ആരാധകര്‍ക്ക് ഇനിയും ഉള്‍ക്കൊള്ളാനാവാത്ത വേര്‍പാടിന് ഇന്നേയ്ക്ക് 5 വര്‍ഷം
ആരാധകര്‍ക്ക് ഇനിയും ഉള്‍ക്കൊള്ളാനാവാത്ത തങ്ങളുടെ പ്രിയപ്പെട്ട മണിയുടെ വേര്‍പാടിന് ഇന്നേയ്ക്ക് 5 വര്‍ഷം. വെള്ളിത്തിരയിലെ വിസ്മയ വേഷപ്പകര്‍ച്ച കൊണ്ട് മാത്രമായിരുന്നില്ല കലാഭവന്‍ മണി പ്രേക്ഷകമനസില്‍ കൂടുകൂട്ടിയത്. സിനിമാക്കഥയെ വെല്ലുംവിധമായിരുന്നു ആ ജീവിതവും. ഒരു മിന്നാമിനുങ്ങിന്റെ ജീവിതം പോലെ തിളക്കമാര്‍ന്ന ഓര്‍മ്മകള്‍ സമ്മാനിച്ച് തിടുക്കത്തിലായിരുന്നു ജനകീയ നടന്‍ യാത്രയായത്.
തെന്നിന്ത്യന്‍ ചലച്ചിത്ര ലോകത്തെ മുഴുവന്‍ ത്രസിപ്പിക്കുന്നതായിരുന്നു ഹാസ്യതാരമായും സഹനടനായും നായകനായും വില്ലനായുമൊക്കെയുള്ള ആ വേഷപ്പകര്‍ച്ചകള്‍. മിമിക്രിക്കാരന്റെ അഭിനയമെന്ന കുറ്റപ്പെടുത്തലുകള്‍ക്കുള്ള മറുപടിയായിരുന്നു രാമുവും ചെമ്ബനും ലൂയി പാപ്പനുമെല്ലാം. നാടന്‍ പാട്ടിനെ ഇത്രയധികം ജനകീയമാക്കിയ മറ്റൊരു കലാകാരനും ഇല്ല. പ്രായമായവരും ചെറുപ്പക്കാരും ഒരു പോലെ ആ ഗാനങ്ങളെ ചുണ്ടോടുചേര്‍ത്തു. പച്ചയായ ജീവിതം കുറിക്കുന്ന ആ പാട്ടുകള്‍ തന്നെയാണ് മണിയെ തങ്ങളിലൊരാളായി ജനങ്ങള്‍ സ്വീകരിക്കാന്‍ കാരണവും. വിജയ ഗാഥകള്‍ രചിക്കുമ്‌ബോഴും പിന്നിട്ട വഴികള്‍ വിസ്മരിക്കാതെ സമൂഹത്തിലെ അശരണര്‍ക്ക് താങ്ങും തണലുമായ കലാകാരന്‍. ചാലക്കുടി എന്ന കലാഭവന്‍ മണിയുടെ രാജ്യത്തില്‍ അദ്ദേഹം സ്വാധീനിക്കാത്ത ആരെയും കാണുമായിരുന്നില്ല. ഒന്നുമില്ലായ്മയില്‍ നിന്ന് എല്ലാമായ് മാറിയ ആ പ്രതിഭ ബാക്കിവെച്ചത് നികത്താനാവാത്ത വലിയ ശൂന്യത മാത്രം.
https://www.facebook.com/Malayalivartha
