മഞ്ജുവാര്യര്‍ പ്രതിഫലം കൂട്ടിയെന്ന് ഓണ്‍ലൈന്‍ സൈറ്റുകളിലും സോഷ്യല്‍ മീഡിയയിലും ചിലര്‍ ബോധപൂര്‍വം വ്യാജപ്രചരണം നടത്തുന്നു. ഒരു കോടിയിലധികം രൂപ പ്രതിഫലം കൈപ്പറ്റുന്നു എന്നാണ് ഇവര്‍ പറയുന്നത്. എന്നാല്‍ മലയാളി വാര്‍ത്ത നടത്തിയ അന്വേഷണത്തില്‍ ഇക്കാര്യം ശരിയല്ലെന്ന് ബോധ്യമായി. അവസാനം അഭിനയിച്ച കരിങ്കുന്നം സിക്‌സസിനായി 55 ലക്ഷം രൂപയാണ് താരം പ്രതിഫലം വാങ്ങിയത്. മൂന്നരക്കോടിയായിരുന്നു ബജറ്റ്. എന്നാല്‍ ചിത്രത്തിന്റെ ക്‌ളൈമാക്‌സില്‍ സ്‌റ്റേഡിയത്തിലുള്ള ഐസ്‌ക്രീമിന്റെയും മറ്റും പരസ്യം മഞ്ജു സംഘടിപ്പിച്ച് കൊടുത്തതാണ്. അതുവഴി നിര്‍മാതാവിന് 40 ലക്ഷം രൂപയാണ് ലഭിച്ചത്.

ചുരുക്കം പറഞ്ഞാല്‍ നിര്‍മാതാവിന് 15 ലക്ഷം രൂപയേ മഞ്ജുവിനായി മുടക്കേണ്ടി വന്നുള്ളു. 40 ലക്ഷം പരസ്യ ഇനത്തില്‍ ലഭിച്ചു. ഇത്തരത്തില്‍ നിര്‍മാതാവിനെ സഹായിച്ചത് ചിലര്‍ക്ക് ഇഷ്ടപ്പെട്ടില്ല. അവരാണ് താരത്തിനെതിരെ സോഷ്യല്‍ മീഡിയയിലൂടെ ആക്രമണം നടത്തുന്നത്. മലയാളത്തിലെ എല്ലാ താരങ്ങളും പരാജയപ്പെട്ട നിര്‍മാതാവിനെ രക്ഷപെടുത്താന്‍ ശ്രമിക്കാറില്ല എന്നത് സത്യമാണ്. മഞ്ജു താന്‍ അഭിനയിച്ച പരസ്യകമ്പനിയുമായി ധാരണയുണ്ടാക്കി ഇത്തരത്തില്‍ സാമ്പത്തിക നേട്ടം ഉണ്ടാക്കിയത് പലരെയും ചൊടിപ്പിച്ചിട്ടുണ്ട്. മഞ്ജുവിന്റെ ഇടപെടല്‍ കൂടി ഉള്ളത് കൊണ്ടാണ് നിര്‍മാതാവിന് കൈ പൊള്ളാതെ പോയത്.
അതേസമയം താന്‍ ഒറ്റയ്ക്ക് ചിത്രങ്ങള്‍ ചെയ്യുന്നത് താരം അവസാനിപ്പിക്കുകയാണ്. സ്വന്തം റിസ്‌ക്കില്‍ സിനിമ ചെയ്യുന്നത് വലിയ ഭാരമായി തീരുകയാണെന്നും താരം അടുത്ത സിനിമാക്കാരോട് പറഞ്ഞു. സൂപ്പര്‍താരങ്ങളുടെ ഉള്‍പ്പെടെ നായികയായി അഭിനയിക്കാന്‍ തയ്യാറാണ്. തനിക്ക് ഇണങ്ങുന്ന നല്ല കഥാപാത്രങ്ങളും സ്വീകരിക്കും. ലേഡ് സൂപ്പര്‍സ്റ്റാര്‍ എന്നൊക്കെ വിളിക്കുന്നത് കേള്‍ക്കാന്‍ സുഖമുണ്ട്. എന്നാല്‍ സ്വന്തം നിലയില്‍ സിനിമ ചെയ്യുമ്പോഴുണ്ടാകുന്ന ടെന്‍ഷന്‍ സഹിക്കാനാവുന്നതിനും അപ്പുറമാണെന്ന് താരം അടുത്ത സുഹൃത്തുക്കളോട് പറഞ്ഞു.