ഷാറൂഖ് ഖാന്‍ എനിക്ക് പ്രിയപ്പെട്ടവന്‍...
ഷാറൂഖ് ഖാന്‍ തനിക്ക് ഏറെ പ്രിയപ്പെട്ട സെലിബ്രിറ്റിയാണെന്ന് രഞ്ജിനി ഹരിദാസ്. ഒരു പ്രമുഖ ഓണ്‍ലൈന് നല്‍കിയ അഭിമുഖത്തിലാണ് രഞ്ജിനി മനസ് തുറന്നത്. മറഡോണ, സച്ചിന്‍ തെന്‍ഡുല്‍ക്കര്‍, അമിതാഭ് ബച്ചന്‍ ഇവരെയൊക്കെ അവതരിപ്പിക്കാന്‍ എനിക്ക് കഴിഞ്ഞിട്ടുണ്ട്. പക്ഷേ, ഹു ഈസ് ദ ബിഗ് സെലിബ്രിറ്റി എന്ന ചോദ്യത്തിന് ഒരേയൊരു ഉത്തരമേ എനിക്കുള്ളു, കിങ് ഖാന്‍.
ഷാറൂഖിനെ ആദ്യം കാണുമ്പോള്‍ ഞാന്‍ അല്‍പം എക്‌സൈറ്റഡ് ആയിരുന്നു. ദില്‍ തോ പാഗല്‍ ഹെ, കുഛ് കുഛ് ഹോത്താ ഹെ തുടങ്ങിയ സിനിമകള്‍ ഞാന്‍ ആവേശത്തോടെയാണ് കണ്ടത്. ഖാന്മാരില്‍ ഏറ്റവും ഇഷ്ടം ഷാറൂഖിനോടാണ്. സൂപ്പര്‍ സ്റ്റാര്‍ ആയിരിക്കെ തന്നെ വളരെ ലൈറ്റ് ആയി, ഇന്റിമേറ്റ് ആയി അദ്ദേഹം വേദിയില്‍ നില്‍ക്കുന്നു. ടിവി ഷോ ആയാലും വേദിയിലായാലും പബ്ലിക്കിനെ തന്റേതാക്കി മാറ്റാനുള്ള സൂത്രവിദ്യ അദ്ദേഹത്തിനറിയാം.
വിശദീകരിക്കാനാകാത്ത, പ്രണയത്തിനോട് സാമ്യമുള്ള ഒരു ആകര്‍ഷണം അദ്ദേഹത്തിനുണ്ട്. കട്ടെടുക്കാന്‍ തോന്നുന്ന ഒരു എനര്‍ജി. ദുബായിലെ ഒരു സ്‌റ്റേജ് ഷോ. ഷാറൂഖ് വേദിയിലേക്ക് കടന്നു വരുന്നതായി ഞാന്‍ അനൗണ്‍സ് ചെയ്തു. മൈക്ക് മറ്റൊരാള്‍ക്ക് കൈമാറി ഞാന്‍ അദ്ദേഹത്തെ സദസിലേക്ക് ആനയിച്ചു. ബാക്കി അനൗണ്‍സ്‌മെന്റിനായി മൈക്ക് ഡയസിനടുത്തെത്തിയ എനിക്ക് മൈക്ക് ഇല്ല. മൈക്ക് തരേണ്ട ആള്‍ ഷാറൂഖിനെ കണ്ട് മതി മറന്നു നില്‍ക്കുകയാണ്. ബാക്ക് സ്‌റ്റേജില്‍ പല ജോലികളിലുള്ളവര്‍ മുഴുവന്‍ വേദിയുടെ വശങ്ങളില്‍ അണിനിരന്നിരിക്കുന്നു. രണ്ടു മൂന്നു മിനിറ്റു നേരത്തേക്ക് എല്ലാവരും സ്വന്തം കടമകള്‍ മറന്ന് ഷാറൂഖ് എന്ന മനുഷ്യനിലേക്ക് തിരിഞ്ഞ കാഴ്ച എന്നെ ശരിക്കും അതിശയിപ്പിച്ചു. ഷാറൂഖ് ചൊരിയുന്ന എനര്‍ജി അത്രയധികമാണ്.
ജനങ്ങളെ സന്തോഷിപ്പിക്കാനായി ജനിച്ച ഒരാളാണെന്നു തോന്നും ഷാറൂഖ്. പബ്ലിക്കിനെ സന്തോഷിപ്പിക്കാന്‍ അദ്ദേഹം എന്തും ചെയ്യും. ഡാന്‍സ് കളിക്കണോ, തുള്ളിച്ചാടണോ, ഷര്‍ട്ട് ഊരണോ, ആരവങ്ങളില്‍ മുഴങ്ങുന്നതെന്തും അനുസരിക്കുന്നൊരാള്‍. എത്ര നേരം വേണമെങ്കിലും സ്‌റ്റേജില്‍ നില്‍ക്കും, ക്ഷമയോടെ, ഇഷ്ടത്തോടെ...
ബഹുമാനം, അത് അദ്ദേഹം എല്ലാവര്‍ക്കും കൊടുക്കുന്നു. അവതാരകരോട് ഇന്ററാക്റ്റ് ചെയ്യാന്‍ ശ്രദ്ധിക്കുന്നു. ഒരു ഷോയില്‍ അദ്ദേഹത്തിന്റെ കൈയില്‍ ചുറ്റിപ്പിടിച്ച് ഞാന്‍ നിന്നു. ഒരു സെലിബ്രിറ്റിയോട് നമുക്ക് ഒരിക്കലും ഓവര്‍ ഫ്രീഡം എടുക്കാന്‍ പറ്റില്ല. എന്നിട്ടും എനിക്കത് സാധിച്ചത് അദ്ദേഹം എന്നെ ആ വിധത്തില്‍ കംഫര്‍ട്ടബിള്‍ ആക്കിയതു കൊണ്ടാണ്.
അവിടെയും മലയാളികള്‍ അല്‍പം വ്യത്യസ്തരാണെന്ന് പറയാതെ വയ്യ. ഛമ്മാ ഛല്ലോ എന്ന ഗാനത്തിനൊത്ത് ഷാറൂഖും പെണ്‍കുട്ടികളുടെ ടീമും കൂടി അവതരിപ്പിച്ച ഡാന്‍സ് വേദിയെ ഇളക്കി മറിച്ചു. ഷോ കഴിഞ്ഞ് കുറച്ചു ദിവസങ്ങള്‍ കഴിഞ്ഞപ്പോള്‍ എന്റെ വീട്ടില്‍ പോലീസ് ചോദ്യം ചെയ്യാന്‍ വന്നു. ഒരു മലയാളി, കഴിഞ്ഞ ഷോയ്ക്ക് എതിരേ കേസ് കൊടുത്തിരിക്കുന്നു. സംഗതി ഇതാണ്. മലയാളികളുടെ സംസ്‌കാരം പരിഗണിക്കാതെ ഒരു സെലിബ്രിറ്റി അല്‍പവസ്ത്രധാരികളായ പെണ്‍കുട്ടികളുടെ കൂടെ സ്‌റ്റേജില്‍ അഴിഞ്ഞാടി. കേസിലെ ഒന്നാംപ്രതി ഷാറൂഖ് ഖാന്‍, രണ്ടാം പ്രതി ഞാന്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്Likeചെയ്യുക
https://www.facebook.com/Malayalivartha
