സഞ്ചരിക്കുന്ന കാന്‍സര്‍ രോഗനിര്‍ണയ ക്ലിനിക്കുമായി താര സംഘടനയായ അമ്മ
സഞ്ചരിക്കുന്ന കാന്‍സര്‍ രോഗനിര്‍ണയ ക്ലിനിക്കുമായി താര സംഘടനയായ അമ്മ എത്തുന്നു. ഇന്ന് കൊച്ചിയില്‍ ചേര്‍ന്ന ജനറല്‍ബോഡി യോഗത്തിലാണ് ഇക്കാര്യത്തില്‍ തീരുമാനമായത്. മാമോഗ്രാം അടക്കമുള്ള സജ്ജീകരണങ്ങളുള്ള ബസുകളായിരിക്കും ക്ലിനിക്കുകളായി പ്രവര്‍ത്തിക്കുന്നതെന്ന് അമ്മ പ്രസിഡന്റ് ഇന്നസെന്റ് പറഞ്ഞു.
ഗ്രാമീണ മേഖലയിലാകും ബസുകള്‍ രോഗനിര്‍ണയം നടത്തുന്നതിനായി സഞ്ചരിക്കുക. നാല് മാസത്തിനുള്ളില്‍ ബസുകള്‍ നിരത്തിലിറങ്ങും. കാന്‍സര്‍ രോഗത്തെ തുടക്കത്തില്‍ തന്നെ കണ്ടെത്തി ചികിത്സ തേടാന്‍ സൗകര്യമൊരുക്കാനാണ് സംഘടനയുടെ തീരുമാനമെന്ന് ഇന്നസെന്റ് പറഞ്ഞു. നിയമസഭാ തെരഞ്ഞെടുപ്പില്‍ വിജയിച്ച താരങ്ങളെ അനുമോദിക്കുകയും ചെയ്തു.
ജഗദീഷും സലീംകുമാറും യോഗത്തില്‍ നിന്നും വിട്ടുനിന്നു. പിറന്നാള്‍ ആയതിനാല്‍ ക്ഷേത്രദര്‍ശനത്തില്‍പ്പെട്ട സുരേഷ് ഗോപിയും യോഗത്തില്‍ പങ്കെടുത്തില്ല. താരങ്ങളായ മോഹന്‍ലാല്‍, ദിലീപ്, മമ്മൂട്ടി, ഇന്നസെന്റ്, ദുല്‍ഖര്‍ സല്‍മാന്‍, ജയസൂര്യ, സിദ്ദിഖ്, നിവിന്‍ പോളി, കാവ്യ മാധവന്‍, മിയ, ഗോപിക, ലക്ഷ്മി ഗോപാലസ്വാമി, മീരാ നന്ദന്‍, സനൂഷ തുടങ്ങിയ നിരവധി താരങ്ങള്‍ യോഗത്തില്‍ പങ്കെടുത്തു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
