടുതല്‍ വരട്ടെ എന്ന് പറഞ്ഞ് പരിപാടി നീട്ടിയതെന്നുമാണ് നൂറിൻ കാണികളോട് വ്യക്തമാക്കിയത്.

ആൾക്കൂട്ട ബഹളത്തിനിടെയാണ് താരത്തിന് മൂക്കിന് ഇടി കിട്ടിയത്. ഇടിയുടെ ആഘാതത്തിൽ മൂക്കിന്റെ ഉൾവശത്ത് ചെറിയ ക്ഷതമുണ്ടായി. നൂറിൻ വേദിയിലെത്തിയതോടെ ജനക്കൂട്ടം ബഹളവും ശകാരവർഷവും ആരംഭിച്ചു. ബഹളം അനിയന്ത്രിതമായതോടെയാണ് നൂറിൻ തന്നെ മൈക്കെടുത്ത് സംസാരിക്കാൻ തുടങ്ങിയത്.  ഇടിയേറ്റ മൂക്ക് പൊത്തിപ്പിടിച്ച് വിതുമ്പിക്കൊണ്ടാണ് നൂറിൻ ജനങ്ങളോട് സംസാരിച്ചുതുടങ്ങിയത്.'ഞാന്‍ പറയുന്നത് ഒന്ന് കേള്‍ക്കൂ. കുറച്ച് നേരത്തേയ്ക്ക് ബഹളം വയ്ക്കാതിരിക്കൂ. എന്നോട് ഒരു ഇത്തിരി ഇഷ്ടമുണ്ടെങ്കില്‍ ഞാന്‍ പറയുന്നത് ഒന്ന് കേള്‍ക്കൂ, ഞാന്‍ വരുന്ന വഴിക്ക് ആരൊക്കെയോ എന്റെ മൂക്കിന് ഇടിച്ചു. ആ വേദനയും കരച്ചിലും വന്നാണ് ഞാന്‍ ഇരിക്കുന്നത്' എന്നു പറഞ്ഞുകൊണ്ടാണ് നൂറിന്‍ സംസാരിച്ചുതുടങ്ങിയത്. ചടങ്ങിന് എത്താന്‍ വൈകിയതിന് താനല്ല ഉത്തരവാദിയെന്നും നൂറിന്‍ പറഞ്ഞു. പിന്നീട് നൂറിന്‍ തന്നെ ജനങ്ങളെ സമാധാനിപ്പിച്ചാണ് ചടങ്ങ് തുടര്‍ന്നത്. ഒന്നര മണിക്കൂറോളം അവിടെ ചെലവിട്ടാണ് നൂറിന്‍ മടങ്ങിയത്.

നാലു മണിക്കാണ് ചടങ്ങ് എന്നാണ് നേരത്തെ പറഞ്ഞിരുന്നത്. ഇതനുസരിച്ച് നാലു മണിക്ക് തന്നെ നൂറിനും അമ്മയും മഞ്ചേരിയിലെ ഹോട്ടലില്‍ എത്തി. എന്നാല്‍, ആളുകള്‍ കൂടുതല്‍ വരട്ടെ എന്നു പറഞ്ഞ് സംഘാടകര്‍ തങ്ങളോട് വൈകീട്ട് ആറു മണിവരെ ഹോട്ടലില്‍ നില്‍ക്കാന്‍ ആവശ്യപ്പെടുകയായിരുന്നുവെന്ന് നൂറിന്റെ അമ്മയും വ്യക്തമാക്കി. അവര്‍ പറഞ്ഞത് പ്രകാരം ആറ് മണിക്ക് എത്തിയപ്പോഴാണ് ജനക്കൂട്ടം ആക്രമാസക്തരായത്. നൂറിന്റെ മൂക്കിന്റെ ഉള്‍വശത്ത് നേരിയ ക്ഷതമുണ്ടായിട്ടുണ്ടെന്നും നൂറിന്റെ അമ്മ പറഞ്ഞു.

നാലു മണിക്ക് നിശ്ചയിച്ച മഞ്ചേരിയിലെ ഹൈപ്പര്‍മാര്‍ക്കറ്റ് ഉദ്ഘാടനത്തിന് നൂറിന്‍ സമയത്ത് തന്നെ എത്തിയിരുന്നു. എന്നാല്‍ ആളു കൂടാന്‍ വേണ്ടി സംഘാടകര്‍ താരത്തെ വേദിയിലെത്തിച്ചത് ആറു മണിക്കാവുകയായിരുന്നു. ഇതോടെ കാത്തിരുന്ന് മുഷിഞ്ഞ ജനങ്ങള്‍ കൂക്കി വിളിക്കുകയും അസഭ്യ വര്‍ഷം നടത്തുകയും കയ്യേറ്റ ശ്രമത്തിനിടെ ബഹളത്തിനിടയില്‍ താരത്തിന്‍റെ മൂക്കിന് ഇടിയേല്‍ക്കുകയായിരുന്നു.  ഉദ്ഘാടനത്തിനെത്തിയവര്‍ തന്നെ ഇതിന്‍റെ ദൃശ്യങ്ങള്‍ പകര്‍ത്തി യൂട്യൂബില്‍ ഇടുകയായിരുന്നു. സംഭവത്തിന്റെ നിജസ്ഥിതി അറിയാതെ വലിയ ചര്‍ച്ചയാണ് ഈ വീഡിയോയ്ക്ക് താഴെ ഇപ്പോൾ നടക്കുന്നത്.