റീമേക്കല്ലാത്ത പ്രിയന് ചിത്രം
റീമേക്കല്ലാത്ത ആദ്യ പ്രിയദര്ശന് ചിത്രം വരുന്നു. പ്രിയദര്ശന് ഇത് വരെ ഹിന്ദിയില് ഒരുക്കിയ സിനിമകളെല്ലാം സൗത്തിന്ത്യയില് ഹിറ്റായ സിനിമകളായിരുന്നു. ഒപ്പം സിനിമയുടെ വര്ക്കുകള് പൂര്ത്തിയാക്കിയ ശേഷം ഈ ചിത്രത്തിന്റെ നിര്മാണ പ്രവര്ത്തനങ്ങള് ആരംഭിക്കും. അക്ഷയ്കുമാറാണ് ചിത്രത്തിലെ നായകന്. അക്ഷയ്കുമാറിന് ഒരുപാട് ഹിറ്റുകള് നല്കിയ സംവിധായകനാണ് പ്രിയന്. അവസാനം ഇരുവരും അഭിനയിച്ച വെള്ളാനകളുടെ നാടിന്റെ റീമേക്ക് വലിയ പരാജയമായിരുന്നു. അതിന് ശേഷം ഒന്നുരണ്ട് പ്രോജക്ട് പ്ലാന് ചെയ്തെങ്കിലും നടന്നില്ല.
ഷങ്കറിന്റെ തമിഴ്ചിത്രമായ 2.0യില് വില്ലനായി അഭിനയിക്കുകയാണ് അക്ഷയ്കുമാര്. ചെന്നൈയിലെ ലൊക്കേഷനില് ചെന്നാണ് പ്രിയന് അക്ഷയ്കുമാറുമായി കാര്യങ്ങള് സംസാരിച്ചത്. പ്രിയന്റെയും അക്ഷയ്കുമാറിന്റെയും തിരക്കുകള് തീരുന്നതിന് അനുസരിച്ചാണ് ഷൂട്ടിംഗ് പ്ലാന് ചെയ്തിരിക്കുന്നത്. റിലയന്സാണ് നിര്മാതാക്കള്. നായികയെ തീരുമാനിച്ചിട്ടില്ല. മണിച്ചിത്രത്താഴിന്റെ റീമേക്കായ ഭൂല് ഭുലയ്യ വലിയ ഹിറ്റായിരുന്നു. അക്ഷയ്കുമാറിന് ഹിന്ദിയില് വേറൊരു ഇമേജ് നല്കിയ ചിത്രമായിരുന്നു അത്. അതിനാല് പ്രിയനില് താരത്തിന് വലിയ വിശ്വാസമാണുള്ളത്.
അവസാനം ചെയ്ത രണ്ട് മൂന്ന് ഹിന്ദിസിനിമകള് വലിയ പരാജയമായിരുന്നു. അതിനാല് ഒരു വമ്പന് ഹിറ്റുണ്ടാക്കാനുള്ള ശ്രമത്തിലാണ് പ്രിയന്. ഉത്തരേന്ത്യയില് അടുത്തകാലത്ത് നടന്ന സംഭവങ്ങളൊക്കെ സിനിമയില് ചര്ച്ച ചെയ്യുന്നുണ്ടെന്നാണ് വിവരം. കഥ പൂര്ത്തിയാക്കി. തിരക്കഥ പ്രിയനോ മറ്റാരെങ്കിലുമായിരിക്കും എഴുതുക. എന്തായാലും ബോളിവുഡിലെ നീണ്ട ഇടവേളക്ക് പ്രിയദര്ശന് വിരാമമിടുകയാണ്. അതിന്റെ സന്തോഷത്തിലാണ് അദ്ദേഹത്തിന്റെ സുഹൃത്തുക്കള്.
https://www.facebook.com/Malayalivartha
